Read Sukuma Bible 2015 – Bibilia Ilagano Lya Kale 2015 Sumo 17 Bible Online

Sumo 17 - Sukuma Bible 2015 – Bibilia Ilagano Lya Kale 2015 bible

Sumo 17

¹Hambū hambū kūlya lūgūkūlū mu būlembeezu, kūtinda kūbiza mu kaya ya shitoolyo īyo īheebilwe yombo.

²Ū nsese wa masala ashikile kūnsuga ū ng'wana wa mu kaya ūyo akīītaga mihayo ya minala; nīyo nang'hwe akūbiza n'isangī ū mu wingīji wa baana byalwa.

³Ū wiza bo feza būkamanīlagwa mu lyabījo isebu, ū bo zahabu ng'wichongo lya moto, alīyo ī ng'holò ja banhū jikeejiagwa na SEEBA.

⁴Ū munhū wabūbi akigwaga ya kūfuma mu nomo nsoso, ū nomolomo akadegelekaga ya kūfuma mu lūlīmi lwa malofu.

⁵Ūyo akagīmbaga nyachilū bahabī, akoolechaga ibengwe ū kūlī Nsūmbi wabo; nū wa kūyega kūlwa mayanga ga biye atūgūpūlūgūka ū nsango.

⁶A bizūkūlū bal'ikūjo lya bataale, nī shingilima ya baana balī a babyaji babo.

⁷Ī mihayo mitengeke ītigeleelilwe Īfume mu nomo gwa mbūūlī; ī no no no ūyo gūtigeleelilwe gete, ū nsugi kūbiza na nomo ng'hwahwa.

⁸Ū būhongi būbange gītī mhembe ya ndagū ū kūlī ng'hongi, būlī kwene ūko ūja akūmanūgwasha Īsho alīshikooba.

⁹Ūyo akalekejaga būhūbi alī na ng'hūmbū ja kūtūūla būtogwa, alīyo ū wa kwikala wishokeela kūbūhooyela ū būbi, akasambaagūlaga būnwani.

¹⁰Ū būhūgūji būkang'wingīlaga ū munhū ng'witegeleja, kūtinda mbūūlī nūūlū ashiiwe milang'ha igana.

¹¹Ū munhū wabūbi alolile ha būshitiigwa bokwe dūhū, ū kū ng'halīlo akatūmīlagwa ntūmījiwa ng'wayī.

¹²Hambū hambū kūpamanya na shimba[12] ng'hīma yīngījiagwa baana bayo, kūtinda kūsanja na mbūūlī mu būchilū bokwe.

¹³Ū munhū ūyo akashoshaga yabūbi kūlwa kwītīlwa yawiza, a ha ng'wakwe ītalashila ī yabūbi.

¹⁴Ū kwandya yombo ībange gītī kūchibūlīla ng'hūūmo gwa minzī; alilūūlū, lekejaga wangū kūko ū mhayo gūtaalī kūjūūcha yombo.

¹⁵Ū wa kūmona būtūngīlīja munhū nkenaagūji, nū wa kūng'wisaabīla nsango munhū ntūngīlīja, bose benabo ū SEEBA abakolilwe.

¹⁶Īlīho solobo kī ū kūlī mbūūlī kūbiza na sabo mu nkono, ūlū atatogilwe ū kūbiza na masala?

¹⁷Ū nwani alī na būtogwa shikū jose, ū ndūgūyo abyalilwe kūlwa kūgunanha mu makoye.

¹⁸Ū munhū ūyo agehelilwe witegeleja akidimaga nkono na munhū ong'wilahīlīla, na akiyeegaga kūlwa nzenganwa ng'wiye.

¹⁹Ūyo akayegelaga yabūbi atogilwe yombo ū ng'wenūyo, ūyo akagūngūhyaga mita gwakwe,[13] akiyeegelegejaga makoye.

²⁰Ū munhū wa ng'holò ng'hūganu atīko kūbeeja shose shose, nū wa lūlīmi lūlomolomo akagwaga mu makoye.

²¹Ū kūbiza na ng'wana mbūūlī ilīja būpīna, būtīho būyegi ū kūlī munhū ūyo abyalile ng'wana mbūūlī.

²²Ī ng'holò nyegu būgota būsoga ū wenūbo, alīyo ū moyo ūyo gūsheedekejiwe gūkakalamuchaga maguha.

²³Ū munhū ng'hūnga akazunyaga kūhongwa mu wiba wiba gīkī akenaagūle nzīla ja būtūngīlīja.

²⁴Ū ng'witegeleja akikalaga agalang'hanile a masala, alīyo ū mbūūlī ī mbyūūla miso yakwe ītī na lūbīmbī.

²⁵Ū ng'wana ū mbūūlī akenhaga būpīna kūlī ise; hangī akang'wītīlaga isūngū itaale no ū nina wa kūmyala.

²⁶Ītigeleelilwe kūmbiisha ihyū munhū ntūngīlīja, nūūlū kūtūla basugi kūlwa shītīle shabo shigoloolile.

²⁷Ū ndeeba akayombaga ī mihayo yakwe mu kwilang'hana, nīyo ū munhū ng'witegeleja alī na moyo nembeezu.

²⁸Nū mbūūūlī akabalagwa kūbiza na masala ūlū ahuumūlile, nīyo ūlū alī sele akūmanūhayiwa gīkī nang'hwe ntengeke.