Read Sukuma Bible 2015 – Bibilia Ilagano Lya Kale 2015 Sumo 7 Bible Online

Sumo 7 - Sukuma Bible 2015 – Bibilia Ilagano Lya Kale 2015 bible

Sumo 7

¹Ng'wanone, īdimage ī mihayo yane; nī shilagīlo shane wikale nasho mu ng'holò yako.

²Shidimage ī shilagīlo shane ūkūlama, ūgalang'hane a malange gane gītī mboni ya liso lyako.

³Gatungage ū kū nzwala jako; ūgandīke mu ng'holò yako.

⁴A masala gawīlage gīkī, “Ū bebe ūl'ilūmbū lyane,” ū witegeleja nabo wilīkage gīkī ng'wanong'wing'we.

⁵Ī shenīshi shikūkūlang'hana ū kūlī nkīma ū nshihani na ng'wīmīlīzu; ū wa mihayo ya kūkonga konga,

⁶Lwise lūmò naalī mu numba yane, aho nasūūla kūbītīla h'idilisha,

⁷nūbabona bamò abo baalī batūgije; ū mu basūmba benabo ūmò wabo nūmona walī agehelilwe masala.

⁸Nguno walī alolile kwipanda lyalī na kuluba bbihī nū kūko wikalaga ū nkīma ng'wenūyo; ū nsūmba washimīzaga alījīlīīla ū kū numba yakwe,

⁹nīyo yalī mhīndī, ikanza lya ka munhū ūyo; giiti sha būjikū shandya kwingīla,

¹⁰Kwimanīla wapuluka nkīma kūnsūng'wanha ū nsūmba ng'wenūyo, ū ng'wenda wiza agwitungile shimalahya; walī abisile mhayo mu ng'holò.

¹¹(Ū nkīma ng'wenūyo ng'halalī, hangī alī na ng'haani no; atalembeejaga magūlū mu kaya;

¹²būlī kwene alīko alīgimha gimha ūkūngīla, ībize kū mapanda, kū magūlilū, na kū nhūng'wanhīlo ja mayīla!)

¹³Hūna ū nkīma ng'wenūyo ūng'haja ū nsūmba, ūmbipa na kūcha soni yaya; hama ūng'wila gīkī,

¹⁴“A ha ng'wane shilīho shitambò sha būsangī; lelo nashikīlījaga shilahīlo shane.

¹⁵H'ī chene niza kūkūsūng'wanha, nakūkoobaga no, nose naakūpandīka!

¹⁶A ha būlīīlī wane nambaga myenda ya būlenji būsoga, ya kitaani ya kūfuma Misili.

¹⁷Nīyo ū būlīīlī wane nabūseseebelaga malashi ga būlī mbika[4] ga ng'waso soga.

¹⁸Alilūūlū, nzūgū tūbūlūmbe ū būtogwa būjikū pe, tūbūyegele ū būtogwa wise gīt'ūmo tūtogelilwe.

¹⁹Ū ngoshi wane atīho a ha kaya Ī haha, wajile lūgendo lwa kūle.

²⁰Wajile na mfuko gwakwe gwa hela, a ha kaya akūshoka ū ng'weji gwakangile ngūkū.”

²¹Ū nkīma ng'wenūyo ūng'hūmbūūla ū nsūmba kūlwa mihayo yakwe ya kwilīja līja; ūnkonga konga mu kalūngalūngīle kakondooku.

²²Kwimanīla ng'hana wanondeela gītī nzīkū ījile kūsīnzwa; gītī laala yapanda mu lūtu,

²³kūshisha kūlaswa isonga lya kūpulung'hanya ng'witīma; ūbiza gītī noni īkūlalaga ījile mu ngono, ndūhū nūūlū kwitegeleja gīkī akūjimīīja būpanga bokwe.

²⁴Alilūūlū baana bane, nigwagi; īdīlīlagi īyo nalīyīhaya.

²⁵Mutizūzunya ī ng'holò jing'we jigalūkīle nzīla jakwe, nūūlū mutizūhūbīla mukashimīzīla mu mapanda gakwe.

²⁶Nguno abo wabagwasha na kūbagwisha bīngī no, abo wababūlaga bal'ibità itaale.

²⁷Ī numba yakwe līl'ikūūwa lya kūja mu shigila, lya kūtulumenha kūja kū ng'hambī ja lūfu.