Read Sukuma Bible 2015 – Bibilia Ilagano Lya Kale 2015 Sumo 28 Bible Online

Sumo 28 - Sukuma Bible 2015 – Bibilia Ilagano Lya Kale 2015 bible

Sumo 28

¹Ū nkenaagūji akabulugutaga nhambo nūūlū atīho mpeeja, alīyo a batūngīlīja bashisha ng'holò gītī shimba.

²Ī sī ūlū yūkwīja bagome īkakwījaga a basugi, alīyo ūlū īlī na munhū ng'witegeleja na mani, īkwikala mu būlembeezu.

³Ū nsugi wa kūluhya bahabī, atikīlile na mbūla ya nyaga īyo īkalekaga yakenaagūla shilīwa.

⁴Abo bakaponyaga ī shilagīlo bakabakumīlījaga banhū ba malofu, alīyo abo bashidimile ī shilagīlo bakabalemejaga ī yabo.

⁵A banhū babūbi batawitegelegije ū būtūngīlīja, alīyo abo bakankoobaga SEEBA babūmanile ūmo būlī gete.

⁶Hambū hambū munhū ng'habī ūyo shimīzīle yakwe ītī na shilingo, kūtinda nsabi ūyo nzīla jakwe jilī jabūbi.

⁷Ūyo akadimaga shilagīlo ng'wene ng'wana wa masala, alīyo ū wa kūdimana na balaku akangoolaga ū ise.

⁸Ūyo akakwījaga sabo mu nzīla ja būnyeecha, akajibilingaga kūlwa kūnekela ūngī, ūyo alī na shigongo kū bahabī.

⁹Ū munhū wa kwichibīja matū kū shilagīlo, ū ng'wenūyo nū kūlomba kwakwe kwa malofu.

¹⁰Ū wa kūbatongeela batūngīlīja mu nzīla yabūbi, akūgwīla ū ng'wichongo lyakwe we ng'wenekīlī; alīyo abo batī na būbi bakwanukūla wingīji būsoga.

¹¹Ū nsabi ashikile kwibona wei ng'wenekīlī gīkī alī na masala, alīyo ū ng'habī ū ng'witegeleja andeebile ūmo alī gete.

¹²A batūngīlīja ūlū būsola būpyeni būkabizaga ho būyegi būtaale no, alīyo a babūbi ūlū būpandīka nguzu, a banhū bakibisaga.

¹³Ū wa kūbisa shibi shakwe Ītūbeela ī mihayo yakwe, alīyo ūyo ūshitambūūla na kūshileka akachīlagwa shigongo.

¹⁴Alī na ū munhū wa logohano kūlī SEEBA shikū jose, alīyo ū wa kūgang'hanaja ng'holò yakwe akagwaga mu mayanga.

¹⁵Ūmo īlī shimba ūlū īkūpogomaga, nūūlū ndūba īkūdadūkīlaga banhū, h'ūmo alī nū nsugi ng'hūga ū kū banhū abo batī na gwa kwīta.

¹⁶Ū nsugi ng'wiboneeji akabizaga agehelilwe witegeleja, alīyo ūyo atatogilwe kwanukūla sha kūfuma mu būnyeecha, akūlama shikū ningī.

¹⁷Ūyo adidohelilwe mu ng'holò īkī wabūlaga munhū, akūbiza wa kwikala akūpeelaga sagala kūshisha kūcha kwakwe; atizilonga ose ose wa kūnguna.

¹⁸Ū wa kashimīzīle katūngīlīgije akikalaga alang'hanilwe, alīyo ūyo nzīla jakwe jihūbīkile akūyagaala ajimīīle.

¹⁹Ūyo akūlīmaga ilaale lyakwe akūpandīka shilīwa shingī, alīyo ū wa kūdīīlīla mihayo dūhū būkūng'wikalīla ū būhabī.

²⁰Ū munhū nsanyiwa akīīlūkīlagwa ningī, alīyo ūyo akakoobaga būsabi bo wangū wangū atūkīja kūgwakūla nsango.

²¹Ū kwīta mhayo mu būsolanhya Ītī chiza, alīyo ū munhū ashikile kwīta ūyo gūtigeleelilwe gīkī apandīke nūūlū ka lūgūkūlū ka būgalī dūhū.

²²Ū munhū o lwahahi kū sabo alī na liso ibi, nīyo atiganikaga ī gīkī nang'hwe ashikile kūgwa mu būhabī.

²³Ūyo ūng'hama munhū, ū kū ng'halīlo akūpandīka mingī ī yawiza, kūtinda ū wa lūlīmi lūkondooku lwa kūgīmbīlīja.

²⁴Ūyo ūng'wiba shikolo ise nūūlū nina, ū kūnū akūhayaga gīkī, “Ū gwenūyū gūtī na būbi,” nkenaagūji ū ng'wenūyo.

²⁵Ū wa kūyūbapama biyī īkī igalīhīje akenhelejaga yombo, alīyo ūyo akansanyaga SEEBA Īkameelelaga ī mihayo yakwe.

²⁶Ū munhū wa kwisanya wei ng'wenekīlī mbūūlī, alīyo ū wa shimīzīle ya masala akapīlaga.

²⁷Ūyo akinhaga bahabī atūbiza na sha kūlula, alīyo ūyo ūlilimya miso gakwe ū kū bahabī akūdūkīlwa no.

²⁸A babūbi ūlū būpandīka nguzu, a banhū bakibisaga; alīyo a babūbi ūlū būyagaala, a batūngīlīja bakakwīlaga.