Read Sukuma Bible 2015 – Bibilia Ilagano Lya Kale 2015 Nomeji 6 Bible Online

Nomeji 6 - Sukuma Bible 2015 – Bibilia Ilagano Lya Kale 2015 bible

Nomeji 6

¹Naabūbonile na būbi būngī a ha sīlīlī ya līīmi, ūbo būbabunile a banhū.

²Ū Mulungu ashikile kūng'winha ū munhū sabo, būsabi, n'ikūjo; ūbiza atī na sha kūlula, īsho būpanga bokwe būshikalalilwe. Alīyo hangī ū Mulungu ashikile kūngobba ū būdūla wa kūshiyegela; nose akūshileka shilūmvwe na ngeni. Ū gwenūyū gūtī na ngofyoolo gete, hangī mi no.

³Ū munhū ashikile kūbyala baana'igana, hama ūlama myaka mingī; alīyo h'ūmo akwīgīje ī shikū ja būlamu ū mu sī, ūlū atashilūmbile ī shawiza īsho wibilingīla, hama na h'ikanza lya kūjīkwa ūponyiwa sagala sagala dūhū; ū neene nalīhaya gīkī, ī nda ya kūkenaagūka īlī hambū hambū kūtinda ū ng'wenūyo.

⁴Nguno ī nda yenīyo īkwiza alīyo ndūhū gwa kwisagīlwa, hama īkūfuma ījimīīlīle mu giiti, nī lina lyenīlo līkūfukīīlwa mu giiti.

⁵Ī yoi ī chene ītalībonīle ī līīmi, nūūlū ni kwitegeleja shose shose dūhū yaya; alīyo īlī mu kwifuula kūtinda ū ng'wenūyo,

⁶ū wa kūbiza nūūlū na būlamu wa myaka shihūmbī ng'hangala ibīlī, alīyo wilewa ū kūshilūmba ī shawiza īsho wibilingīla. Angū, ītī gīkī pye a banhū bakajaga kwipandī līmò dūhū?

⁷Pyī ū būnoge bo ng'wa munhū būlolile ha sha kūtūūla mu nomo dūhū, alīyo ī ng'hūmbū ja shilīwa atamalaga.

⁸Ī gīsī ū munhū wa masala ankīlile mu kinehe ū mbūūlī? Ū ng'habī nūūlū akabiza na būdūla bo kwilang'hana kū būtongi wa banhū, akūpandīka solobo kī?

⁹Īlī hambū hambū ī liso līshibalade Īsho ūlī nasho, kūtinda kūkoyiwa mhayo gwa kwikūmvwa. Ū mhayo gwenūyo nago gūtī na ngofyoolo, gūlī gwa kūpeeja lūyaga dūhū.

¹⁰Būlī shikolo īsho shilīho shilī na lina kwīngīīla kale, hama nī mihayo ya ng'wa munhū īmanīkile ūmo īlī; atadūgije kwilwisha nū yūyo ankīlile nguzu.

¹¹Angū yaloma no ītalūkaga chanjo; Ī yenīyo īkūngunanha kī ū munhū?

¹²Nguno nani amanile yawiza kūlwa ng'wa munhū aho ataalī mu shikū jakwe ī ngehu ī ja būpanga būtī na solobo, ūmo akūbītaga gītī ng'wengeeji? Hangī nani ūyo adūgīje kūūmanīīkīja ū munhū mihayo īyo īkwilonga a ha sīlīlī ya līīmi ūlū lyūbīta ī likanza lyakwe?