Read Sukuma Bible 2015 – Bibilia Ilagano Lya Kale 2015 Sumo 9 Bible Online

Sumo 9 - Sukuma Bible 2015 – Bibilia Ilagano Lya Kale 2015 bible

Sumo 9

¹A masala gīzenga ī numba yago, gūpalala na ng'hīngī jayo mpungatī.

²Gaasīnzile n'itono gūūswīza na divai yawiza, ī haha ī shilīwa shilī ha meza shitengile.

³Gaasambaajaga hose hose batūmami baago bakīma, a goi gal'ū mu nzengo h'ipandī lya higūlya gakūhīlīkaga,

⁴Abo bagehelilwe masala galībawīla, “Abo batūgije ni bizage kūūnū pye a bose.”

⁵“Nzūgi mulye shilīwa sha ha ng'wane, mung'we na divai naswīzile.

⁶Lekanagi nalo ū lūtūgà lwing'we hū mukūlama, shimīzīlagi mu nzīla ya witegeleja.

⁷Ū wa kūng'hūgūla munhū wibengwe akagwaga mu magooke; nū wa kūng'hūgūla wa malofu Ī ng'halīlo yaho kūdūkīlwa.

⁸Ū munhū w'ibengwe yaya ū kūng'hūgūla nguno akūkūkolwa; ū wa masala ng'hamage, ū ng'wene akūkūtogwa.

⁹Ū munhū wa masala ntongage, akongeja kūbiza na masala; ū ntūngīlīja nangage, akongeja ū mu būmani bokwe.

¹⁰Ū logohano kūlī SEEBA hū wandījo bo masala; ū kūng'witegeleja ū Ng'wela, hū būdeeba bo ng'hana.

¹¹Hama ī shikū jako jikūkwīla kūlwa nguno yane, nū būlamu wako būkongejiwa ī myaka.

¹²Ūlū ūlī na masala, a masala gako gakūkūnong'ha, alīyo ūlū ūlī n'ibengwe ūkwiminya bebe ng'wenekīlī.”

¹³Ū būchilū būbange gītī nkīma ng'halalī hangī atūgije, hama atamanile mhayo gose gose.

¹⁴Akigashaga ha nyango gwa numba yakwe; ī lisumbī lyakwe alītūūlile ū mu nzengo h'ipandī lya higūlya,

¹⁵akikalaga ūbahīlīka a babīti, abo balī mu ng'endo jabo.

¹⁶Abo bagehelilwe masala akabawīlaga gīkī, “A ba lūtūgà nzūgi kūūnū pye a bose.”

¹⁷A minzī ga kwiba manonu no; nī shilīwa sha kūlya mu wiba wiba shawiza!

¹⁸Kwike batamanile gīkī ū mu numba yakwe balīmo bafu, nī gīkī a bageni bakwe balī mu shigila ng'wichongo ishimu.