Read Sukuma Bible 2015 – Bibilia Ilagano Lya Kale 2015 Nomeji 1 Bible Online

Nomeji 1 - Sukuma Bible 2015 – Bibilia Ilagano Lya Kale 2015 bible

Nomeji 1

¹Mihayo ya Nomeeji, ng'witūnja o ng'wa Daūdi, ūyo walī ntemi mu Yelusalemu.

²“Ndūhū ngofyoolo! Ndūhū ngofyoolo!” Ū Nomeeji alīhaya gīkī, “Ndūhū ngofyoolo nūūlū hado!” Būlī mhayo gūtī na ngofyoolo!

³Ū munhū akapandīkaga solobo kī ū kūfuma ū mu milīmo yakwe īyo akīkoya koyelaga ha sīlīlī ya līīmi?

⁴Shibyalīlwe na shibyalīlwe shikiyīngīlaga, ūlū shabīta īshi shiiza shingī. Alīyo ī sī īlī gīt'ūmò īkikalīlaga na kale dūhū.

⁵Ī līīmi nalyo līkafumaga na līkalokaga, līkihuutaga kūshoka hangī ūko līkafumīīlaga.

⁶Ū nyaga gūkahembaga gūjile dakama, hūna gwashokanya sukuma hangī, ū mu lūgendo lwago gūkipīndīīlaga gīko dūhū būlī gwa.

⁷Pyī ī myongo īkahūūmaga ītūngīīlile mu nyanza, alīyo ī nyanza ītokalaga nūūlū hado; a minzī ga mu myongo gakahūūmaga gashokile hangī ūko gakafumaga.

⁸Pyī ī mihayo īkayeechaga na kayeekeje kangī nako, ako atīho munhū wa kūdūla kūkasomboola. Ī liso lītoyaga ū kūnoneelwa ū kūlola, nū gūtū nago gūtigejaga ū kūdegeleka.

⁹Īyo īlīho ī haha īkwilonga hangī dūhū, nī yīyo yamala kūbeejiwa īkūbeejiwa hangī; gūtīho mhayo mpya a ha sīlīlī ya līīmi.

¹⁰Angū, shilīho shikolo īsho munhū adūgije kūhaya gīkī, “Ūlīshibona ī shenīshi, shipya”? Nguno shilīho dūhū kwīngīīla kale, shalīho na a haho tūtaalī kūbiza ho a bise.

¹¹Īyo yamala kūbīta atīho wa kwīyizūkwa, nī yīyo īliza kū shikū ja kū būtongi, ūlū yūlinda yūbīta batīyizūkwa a ba shibyalīlwe īsho shikūlondeela.

¹²Ū nene Nomeeji naalī ntemi wa Baisilaeli mu Yelusalemu.

¹³Naalī nifunya mu būshikanu bose kūtūmamīla masala, nīlole mu welwa ng'holò, na kwīgīsīlīja pyī īyo īkīītagwa ha sīlīlī y'igūlū. Ū Mulungu abahelelile nigo ndito no a banhū!

¹⁴Nībona pyī īyo īkīītagwa ha sīlīlī ya līīmi, ndūhū mo gete ū gwa kūsola, īlī gītī kūpeeja lūyaga dūhū!

¹⁵Īsho shichaama chaamile shitī na būgoloolele; hama īsho shitīho, ndūhū ū kūshiisaaba.

¹⁶Hūna nandya kwiganika nakwiwīlaga, “Yū ūlū a masala dūhū, a gene naagabbakīgije; nīyo kūbaheeba pye abo baalī basugile ū mu Yelusalemu aho nataalī kūbiza ho ū nene. Na a maganiko gane gīībītīlile mingī no, nose ī haha nalī na masala na witegeleja būtaale kīngī nasho.”

¹⁷Hūna nandya kwideedeng'hanya ū mu maganiko gane nagamane ūmo galī a masala, nū lūtūgà, nū būbbūūlī. Alīyo nūbona gīkī, nū gwenūyū nago gūtikīlile na kūpeeja lūyaga!

¹⁸Nguno ū mu kūkwīja masala, nū būpīna būkiyongejaga. Ū kūbiza na būmani būtaale, hū kwiyongegeja na a makoye.