Read Sukuma Bible 2015 – Bibilia Ilagano Lya Kale 2015 Sumo 5 Bible Online

Sumo 5 - Sukuma Bible 2015 – Bibilia Ilagano Lya Kale 2015 bible

Sumo 5

¹Ng'wanone, gadīlīlage a masala gane, wīdegeleka chiza ī mihayo yane ya witegeleja,

²h'ūkūdūla kūbiza na kasolele ka masala, na a kayombele kako kakūbiza ka būdeeba.

³Nguno ū nomo gwa nkīma nshihani gūkasūlūlūchaga mihayo minonu gītī būūkī; na a kalūngalūngīle kakwe kakondooku kūtinda maguta.

⁴Alīyo ū kū ng'halīlo yaho nnūlū, leba nī ndūlū; hangī ng'ūūgī gītī lūshū lwa būūgī būbīlī.

⁵Ī mhambala jakwe jitūngīīlile ng'wicha; ī shimīzīle yakwe ītulumenhile kūja mu shigila.

⁶Ī nzīla ya būpanga atīyiganikaga; Ī nzīla jakwe jiigoma gomile, alīyo atamanile.

⁷Alilūūlū baana bane, igwagi gete; mutizūgalūka ng'wīleke ī mihayo īyo nalīmuganīla.

⁸Ū nkīma ng'wenūyo ng'widandage kūle ū mu shimīzīle yako; yaya ū kwegeela a ha nyango gwa numba yakwe,

⁹ūtizimanīla waponanjaga nguzu jako niiza kū bangī, na myaka ya būlamu wako kūlī ng'wiboneeji;

¹⁰Ī sabo jako jitizūliiwa bageni, nū būnoge wako būtizūsabya kaya ya munhū ūngī.

¹¹Ūkūlīla ū kū ng'halīlo ya būlamu wako, ū mīlī gwako nū būmunhū wako ūlū ūshika ha būkalīkījo.

¹²Ūkūyiwīla gīkī, “Ū kūtongwa naalī natatogilwe, nī ng'holò yane yalī īlemile ū kūhang'wa!

¹³Ū kwigwa ī lilaka lya balangi bane naalī nalemile, nūūlū ū kūbadegeleka a baganīji bane naalī nalemile.

¹⁴Al'ī haha angū naakiimalīlilwa mayanga madito mu būtongi w'ibità igima!”

¹⁵Bebe, ng'waga minzi ga mu lwinzī lwako; minzī ga kūfuma mu lwinzī lwako bebe ng'wenekīlī.

¹⁶Nibūlī ī nzwīlo jako jiyūseja minzī sagala na kū mapanda, ī myongo yako īyūseesekela na kū magūlilū?

¹⁷Ī jenījo jako iyene dūhū, jitī ja kūsangīla na babīti.[3]

¹⁸Ū lūzwīlo lwako lwa minzī ni lwīlūkīlagwe mbago, yegaga na nke wako o ha ng'wlūko gwako.

¹⁹Ū ng'wenūyo alī na būtogwa wingī no gītī nja, nsoga gītī laala; Ī mbeele jakwe jikūyeje shikū jose, ū būtogwa bokwe būkūdute pye a makanza.

²⁰Ng'wana wane, nibūlī ūdutwe na nkīma nshihani? Ni kinehe wikale ūkūkumbataga shikuba sha nke wa munhū ūngī?

²¹Nguno ī nzīla ja munhū jilī hape ū kū būtongi bo miso ga ng'wa SEEBA, akajibonaga pyī ī nzīla jakwe.

²²Ī nhūngwa mbi ja munhū wabūbi jikangwashaga wei ng'wenekīlī; ngoye ja shibi shakwe jikang'witaligīnjaga.

²³Akūyagaala kūlwa kūduuma kwilang'hana, kūnū akūjimīījiagwa būchilū bokwe būtaale.