Read Sukuma Bible 2015 – Bibilia Ilagano Lya Kale 2015 Sumo 2 Bible Online

Sumo 2 - Sukuma Bible 2015 – Bibilia Ilagano Lya Kale 2015 bible

Sumo 2

¹Ng'wanone, ūlū wīyanukūla ī mihayo yane, nī shilagīlo shane wikala nasho,

²ū gūtū gwako ūgūgalūkīja kū masala, nī ng'holò yako wīlogeja kū witegeleja,

³hangī ūlū ūwitana ū būdeeba, nū witegeleja ūbūlīlīīla n'ilaka lya higūlya,

⁴ūyūbūkooba mu welwa ng'holò gītī hela, na kūbūgīsīlīja gītī sabo jibisile;

⁵ū mu gīko ūkūlwitegeleja ū logohano lo SEEBA, nū būmani bo ng'wa Mulungu ūkūbūpandīka.

⁶Nguno ū SEEBA akinhaga masala, ū mu nomo gwakwe būkafumaga būmani na witegeleja.

⁷A batūngīlīja ababīkīlile būpyeni, ū kū ba nhūngwa ngololoku alī lūmūda.

⁸Nguno akalang'hanile a kajīle ka batūngīlīja, abo bansanije ajibaladile Ī nzīla jabo.

⁹Hūna ūkwīyitegeleja ī ya būtūngīlīja nī yīyo īgoloolile, nī mibonwa banhū, nīyo būlī nzīla jawiza.

¹⁰Nguno gakwingīla masala ū mu ng'holò yako, ū witegeleja būkūtūūla būtegi ū mu ng'holò yako.

¹¹A kasolele ka witegeleja kakūkūbalada; ū būmani būkūkūlang'hana.

¹²A masala gakūkūpīja ūtizūja mu nzīla ja banhū ba malofu, ū kū banhū ba mihayo yisalīkile;

¹³abo bakīngaga mu nzīla ngololoku, baayūshimīzīla mu nzīla ja giiti;

¹⁴abo bakayegelaga mu kwīta yabūbi, na kūbona būyegi ū mu būsoso wa nhūngwa ja kikalīle;

¹⁵abo nzīla jabo jiigoma gomile, hangī ba nhūngwa ja malofu.

¹⁶A masala gakūkūpīja ū kūlī nkīma ū nshihani na ng'wīmīlīzu; ū wa mihayo ya kūkonga konga,

¹⁷ūyo oneka ngoshi wa ha būnhya bokwe, ūdalaha ilagane īlo akabeeja kū būtongi bo ng'wa Mulungu wakwe.

¹⁸Nguno ū ng'wenūyo ī numba yakwe Ījīlīīlile kwicha, ī nzīla jakwe jitūngīīlile kū myoyo ya bafu.

¹⁹Abo bakajaga kū ng'wakwe atashokaga nūūlū ūmò, na batajipandīkaga hangī Ī nzīla ja būpanga.

²⁰Alilūūlū, shimīzīlaga mu nzīla ja banhū bawiza, wikale mu kashimīzīle ka batūngīlīja.

²¹Nguno a ba kashimīzīle kagololoku bakwikala ū mu sī, abo batī na shilingo bakūsaaga mo.

²²Alīyo a ba malofu bakwīnjiwa ū mu sī, abo batī batūngīlīja bakūdubbagūlwa mo.