Read Sukuma Bible 2015 – Bibilia Ilagano Lya Kale 2015 Sumo 11 Bible Online

Sumo 11 - Sukuma Bible 2015 – Bibilia Ilagano Lya Kale 2015 bible

Sumo 11

¹Ū SEEBA ajikolilwe ī gapani ja būnyeecha, alīyo ganyegije a mapimīlo ga būdito ayo gatūngīlīgije.

²Ūlū būbiza ho wikumīlīja, na a magooke gakilongaga; alīyo ū widohya būkajīlanījaga na masala.

³Ū būsanyiwa wa batūngīlīja būkabatongeelaga, alīyo abo batī basanyiwa bakakenaagūlagwa būlomolomo wabo.

⁴Ī sabo ītī na solobo ū mu lūshikū lwa kūkundūlīlwa būpelanu, alīyo ū būtūngīlīja būkapījaga ū mu kūcha.

⁵Ū būtūngīlīja wa banhū abo batī na shisembo, būkabagoloolelaga nzīla; alīyo a babūbi bakagwishiagwa na būbi wabo benekīlī.

⁶Ū būtūngīlīja wa ba nhūngwa jigoloolile būkabapījaga, alīyo abo batī ha ng'hana, bakagwishiagwa na kwikūmvwa kwabo kwabūbi.

⁷Ū wabūbi ūlū ūcha nū kwisagīlwa kwakwe kwashilaga, pyī īyo wīyisagīlagwa kūfuma mu būdūla bokwe īkajimīīlaga.

⁸Ū ntūngīlīja akīnjiagwa ū mu makoye, ū nkenaagūji akadumbukīlaga mo.

⁹Ūyo atī na logohano kūlī Mulungu akabipyaga bazenganwa bo nomo gwakwe; alīyo a batūngīlīja bakapīlaga kūlwa witegeleja.

¹⁰A batūngīlīja ūlū yūbabeelela Ī mihayo gūkayegaga ū nzengo; a babūbi ūlū bayagaala, mhūndū ja būyegi jikazīlīng'hanyaga.

¹¹Ū nzengo gūkakūjiagwa ūlū batūngīlīja bīlūkīlwa mbango, alīyo gūkakenaagūkaga kūlwa nguno ya nomo gwa bahūnga.

¹²Ū wa kūngayīlīja nzenganwa ng'wiye atī na masala, alīyo ū munhū ng'witegeleja alūlang'hanile ū lūlīmi lwakwe.

¹³Ū nsīīganī akafumbagūlaga mihayo ya mbisīla, alīyo ū nsanyiwa akikalaga Īlang'hanile ī mihayo.

¹⁴Ī lihanga ūlū lyūgaya baganikīji līkagwaga, alīyo ūlū līlī na bayangūji bingī numho līlī mhola.

¹⁵Ūyo wiyeega kūlwa nguno ya munhū ngeni akūlabūka, alīyo ūyo ūlema kwidima nang'hwe nkono gwa kūng'wilahīlīla, akwikala mhola.

¹⁶Ū nkīma ng'wiza ng'holò akapandīkaga ikūjo, alīyo a bagosha ba nguzu bakagelelaga ha būsabi dūhū.

¹⁷Ū munhū wa shigongo akigaliilaga wei ng'wenekīlī, alīyo ū ng'wiboneeji akiyenhelaga mayanga wei ng'wenekīlī.

¹⁸Ū munhū wa nhūngwa jabūbi akapandīkaga mheela ya būnyeecha, alīyo ūyo akahambaga būtūngīlīja, Ī linong'ho lyakwe līlī lya ng'hana.

¹⁹Ū munhū ntūngīlīja akapandīkaga būpanga; alīyo ūyo akalondeelaga yabūbi, akashikaga ng'wicha.

²⁰Ū SEEBA abakolilwe a ba ng'holò ng'hūnga, alīyo abayegelile abo nzīla jabo jitī na shilingo.

²¹Shiigelile gūmanīke hape gīkī, A babūbi batūgūpūlūgūka ū nsango; alīyo a batūngīlīja bakūpīla.

²²Ūmo īlī sīīlī ya zahabu ha lyūlū lya ngulubī, h'ūmo būlī nū būsoga ū kūlī nkīma ūyo atī ng'witegeleja.

²³Ī ng'hūmbū jakwe ū ntūngīlīja jikang'wingījaga mu wiza, alīyo ū munhū wa malofu atī na kwisagīlwa kūngī ūlū ītī kūgwa mu būpelanu.

²⁴Alīho munhū akinhaga na ng'holò īmò, alīyo hū wiseema ū kūsaba; hama alīho ūngī atinhaga biye, alīyo h'akongejaga kūhabīpa.

²⁵Ū munhū ng'wiza ng'holò akongeja ū kūsaba, nū yūyo akinhaga biye minzī, nang'hwe akwinhwa minzī.

²⁶Ū misi wa shilīwa akadūkīlagwa na banhū, alīyo ū wa kūbajingīja mu wiyaabī, akihoolekelagwa mbango.

²⁷Ūyo akabūkoobaga wiza mu būkalalwa akayegelagwa na banhū, alīyo ī yabūbi īkangwīlaga ūyo akīkoobaga.

²⁸Ūyo ūsanya būsabi bokwe akūgwa, alīyo ū ntūngīlīja akafulumaga gītī idūūtū idoto.

²⁹Ū wa kwikala ūyoja kaya yakwe atūpandīka ī sabo ya wingīji, nīyo ū mbūūlī akūbiza ng'witūmamīja kū banhū ba masala.

³⁰Ī litwajo lya ntūngīlīja gūlī ntī gwa būpanga, alīyo ūyo alī na masala akadutaga banhū kūlī we.

³¹A batūngīlīja ūlū banukūla mheela jabo mu sī, al'a ba malofu na a ba shibi bakūgela he lūūlū a bene!