Read Sukuma Bible 2015 – Bibilia Ilagano Lya Kale 2015 Sumo 29 Bible Online

Sumo 29 - Sukuma Bible 2015 – Bibilia Ilagano Lya Kale 2015 bible

Sumo 29

¹Ūyo akūhūgūlagwa ng'hangala ningī alīyo ongeja kūdiimya ntwe, akahayagimanīla wakenaagūka, na'itīho nzīla ya kūpīlīla.

²A batūngīlīja ūlū būsuga, a banhū bakayegaga; alīyo a babūbi ūlū būsuga, a banhū bakadaayaga.

³Ū munhū ūyo atogilwe masala akanyejaga ū ise; alīyo ūyo anonije būsangī na bamalahya, mponanja o sabo jakwe ū g'wenūyo.

⁴Ū ntemi akīguzuhyaga ī sī yakwe mu nzīla ya būtūngīlīja; alīyo ūyo ayegelile būhongwa, akīsambaagūlaga wei ng'wenekīlī.

⁵Ū wa kūtūmamīla lūlīmi lūkondooku akwigīmbīlījaga kūlī nzenganwa ng'wiye, akitūūlīlaga ntego gwa kūngwasha mu magūlū gakwe.

⁶Ū munhū wabūbi akigwashaga we ng'wenekīlī kūlwa shibi shakwe, alīyo ū ntūngīlīja akīmbaga na kūyega.

⁷A batūngīlīja bīmanile īyo yigelile kwītīlwa a bahabī, alīyo a bahūnga batī nabo ū būdīlīji wenūbo.

⁸A banhū b'ibengwe bakenhelejaga wisaayīji mu nzengo, alīyo a ba masala bakīnjaga būpelanu.

⁹Ū wa masala ūlū bishisha kwibanza na mbūūlī, ū mbūūlī akikangīlaga na kwandya kūsondagūla, nī mhola ītīko kwilonga.

¹⁰A babūlagi ba banhū batantogilwe ū wa nhūngwa jigoloolile, alīyo a batūngīlīja bakakoobaga kūbūlang'hana ū būpanga bokwe.

¹¹Ū mbūūlī akabūkundūlīlaga pyī ū būpelanu bokwe, alīyo ū wa masala akilang'hanaga mu būlembeezu.

¹²Ū nsugi ūlū ūyikala adīlīlile mihayo ya balomolomo, akūbabona būbi pye a batūmami bakwe.

¹³Ū nsabi nū ng'habī balī na būsangī mu gīkī, a bose a miso gabo akaginhaga SEEBA ū kūbona.

¹⁴Ū ntemi ūlū ūbalamula a bahabī mu būtūngīlīja, ī lisumbī lyakwe lya būtemi līkūlama shikū ningī.

¹⁵Ī linasu lya kūhūgūlīla līkinhaga masala, alīyo ū ng'wana ūlū alekanījiwe akampondaga soni ū nina.

¹⁶A banhū babūbi ūlū būfuluma nī shibi shikafulumaga, alīyo bakūgwa a batūngīlīja balībabona.

¹⁷Ng'hūgūlage ū ng'wana wako akūkwinha būlembeezu, nī ng'holò yako akwīyeja.

¹⁸Aho katīho katongeelele ka ng'wa SEEBA, a banhū bakoyaga ū kwilang'hana, alīyo alī na ū wa kūshidima ī shilagīlo.

¹⁹Ū ntūmami atagoloolagwa bo mihayo gwike, nguno nūūlū ūyitegeleja atīko ū kūdīlīla.

²⁰Wabīta kūbona munhū ng'wiyangūhīlīja kūyomba? Hambū hambū ū mbūūlī, nguno ū mulī ng'wene ūdūgije kūkunga ka kwisagīlwa nūūlū ka ngota, kūtinda ū mulī ng'wenūyo.

²¹Ūyo ūneelehaja ntūmami wakwe kwīngīīla ha būnīgīnī bokwe, ū kū ng'halīlo yaho akūkoya nang'hwe.

²²Ū munhū mpelanu akasooselaga wilemeelwa, hama ū ng'wangū kūsaaya akīītaga mingī ī yabūbi.

²³Ū wikumīlīja bo ng'wa munhū būkang'wenhelejaga kūdalahwa; alīyo ū ng'widohya mu moyo akapandīkaga ikūjo itaale.

²⁴Ū wa kūnwaana na ng'wibi abūkolilwe ū būpanga bokwe, nūūlū ilahījiwe atafumbūlaga mhayo.

²⁵Ū kūbogoha banhū gūlī ntego ū gwenūyo, alīyo ūyo ūnsanya SEEBA akūlang'hanwa ikale mhola.

²⁶Bingī bakakoobaga kūnyeja nsugi, alīyo ū munhū īyo īng'wigeleelilwe akīpandīkaga kūfuma kūlī SEEBA.

²⁷A batūngīlīja babakolilwe abo batīmīīlile ha ng'hana; a babūbi nabo babakolilwe abo bīmīīlile ha ng'hana.