Read Sukuma Bible 2015 – Bibilia Ilagano Lya Kale 2015 Sumo 12 Bible Online

Sumo 12 - Sukuma Bible 2015 – Bibilia Ilagano Lya Kale 2015 bible

Sumo 12

¹Ūyo atogilwe ū kūhang'wa, ū ng'wenuyo atogilwe būmani; alīyo ūyo atatogagwa kūhūgūlwa mbūūlī ū ng'wenūyo.

²Ū munhū wawiza akabizaga nganja ū kūlī SEEBA, alīyo ū SEEBA akangwisījaga nsango ū nsala sala.

³Ū munhū atīko kwīmīīla na nguzu mu nzīla ja malofu, alīyo ū ntūngīlīja atūdūbbūlwa na hado yaya.

⁴Ū nkīma wa nhūngwa jawiza alī shingilima ya ngoshi, alīyo ū nkīma w'iponda soni abange gītī būbozu ū mu maguha ga ngoshi.

⁵A batūngīlīja balī na kahelele kagoloolile, alīyo ū būganikīji wa bahūnga wene bo nyalemba lembi.

⁶Ī mihayo ya ba malofu Ījīlīīlile mu nyabūlagi, alīyo a batūngīlīja bakapījiagwa kayombele kabo.

⁷A banhū ba malofu bakagwaga bajimīīla jimijimi, alīyo ī kaya ja batūngīlīja jikīmīīlaga pyī ī shikū.

⁸Ū munhū akakumīlījiagwa kūlwa masala gakwe, alīyo a ba maganiko gasalīkile bakadalahagwa.

⁹Hambū hambū ū munhū adalahwe alīyo alī na ntūmami a ha kaya, kūtinda ū wa kwigīmba būkūjiwa al'ū kūnū akūtobagwa nzala.

¹⁰Ū munhū ntūngīlīja akadīlīlaga Ī mitugo jakwe; alīyo ū munhū wabūbi, ū wiboneeji bokwe h'ī shītwa sha shigongo ū kūlī we.

¹¹Ūyo akūlīmaga ilaale lyakwe akūpandīka shilīwa shingī, alīyo ū wa kūdīīlīla mihayo dūhū atī na masala.

¹²A banhū ba malofu bakahahaalīlaga īsho bakapandīkaga banhū babūbi; alīyo ī miji ya batūngīlīja Īkatwajaga matwajo.

¹³Ū munhū wabūbi akagwashiagwa na būbi bo mihayo yakwe, alīyo ū ntūngīlīja akapūlūgūkaga ū mu makoye.

¹⁴Ū munhū akapandīkaga shawiza kūfuma mu kalūngalūngīle kakwe; h'ūmo nū nīmo gwa makono gakwe gūkampandīkīlaga inong'ho

¹⁵Ū nchilū akabonaga Ī nzīla yakwe ītūngīlīgije, alīyo ū munhū wa masala akadegelekaga būhūgūlwa.

¹⁶Ū mbūūlī akamanīkaga haho na haho ūlū ūkolwa, alīyo ū munhū wa masala akalekejaga nūūlū ūsondagūlwa.

¹⁷Ū nkaanīji wa ng'hana akafunyaga būkaanīji būgoloolile, alīyo ū nkaanīji maama akahayaga ya būlomolomo.

¹⁸Ī mihayo ya kūhayiwa mu wiyangūhīlīja īkachimaga gītī lūshū, alīyo ū lūlīmi lwa bitegeleja lūkalagūlaga.

¹⁹Ū nomo ūyo gūkahayaga ya ng'hana gūkūshinga ho ilalī, alīyo ū lūlīmi lūhwahwa lūlī na būlamu būguhī.

²⁰Abo bakahelaga mihayo mibi balī na būlemba lembi ū mu ng'holò jabo, alīyo a batūūji ba mhola balī na būyegi.

²¹Gūtīho gwabūbi gwa kūbagwīla batūngīlīja, alīyo a ba malofu balī nayo mingī ī ya kūbahemeeja.

²²Ū SEEBA agūkolilwe no ū nomo ū ng'hwahwa, alīyo abayegelile abo bakashimīzīlaga mu ng'hana.

²³Ū munhū wa masala akikalaga abūlang'hanile ū būmani bokwe, alīyo ī ng'holò ja babbūūlī jikaboolechaga ū būchilū ūbo alī nabo.

²⁴A makono ga nkamu kū milīmo h'ayo gakabizaga masugi, alīyo ū winogolelwa būkagelejaga mu būsese.

²⁵Ī ng'holò ya shibbamhū Īkang'wenhelejaga ū munhū konzololoka ū mīlī, alīyo ū mhayo gwa būtogwa gūkang'winhaga būzalabanu.

²⁶Ū munhū ntūngīlīja akilang'hanaga ū mu kasolele ka būnwani, alīyo ī nzīla ja bahūnga jikabatūngīījaga mu kūjimīīla.

²⁷Ū ng'oolo akalemeelagwa nūūlū koocha nyama ya ndimu īyo wabūlūgaga, alīyo ū ntūmami ng'witegeleja, ajikūgije no ī sabo jakwe

²⁸Ū mu nzīla ya būtūngīlīja būlīmo būpanga, nīyo ū mu kashimīzīle kenako Īlīmo mhola ya būja na būja.