Read Sukuma Bible 2015 – Bibilia Ilagano Lya Kale 2015 Sumo 1 Bible Online

Sumo 1 - Sukuma Bible 2015 – Bibilia Ilagano Lya Kale 2015 bible

Sumo 1

¹Sumo ja ng'wa Solomoni, ng'witūnja o ng'wa Daūdi, ntemi wa Isilaeli,

²kūlwa kūlanga masala na wilang'hani; kūlwa kūmana mihayo mitengeke.

³Ū munhū abize na nhūngwa ja kwilang'hana, na apandīke masala ū mu būpanga bokwe, kūlwa kwīta ya būtūngīlīja, na mu kalamulīle kagoloolile, hangī kabeelelile kū banhū.

⁴Kūlwa kūbinha masala abo batūgije, na a baalūki kūbinha būmani na witegeleja;

⁵a bakalaganu bigwe na bongeleleje a ha būmani wabo, a ba masala bapandīke ya kūbatonga;

⁶badūle kūjiitegeleja sumo na mihayo ya shigemelo, na mbisīla na kaalaagū ja banhū ba msala.

⁷Ū logohano kūlī SEEBA wene wandījo bo witegeleja; alīyo a bachilū bagadalahile a masala nū būhūgūlwa.

⁸Ng'wanone, igwaga a katongeelele ka ng'wa so, na a kalangīle ka ng'wa noko ūtizūlekana nako.

⁹Nguno ī mihayo yenīyo īkūbiza ngikili y'ikūjo kū ntwe gwako, na ngufu gwa būlenji mu nhingo yako.

¹⁰Ng'wanone, a banhū ba shibi ūlū būkūkonga konga, ūtizūbazunīlīja.

¹¹Ūlū būkūwīla, “Nzūgū ūdimane nise tūkankūngīle munhū tūmūlage; tūng'wibandīīle ūyo atī na būbi.

¹²Tūyūbamila bataalī bapanga, gītī kūmilwa shigila; nīyo bagima gīt'ūmo bakaīlaga abo bakahombokelaga ng'wichongo.

¹³Tūkūkwīja shikolo sha būlī mbika, ī numba jise jookale shikolo sha kūbataaja bing'wana.

¹⁴Ū bebe dimanaga nise dūhū, tūkūbiza isangī līmò.”

¹⁵Bebe ng'wanone, yaya ū bebe ū kūdimana nabo; nūūlū ūtizūhūbīla kūtūūla lūpambala lwako mu nzīla jabo.

¹⁶Nguno ī mhambala jabo jikihuutīīlaga yabūbi, bakikalaga bakangīlīgije kūja kwita mininga.

¹⁷Ū kwītegela ntego noni alīyo ū kūnū īlolile, gūlī mhayo gwa kūjimīīja makanza dūhū!

¹⁸Lelo a benaba, bakikūngīlaga boyi benekīlī bibūlage; bakawibandīīlaga ū būpanga wabo boi benekīlī!

¹⁹Ī yenīyo h'ī ng'halīlo ya bose abo batūngilwe sabo ja būnyecha; abo bakajipandīkaga jikabīngījaga ū būpanga wabo.

²⁰A Masala gakūhīlīkaga mu mapanda, nū mu nhūng'wanhīlo ja banhū gakūhamukaga;

²¹nū mu mapanda ūmo banhū bakūyogaga gakūhīlīkaga, nū mu mibita ya mizengo gakūlomeelaga.

²²Gakūhayaga, “Bing'we ba lūtūgà, mukwikala mukūyegelaga mu nzīla jing'we ja lūtūgà kūshisha nanalī? A badalahi bakwikala būyegela mu būdalahi wabo kūshisha nanali, na a bachilū bakūbūkolwa ū witegeleja kūshisha nanalī?

²³Galūkīlagi kūūnū mudegeleke būhūgūji bone, nakūmupumunhīla īyo nalī nayo mu moyo gwane; nakūmumanīkīja ī mihayo yane.

²⁴Alīyo īkī nang'witanile ng'ūlema, na atilongile wa kūdīlīla aho namugoloolelaga nkono gwane,

²⁵Īkī mukūbūdalahījaga pyī ū būganikīji bone, nū būhūgūji bone mutatogilwe ū kūwanukūla,

²⁶nū nene nakūmuseka ū mu mayanga ging'we, nakūng'wineenelegeja ūlū ng'ūgwīlwa nhabaala;

²⁷Ī nhabaala ūlū yūmupandīka gītī kūtūlwa mbula ya nyaga, na a mayanga gūng'wikīīla gītī nyaga gwa nsoke; na kūzwangana hamò na makoye shūmupīndya.

²⁸A henaho hū bakūnitana alīyo natidīka; bakwipuuna kūnikooba alīyo batūnipandīka.

²⁹Nguno baalī babūkolilwe ū witegeleja, batasolile mhayo gwa kūng'ogoha SEEBA,

³⁰ū būganikīji bone batawanukūlile, nū būhūgūji bone būbūdalaha.

³¹Hūna lūūlū, bakūlya matwajo ga nhūngwa jabo, bakwigūta īyo bakwīhelaga.

³²Nguno a batūgije bakūbūlajiwa kūtala kwabo; nū būtūdīlīla wa bachilū būkūbakenaagūla.

³³Alīyo ūyo ūnidegeleka nene, akwikala mu mhola na kwifuula, nū būbi būtūng'ogohya.”