Read Sukuma Bible 2015 – Bibilia Ilagano Lya Kale 2015 Sumo 26 Bible Online

Sumo 26 - Sukuma Bible 2015 – Bibilia Ilagano Lya Kale 2015 bible

Sumo 26

¹Ūmo seluji ītigeleelilwe mu shikū ja līīmi isebu, nī mbula ītigeleelilwe mu magesa, h'ūmo īlī nū munhū mbūūlī, nang'hwe atigeleelilwe ikūjo.

²Ūmo gulumambī īkiyūngūūlīlaga ng'wigūlya, nūūlū tūjū ūmo īkatūlanījaga kuluba jayo; nī lizumo īlo lītī mu ng'hana līlī gīko, nalyo lītalembeelaga.

³Ī falasa īmanilwe tambū, hama ī nzobe īkanyamulagwa bo lijaamu mu nomo; lelo ū ngongo gwa mbūūlī gwene gūmanilwe nang'ha.

⁴Ū mbūūlī yaya kūnshokeja mhayo kūlenganīla na būchilū bokwe, nguno nang'ho ūkūbiza gīt'ūmo alī ū we.

⁵Ū mbūūlī nshokejage gīt'ūmo būlī ū būchilū bokwe, ūlū ītī chene akwibona ng'wenekīlī gīkī alī na masala.

⁶Ū wa kūtūma nhūng'wa mu nkono gwa mbūūlī, akibbutaga magūlū gakwe wei ng'wenekīlī, na akiyingījaga mu mayanga.

⁷Ūmo gatī na nīmo magūlū ga nemehazu, h'ūmo lūlī nū lūsumo lwa kūfuma mu nomo gwa mbūūlī.

⁸Ū mbūūlī ū kūng'winha ikūjo, Ītikīlile na kūtunga iwe mu lūtaago.

⁹Lūsumo kūfuma mu nomo gwa mbūūlī lūtikīlile na ling'hwa līlī mu nkono gwa nkolwa walwa.

¹⁰Ū wa kūlagana nīmo na mbūūūlī nūūlū na mīti ose ose, atikīlile na nasi wa kūlasa sagala sagala na kūlabūla banhū mu būtūdīlīla.

¹¹Ūmo mvwa īkashokelaga kūlya malūki gayo, nū mbūūlī akashokaga gīko ū mu būchilū bokwe.

¹²Wabīta kūmona ūyo imanile wei ng'wenekīlī gīkī alī na masala? Hambū hambū ū mbūūlī, nguno ū mulī ng'wene ūdūgije kūkunga ka kwisagīlwa nūūlū ka ngota, kūtinda ū mulī ng'wenūyo.

¹³Ū ng'winogolelwa akahayaga, “Īlīho shimba ū mu nzīla; shimba yasalile īkwikalaga yūpogoma mu mapanda!”

¹⁴Ūmo lwigī lūkagalūka galūkaga lūlī ha bawaba jalo, nū ng'winogolelwa gīko, akūmanūgalūka galūka dūhū a ha būlīīlī bokwe.

¹⁵Ū ng'winogolelwa ashikile kūchima ū nkono gwakwe ū mu shiseme sha shilīwa, alīyo ūlemeelwa ū kūgūbūūcha kūgwenha ū kū nomo!

¹⁶Ū ng'winogolelwa imanile wei ng'wenekīlī gīkī alī na masala, kūtinda nūūlū banhū mpungatī abo bakashoshaga mu witegeleja.

¹⁷Ū wa kwiyingīja mu yombo Ītang'wigeleelilwe, atikīlile na munhū wa kūdutūūla matū ga mvwa ītī yakwe.

¹⁸Ūmo munhū atūgije akaponangījaga mashitinde ga moto na masonga ga būsūngū bo kūbūlaga,

¹⁹h'ūmo alī nū munhū wa kūnembagūla nzenganwa ng'wiye; hūna ong'wīla, “Naalūchembaga ka koocha dūhū!”

²⁰Ūlū jitīho ng'hwī ū moto gūkajimaga, ūlū būtīho būsīīgani ū wilemeelwa būkashilaga.

²¹Ūmo galī a makala ū kū moto, nū mumo jilī ng'hwī kū moto, h'ūmo alī nū munhū wa yombo ū mu kūsoosela wilemeelwa.

²²Ī mihayo ya nsīīgani minonu gītī nhonge yachaajaga mu būūkī, īkang'wingīlaga ū munhū yanwengeela.

²³Ūmo būlenji wiza būkabilagwa higūlya ya shiseme sha malongo mabi, h'ūmo gūlī nū nomo ūyo gūkafunyaga mihayo mikondooku alīyo ī ng'holò mbi.

²⁴Ū ng'wanishi akibisaga mu nzīla ya kalūngalūngīle kakwe, alīyo gashi ū mu g'holò yakwe abīīkile būlomolomo.

²⁵Nūūlū īnone na kinehe ī mihayo yakwe yaya ū kūnzunīlīja, nguno ū mu ng'holò yakwe shilīmo sha malofu mbika mpungati.

²⁶Ū wanishi bokwe nūūlū būkabiza wibisile mu nzīla ya nyasala sala, alīyo ū būbi bokwe būkwigengeleka dūhū ū mu banhū.

²⁷Ū munhū ūlū ūsīmba ichango akūgwīla mo wei ng'wenekīlī, nūūlū munhū ūhadīka kūpilingitya iwe itaale, līkūpilingita līshokile lize līng'hine wei ng'wenekīlī.

²⁸Ū lūlīmi lūhwahwa lūtabatogilwe abo lūkabaminyaga, nū nomo gwa mihayo mikondooku ya kūgīmbīlīja gūkabeejaga būkenaagūji būtaale.