Read Sukuma Bible 2015 – Bibilia Ilagano Lya Kale 2015 Zabuli 96 Bible Online

Zabuli 96 - Sukuma Bible 2015 – Bibilia Ilagano Lya Kale 2015 bible

Zabuli 96

¹Ū SEEBA Ng'wīmbīlagi lyīmbo ipya, hose pye ū mu sī ng'wīmbīlagi ū SEEBA.

²Ng'wīmbīlagi ū SEEBA, līkumīlījagi ī lina lyakwe, būkumūchagi ū būpīji bokwe būlī lūshikū.

³Ū būpīji wakwe būlomeelagi kū mahanga gose, nī shītīle shakwe sha kūkumya kū banhū bose.

⁴Nguno ū SEEBA alī ntaale, na igeleelilwe kūkumīlījiwa no no no; hangī igeleelilwe kogohwa kūtinda bamulungu bose.

⁵Nguno pye a bamulungu ba mahanga balī mashiikolile dūhū, alīyo ū SEEBA hū ng'wene ūyo wagabeeja a mapandī g'igūlū.

⁶Ikūjo na būdūla wa nyatemi shīlī kūlī we, Nguzu na wiza shilī ng'wipandī lyakwe lyeela.

⁷Bing'we ndūgū ja banhū, nkumūchagi ū SEEBA, ū SEEBA nkumūchagi gīkī igeleelilwe ikūjo na nguzu.

⁸Līkumūchagi ī likūjo īlo ligeleelilwe kūlwa lina lya ng'wa SEEBA, enhagi shakwinha, nzūgi mu mabīndo ga numba yakwe.

⁹Ū SEEBA namyagi mu būgaliili wela, pyī ī sī īzugume ū kū būtongi wakwe.

¹⁰Kumūūchagi mu mahanga gīkī, “Ū SEEBA hū ng'wene ū nsugi.” Ī sī ayītūūlile yīmīīla mu kūhandatīlwa, Ītīko kūselengetiwa na hado yaya.

¹¹A mapandī g'igūlū ni gayegage, Ī sī nayo īsangabale; ī nyanza īlundume, nī shose īsho shokalile mo.

¹²Na a matongo gasangabale, pyī nī shose īsho shokalile mo. Hūna ī mitī yose ya ng'wipoolu, nayo īkwīmba na būyegi

¹³ū kū būtongi bo ng'wa SEEBA, nguno izile. Ee, izile kwīlamula ī sī. Akwīlamula ī sī mu būtūngīlīja, na a banhū mu ng'hana yakwe.