Read Sukuma Bible 2015 – Bibilia Ilagano Lya Kale 2015 Nomeji 4 Bible Online

Nomeji 4 - Sukuma Bible 2015 – Bibilia Ilagano Lya Kale 2015 bible

Nomeji 4

¹Aho naalola hangī nūbūbona pyī ū wiboneeji ūbo būkīītagwa ha sīlīlī ya līīmi. Nūshibona ī shisoji sha banhū abo biboneelagwa, alīyo baalī batī na wa kūbalūngūja, nguno a biboneeji h'abo baalī na būdūla; kwike nabo baalī batī na nūngūja.

²A henaho nūhaya hape gīkī, Ī gete a bafu abo baacha balī hambū hambū, kūtinda a bapanga, abo bataalī bapanga.

³Alīyo ūyo alī hambū hambū kūbatinda pye a bose alī ūyo ataalī kūbiza ho, ūyo ataalī kūbūbona ū būbi ūbo būkwītagwa ha sīlīlī ya līīmi.

⁴Hama hangī nūbona gīkī gashi pyī ī milīmo nū būmani bo kūbeeja shikolo būkenhelejiagwa na munhū kūng'wītīla wilu nzenganwa ng'wiye. Ū gwenūyū nago gūtī na solobo, īlī kūpeeja lūyaga dūhū.

⁵Ū nchilū akikalaga wakunaga makono dūhū kūnū akwiminyaga wei ng'wenekīlī.

⁶Hambū hambū kūbiza na tūgehu twa mu lūpī dūhū kūnū ūlī mu būlembeezu, kūtinda maganda abīlī kūnū ūkūluhaga, na ūkūpeejaga lūyaga.

⁷Nūbona na mhayo gūngī a ha sīlīlī ya līīmi, nago gūtī na ngofyoolo gete:

⁸Alīho munhū ūngī akikalaga iyene sūlūgūtū, atī na ng'wana, nūūlū atikalaga na ndūgūye. Alīyo atamalaga ī milīmo, Ī liso lyakwe lītafulaga ī sabo; na lūūlū atibūjaga nūūlū hado gīkī, “Ī gete nakūnojiagwa milīmo kūlwa ng'wa nani, nose natūbūlūmbaga nū būpanga bone?” Ū gwenūyū nago gūtī na solobo, hama nīyo gūlī mhayo mi no!

⁹Hambū hambū kwikala babīlī kūtinda iyene, nguno ī mheela ya būnoge wabo īlī niiza.

¹⁰Ūlū būgwa, ūmò wabo adūgije kūngūngūmūla ū ng'wiye. Lelo ū wa kūgwa alīyo atī na wa kūngunanha kūgūngūmūka, ū ng'wenūyo alī mu kwihīga kūtaale no!

¹¹Hama a banhū a babīlī ūlū būlaala dege bakilūngūjaga, alīyo akūlūngūja kinehe ūyo alī iyene?

¹²Ū munhū ūlū alī iyene adūgije kūheewa na ng'wanishi, abo balī babīlī bashikile kwigunanha; nū lūguuta ūlū lūbbasīlwe bo ngoye idatū lūdatīnīkaga wangū.

¹³Ū ndinha wa masala, nūūlū akabiza ng'habī alī hambū hambū kūtinda ntemi namhala ūlū mbūūlī, na alemile kūganikīlwa.

¹⁴Ū ndinha adūgije kūbiza wafumile mu jeela, hūna wigasha a ha būtemi, nūūlū abyalilwe mu kaya ya nyahabī ū mu sī ya būtemi bokwe.

¹⁵Nakabona gīkī pye a banhū a bapanga abo baayeela yeelaga ha sīlīlī ya līīmi, baalī hamò nū ndinha ū ng'wingīji wa ha būtemi.

¹⁶A banhū a bose abo baalī batogilwe abasuge baalī bingī no, batī na būkalīkīle. Alīyo abo bakiza hanuma yaho batanyegelile ū ng'wingīji. Ū gwenūyo nago gūtī na ngofyoolo; gūlī gwa kūpeeja lūyaga.