Read Sukuma Bible 2015 – Bibilia Ilagano Lya Kale 2015 Sumo 20 Bible Online

Sumo 20 - Sukuma Bible 2015 – Bibilia Ilagano Lya Kale 2015 bible

Sumo 20

¹Ī shikoji īsho shikang'wiagwa shitī n'ikūjo, ū walwa wenhi wa yombo; ūyo shinsugile ī shenīsho atī na masala.

²Ū būpelanu bo ntemi būtikīlile na bo shimba īkūpogomaga, ū wa kūmpelanya akūbiza alībūponya ū būpanga bokwe.

³Ū munhū ūyo atī na yombo bankūgije a banhū, alīyo būlī mbūūlī atadīīlaga kwenheleja wilemeelwa.

⁴Ū ng'winogolelwa atalīmaga ū mu shikū ījo jiigeleelilwe, ū mu makanza ga magesa akūlola, alīyo atūpandīka nūūlū kī.

⁵Īyo akīhelaga munhū mu ng'holò yakwe īlī mu shimu, gītī mu būjiba bo minzī mingī, alīyo ū ng'witegeleja akīdahaga.

⁶Banhū bingī bakikumūchaga gīkī balī na būtogwa bo ng'hana, alīyo nani adūgije kūmpandīka ū munhū nsanyiwa?

⁷Ū munhū ntūngīlīja ī shimīzīle yakwe ītī na shisembo, a baana bakwe akūbaleka balī na mbango.

⁸Ū ntemi ūlū igashije h'isumbī lya kūlamulīla, ū būbi akabūsūngūlaga pyī ū bose na miso gakwe.

⁹Nani ūyo adūgije kūhaya gīkī, “Ū nene nalī wape nīlang'hana ī ng'holò yane, nalī ng'wela natī na shibi?”

¹⁰A mapimīlo ga būdito ga wikīla kīle, nī ngelekelo ījo jitalenganīlile, shose shenīsho ū SEEBA ashikolilwe.

¹¹Nūūlū ū nīgīnī akamanīlagwa mu shītīle shakwe, kūlwa kūjibona ī nhūngwa jakwe, ūlū jawiza na jitūngīlīgije.

¹²Ū gūtū ūyo gūkigwaga nī liso īlo līkabonaga, gose wagabeja SEEBA.

¹³Yaya ū kūtogwa tūlo ūkūhabīpa, ikalaga miso ūkūpandīka ī shilīwa sha kūleka na kūleka.

¹⁴Ū ngūji akūmanūdaaya, “Ī lyenīlī ibi, lītī isoga!” Alīngage ho wandya na kwikumīlīgīja īsho wagūlaga.

¹⁵Ī zahabu ī jene jilīho, nī lubi[15] jilīho jabūyaga; alīyo ū nomo ūyo gūkayombaga ya būmani ū gwene shilambu no ū kūgūpandīka.

¹⁶Ūyo wiyeega ha ng'wanya go munhū atandeebile, solaga ng'wenda gwakwe, ūlū wiyeegaga kūlwa nkīma malahya gūdimīīlage ībize ng'handīko.

¹⁷Ī shilīwa sha būnyeecha shikanonelaga ū munhū, alīyo akakalīlaga kūbiza na nomo gookalile masikīwī.

¹⁸Ī mihayo yako īhelage mu kūkooba būgunanhwa, nūūlū ūlīhaya kwingīla mu būlūgū, pandīkaga baganikīji.

¹⁹Ū nsīīgani akafumbagūlaga nūūlū mihayo ya mbisīla, alilūūlū, ng'ogohage ū kalomo njoocho.

²⁰Ūlū munhū ūnzuma ise nūūlū nina, ū būpe w'isana lyakwe akwīngījiwa mu būjikū bo giiti sha malunde.

²¹Ū wingīji bo kwiyangūhīlīja kūpandīka ha wandījo, būtūbiza na ū kū ng'halīlo.

²²Yaya ū kūhaya gīkī, “Nū nene nakūkwītīla ūmo wanīītīla ū bebe!” Alīyo nindīīlage SEEBA, akūkūguna.

²³Ū SEEBA atagatogagwa a mapimīlo ga būdito a ga wikīla kīle, nī gapani ja būnyeecha jitanyejaga.

²⁴A kashimīzīle ka ng'wa munhū kakatongeelagwa na SEEBA. Īdūlīkanile kinehe ose ose ayitegeleje ī nzīla yakwe?

²⁵Gūlī ntego ū kūlī munhū ū kwilahīla wangū wangū gīkī akūmfunīja shikolo ū SEEBA, hūna wandya kwīyideedeng'hanya īyo wilahīlaga kwīyīta.

²⁶Ū ntemi wa masala akabasūngūlaga a bakenaagūji, hūna wabapūūla n'ipūūlīlo baanogela.

²⁷Ī tala ya ng'wa SEEBA īkatwimaga ū mu moyo go ng'wa munhū, īkashigīsīlījaga pyī īsho shilī mu gatī yakwe ū munhū.

²⁸Shigongo na būsanyiwa h'īsho shikanang'hanaga ntemi, nī lisumbī lyakwe lya būtemi lyīmīīlile kūlwa shigongo.

²⁹Ī nguzu ja badinha h'ī shingilima yabo, lelo ī nzwīlī jape jene būlenji wa bakūla kale.

³⁰Ī milang'ha ya kūsaatya Īkīnjaga būdidiga, ū būtūlwa būkeejaga ū būsoso wa mu gatī.