Read Sukuma Bible 2015 – Bibilia Ilagano Lya Kale 2015 Sumo 24 Bible Online

Sumo 24 - Sukuma Bible 2015 – Bibilia Ilagano Lya Kale 2015 bible

Sumo 24

¹Lekaga kwīta wilu kūlwa nguno ya banhū babūbi, yaya ū kwikūmvwa kūdimana nabo.

²Nguno ī ng'holò jabo jikahelaga ya wiboneeji, na a mahooya gabo gasugilwe mihayo ya kwenha mayanga.

³Ī kaya īkabeejiagwa mu nzīla ya masala, hama īkaguzuhiagwa mu witegeleja.

⁴Kūlwa būdeeba ī chumba shayo shikokajiagwa shikolo shawiza, na būsabi būtaale wa mbika ningī.

⁵Ū munhū wa masala alī na būdūla būtaale, nīyo ū munhū ng'witegeleja akongejaga ū kūbiza na nguzu.

⁶Ūlū ūlī ng'wikanza lya būlūgū pandīkaga banhū bakūtonge, ūlū ūtogilwe būtindi bizaga na baganikīji kaganda.

⁷A masala galī kwigūlya kūle no nū mbūūlī, atī na gwa kūyomba a ha mita aho līkibilingīlaga ibanza.

⁸Ūyo akahelaga mihayo yabūbi, a banhū bakūng'witana nkenaagūji.

⁹Ū kūhela mihayo mu nyachilū shibi ī shenīsho, hama pye a banhū bankolilwe ū munhū w'ibengwe.

¹⁰Ūlū ūlī ng'wikanza lya makoye hūna ūyūlelengeta numho ūlī na nguzu ngehu no.

¹¹Ūbaguna abo bakwīnjiagwa batwalwa kūjūbūlagwa, na a babo bakūlelengetaga bajile kwisīnzīlo ūbadima wabashosha.

¹²Ūshikile kūhaya, “A bise twalī tūtagūmanile gete ū mhayo gwenūyū,” ūliganika ū Mpimi wa ng'holò ja banhū atūgūdeeba? Ūyo akalang'hanaga būpanga wako akūlemeelwa kūgūmana ū gwenūyū? Atūnīpa būlī munhū kūlenganīla na nhūmamīle yakwe?

¹³Ng'wanone, ng'waaga būūkī nguno būnonu; ū būūkī bo mu malela būnonu no ū mu nomo.

¹⁴Hūna lūūlū, managa gīkī a masala nago manonu ū mu būpanga wako; ūlū ūgapandīka īlīho misoga Īkūlindīīlile ūko būjiiwa, hama ū kwisagīlwa kwako gūtūponyiwa na hado yaya.

¹⁵Yaya ū kūbiza munhū ng'hūnga wa kūja akwibanda bandaga kūkūngīla kaya ya ntūngīlīja, yaya ū kūnkenaagūja ū wikalo bokwe,

¹⁶Nguno ū munhū ntūngīlīja nūūlū akagwa ng'hangala mpungatī, akabūūkaga hangī; alīyo a ba malofu ū būbi būkabasagalīkaga gete.

¹⁷Ū ng'wanishi wako ūlū ūgwa yaya ū bebe ū kūdoosa, nūūlū akipama ūtizūyega ū mu ng'holò yako.

¹⁸Nguno ū SEEBA akūbona akolwe abūgalūche ū būpelanu bokwe wīnge ū kūlī munhū ng'wenūyo.

¹⁹Yaya ū kūfung'wa ng'holò kūlwa nguno ya banhū ba malofu, yaya nūūlū kūbīītīla wilu a banhū babūbi.

²⁰Nguno ū wa malofu atī na sha kwisagīlwa ūko būjiiwa, nīyo ī tala ya munhū wabūbi Īkūjimiwa.

²¹Ng'wanone, ng'ogohage ū SEEBA, nū ntemi ūnkūje, yaya ū kwisangīja na banhū ba magalū galū.

²²Nguno a mayanga gabo gakūbikīīla mu kwifumbūkīja; nani ūyo amanile a babīlī benabo badūgije kwenha būkenaagūji kī?

²³Aka nako kahayīle ka banhū ba masala: Ū kūbiza nsolaanhya mu kalamulīle Ītī chiza.

²⁴Ū wa kūng'wila nkenaagūji gīkī, “Ūtī na būbi,” akadūkīlagwa na banhū, na a mahanga gakankolagwa.

²⁵Alīyo a bahami ba bakenaagūji Īkūbabeelela ī mihayo yabo, hama ningī jikūbizīīla.

²⁶Ū kūng'winha munhū ishosho lya ng'hana, īlī kūng'olekeja būtogwa, gītī kūmbipa kū nomo.

²⁷Ībeejage ī milīmo yako ya hanze, ūgagolanye chiza a malaale gako, hanuma ya henaho ūzenge Ī numba yako.

²⁸Yaya kūfunya būkaanīji kūlwa kūntūūla nzenganwa mu makoye na nguno ītīho, hama yaya kūgūtūmamīla ū nomo gwako kūlembekeja banhū.

²⁹Yaya nūūlū kūhaya gīkī, “Nakūng'wītīla gīt'ūmo wanīītīlile ū wei; nane nakūnīpa īyo wanīītīlile.”

³⁰Naabītile bbihī na ngūnda go munhū ng'winogolelwa hangī agehelilwe witegeleja; nūbīta nalīgwikilimbīja, gwalī ngūnda gwa mizabibu;

³¹alīyo gwalī gwasakaalīla ming'hwa pye a hose, pyī ī sī yalī yakundīkījiwa yīnza; gwalī gūpīndīlījiwe ndūgu ya mawe, nayo yalī īkambagūkile.

³²Ū kūfuma ū mu yenīyo nakibūūja no ū mu ng'holò yane; aho nībona yūnilanga mhayo:

³³Bebe, laala laalaga ka kanza, shūūtūlaga ho kakanza, kunaga hado a makono wifuule.

³⁴Alīyo ū būhabī būkūkūsanga gītī kūsangwa na ng'wiboneeji, nū būkuneese gītī ng'wanishi alī na shilanga mu nkono.