Read Sukuma Bible 2015 – Bibilia Ilagano Lya Kale 2015 Sumo 10 Bible Online

Sumo 10 - Sukuma Bible 2015 – Bibilia Ilagano Lya Kale 2015 bible

Sumo 10

¹Īji jene sumo ja ng'wa Solomoni: Ū ng'wana wa masala akanyejaga ū ise, alīyo ū ng'wana ū mbūūlī akampīnīhajaga nina.

²Ī sabo ya kūpandīka mu būnyeecha ītagunanhaga, alīyo ū būtūngīlīja būkapījaga mu kūcha.

³Ū SEEBA atabalekanījaga a batūngīlīja bikale nzala, alīyo a babūbi akabahangījaga ū kwīshikīlīja īyo bīhahaalīlile.

⁴A makono ga ngokolo kū milīmo gakahabīpyaga, a ga munhū nkamu gakasabyaga.

⁵Ūyo akabilingaga shilīwa mu magesa, ng'wana ng'witegeleja ū ng'wenūyo; alīyo ūyo atogilwe tūlo mu magesa, ū ng'wenūyo ng'wana w'iponda soni.

⁶Ū ntūngīlīja akihoolekelagwa kū ntwe, alīyo ū nomo gwa ng'hūnga gūkikalaga gookalile būduta.

⁷Ū kūbizūkwa batūngīlīja gūlī mhayo gwa kwenha mbango, alīyo ī lina lya bakenaagūji līkūjimīīla.

⁸A ba ng'holò ja masala bakadimaga shilagīlo; alīyo ū mbūūli wa kwikala ūloma dūhū akalabūkaga.

⁹Ū munhū wa nhūngwa jigoloolile alī mhola ū mu kikalīle kakwe; alīyo ūyo akashimīzīlaga mu nzīla jiigoma gomile, akwigengeleka ūko būjiiwa.

¹⁰Ūyo akalolaga banhū na liso lya kūshilima akenhelejaga wilemeelwa; nū mbūūli wa kwikala ūloma dūhū akalabūkaga.

¹¹Ū nomo gwa ntūngīlīja gūlī lūzwīlo lwa būpanga, alīyo ū nomo gwa ng'hūnga gūkikalaga gookalile būduta.

¹²Ū kūkolwa kūkasooselaga wilemeelwa, alīyo ū būtogwa būkakundīkījaga būbi bose.

¹³A masala galī mu nomo gwa ng'witegeleja, alīyo ū nang'ha gwa kūdīīmūlīla mbūūlī ha ngongo.

¹⁴A banhū ba masala bakibīkīlaga witegeleja, alīyo ū nomo gwa mbūūlī gūkeegelejaga mayanga.

¹⁵Ī sabo ya basabi h'ī ng'hambī yabo ya kūpīlīla,[6] alīyo ū būhabī yene nhabaala ya bahabī.

¹⁶Ī mheela ya batūngīlīja Īkabatūngīījaga mu būpanga, īsho bakapandīkaga ba malofu shikabatwalīīlaga mu shibi.

¹⁷Ūyo akigwaga ya kūganikīlwa akoolekejaga biye nzīla ya būpanga, alīyo ūyo akadalahaga kūhūgūlwa, akabatajaga sagala a banhū.

¹⁸Ūyo akabisaga ūmo abakolelilwe a banhū, ū nomo gwakwe gūkayombaga būlomolomo, nū wa kwikala ūbība būsīgani mbūūlī.

¹⁹Ī mihayo ūlū yūkwīla nī shibi shitagayaga, aliyo ūyo akalang'hanaga lūlīmi lwakwe, alī na masala ū ng'wenūyo.

²⁰Ū lūlīmi lwa ntūngīlīja lūlī sabo niiza, alīyo ī ng'holò ya nkenaagūji Ītī na ngofyoolo.

²¹Ū nomo gwa ntūngīlīja gūkalishaga banhū bingī, alīyo a babbūūlī bakachaaga kūlwa kūgayiwa witegeleja.

²²Ī ja ng'wa SEEBA jikenhaga būsabi, nīyo atongejaga ho na makoye.

²³Ū mbūūlī akayegelaga nhūngwa jabūbi, alīyo ū munhū ng'witegeleja akayejiagwa mihayo ya masala.

²⁴Īyo ayogohile ū ng'hūnga h'īyo īkangwīlaga, alīyo ū ntūngīlīja akinhagwa Īyo alī na ng'hūmbū nayo.

²⁵Ū nshūlūlū ūlū gūūhuyemba, gūlīkabīta gwabapyagūlaga a ba malofu; alīyo a batūngīlīja bīmīīla ilalī.

²⁶Ūmo īlī ng'asha[7] kū mino nūūlū lyochi mu miso, nū ng'winogolelwa h'ūmo alī ū kū batūmi bakwe.

²⁷Ū logohano kūlī SEEBA lūkongejaga shikū ja būlamu, alīyo ī myaka ya bakenaagūji Īkagehiagwa.

²⁸Ū kwisagīlwa kwa batūngīlīja kūlī būyegi, alīyo ū kwisagīlwa kwa bakenaagūji kūkachaaga mpandagīlo.

²⁹Ī nzīla ya ng'wa SEEBA īlī ibūngīlo ū kū batūngīlīja, alīyo a babūbi īkabakenaagūlaga.

³⁰A batūngīlīja batūdubbūlwa na hado yaya, alīyo a ba malofu batikala ū mu sī.

³¹Ū nomo gwa ntūngīlīja gūkasūlūlūchaga masala, alīyo ū lūlīmi lwa munhū ng'halalī lūkūtīnwa.

³²Ū nomo gwa ntūngīlīja gwīdeebile ī mitengeke, alīyo ū gwa ng'hūnga gwene ya malofu dūhū.