Read Sukuma Bible 2015 – Bibilia Ilagano Lya Kale 2015 Sumo 14 Bible Online

Sumo 14 - Sukuma Bible 2015 – Bibilia Ilagano Lya Kale 2015 bible

Sumo 14

¹Ū nkīma wa masala akībeejaga ī kaya yakwe, ū mbūūlī akīkambagūlaga ī yakwe na makono gakwe ng'wenekīlī.

²Ū munhū wa shīmīle shigoloolile alī na logohano kūlī SEEBA, alīyo ū wa nzīla jichaama chaamile andalahile ū SEEBA.

³A kalūnga lūngīle ka mbūūlī kakang'wenhelaga nang'ha gwa kūndīīmūla ha ngongo, alīyo a ba masala bakalang'hanagwa nomo gwabo.

⁴Aho jitīho ng'ombe,[8] ū lūbīgīlī lwape, alīyo ī nguzu ja nzīkū jikenhaga būponi būtaale.

⁵Ū mbonà wa ng'hana ataloma lomaga, alīyo ū nkaanīji ng'hwahwa akabībaga būmaama.

⁶Ū munhū w'ibengwe nang'hwe akakoobaga kūbiza na masala, alīyo atagapandīkaga; lelo ū būmani shinogu no ū kwiza ū kūlī ng'witegeleja.

⁷Ū mbūūlī lekanaga nang'hwe, nguno ūtīko kūmana mhayo ū mu yose īyo īkafumaga mu nomo gwakwe.

⁸A masala ga bitegeleja gakabagunanhaga kūjideedeng'hanya ī nzīla jabo, alīyo ū būchilū wa babbūūlī būlī ha kwilembagūla.

⁹A bachilū bakashiibengelejaga Ī shibi, alīyo a batūngīlīja bakachīlagwa shigongo.

¹⁰Būlī ng'holò īmanile kūsaatwa kwayo, na atīho ūyo adūgije kūsangīla nayo ū mu būyegi wayo.

¹¹Ī numba ya munhū wa malofu Īkūkenaagūlwa, alīyo ī kaya ya ntūngīlīja Īkongeja kwīlūkīlwa yawiza.

¹²Īlīho nzīla īyo munhū ashikile kwībona gīkī ītūngīlīgije, alīyo gashinaga ū kū ng'halīlo Ījile mu kūcha.

¹³Ī ng'holò īkapīnīhalaga nūūlū ng'wikanza lya seko, nū būyegi būshikile kūkalīkīla mu būpīna.

¹⁴Ū wa kūshoka numa mu ng'holò, akapandīkaga mheela kūlenganīla na shimīzīle yakwe; nū ntūngīlīja alī na mheela ū mu shimīzīle yakwe.

¹⁵Ū munhū atūgije akazunyaga būlī mhayo, alīyo ū wa masala akajiideedeng'hanyaga chiza ī nzīla jakwe.

¹⁶Ū munhū wa masala alī na logohano kūlī SEEBA, na akīngaga ū mu shibi; alīyo ū mbūūlī ng'wiyangūhīlīja hangī atadīlīlaga.

¹⁷Ū munhū ng'wangū kūpelana akīītaga mihayo ya nyachilū, nū yūyo amanīīlile kūkelela biye bankolilwe a banhū.

¹⁸A ba lūtūgà ū wingīji wabo būlī būchilū, alīyo a ba masala bakazwīkagwa ngikili ya būmani.

¹⁹A banhū babūbi bakūgwa mu magūlū kū būtongi wa bawiza, na a ba malofu a ha mibita ya batūngīlīja.

²⁰A bahabī bakikangīīlagwa nūūlū na bazenganwa bichabo, alīyo a basabi balī na banwani bichabo bingī.

²¹Ūyo akandalahaga nzenganwa ng'wiye akīītaga shibi, alīyo alī na ūyo akachīlaga shigongo bagayiwa.

²²Angū, abo bakahelaga mihayo yabūbi batafumīlaga hanze? Alīyo abo bakahelaga yawiza bakanukūlagwa mu būtogwa na kūsanyiwa.

²³Būlī nīmo ndito gūkenhaga solobo, alīyo ū būlomi bo mamihayo dūhū būkatwalīīlaga mu būhabī.

²⁴Ī sabo h'ī shingilima ya banhū ba masala, alīyo ū būchilū wa babbūūlī būkatwajaga būchilū.

²⁵Ū nkaanīji wa kwīmīīla ha ng'hana akapījaga būpanga; alīyo ū nkaanīji nomolomo ng'wene mībi wa būhwahwa.

²⁶Ūyo alī na logohano kūlī SEEBA alī n'ipīlīlo lya ng'hana, nū kū baana bakwe līkūbiza ibūngīlo.[9]

²⁷Ū logohano kūlī SEEBA lūlī lūzwīlo lwa būpanga, kūlwa kūng'hangīja munhū atizūgwa mu lūtu lwa kūmūlaga.

²⁸Ī likūjo lya ntemi asuge banhū bingī; alīyo ūlū batīho a banhū, ū nsugi atī na gwakwe.

²⁹Ū munhū ng'wiyūmīlīja alī na witegeleja būtaale, alīyo ū ng'wangū kūpelana, akoolechaga būchilū bokwe.

³⁰Ī ng'holò ūlū yūlembeela Īkagwinhaga būpanga ū mīlī, alīyo ū wilu būkabojaga a maguha.

³¹Ūyo akiboneelaga bahabī akoolechaga ibengwe ū kūlī Nsūmbi wabo; alīyo ūyo akabachīlaga shigongo bagayiwa, ankūgije ū Mulungu.

³²A ba nhūngwa jabūbi bakagwaga mu mayanga kūlwa būbi wabo, alīyo a batūngīlīja balī na būpīlīlo ū ng'wikanza lya kūcha.

³³A masala gakikalaga mu ng'holò ya munhū ng'witegeleja, alīyo nū kū babbūūlī gakiyoolechaga bagamane.

³⁴Ū būtūngīlīja būkagūngūhyaga ihanga, alīyo ī shibi shikenhaga magooke kū banhū bose bose.

³⁵Ū ntemi akayejiagwa na ntūmami wa masala, alīyo ū ntūmami wa nhūngwa ja magooke akabūbbehaga ū būdaki bokwe.