Read Sukuma Bible 2015 – Bibilia Ilagano Lya Kale 2015 Nomeji 9 Bible Online

Nomeji 9 - Sukuma Bible 2015 – Bibilia Ilagano Lya Kale 2015 bible

Nomeji 9

¹Hūna lūūlū, pyī ī yenīyī nakītūūla mu ng'holò yane; aho nīyideedeng'hanya nūbona gīkī a batūngīlīja na a bamasala balī mu nkono go ng'wa Mulungu, pyī nī yīyo bakīyītaga; alīyo atīho ūyo amanile īsho shinindīīlile, būbize būtogwa nūūlū būsaayīlwa.

²Nguno a bose ī mihayo ībalindīīlile mu būlenganīja; babize batūngīlīja, nūūlū babūbi, bawiza nūūlū beela, nūūlū basoso; abo bakafunyaga shitambò, na a babo batashifunyaga. Ūmo īlī ū kūlī munhū wawiza, Īlī gīko nū kūlī wa shibi; ūmo īlī kū banhū abo bakilahīlaga, Īlī gīko nū kūbo abo bogohile kwilahīla.

³Ū mu yose īyo īkūtūmamagwa ha sīlīlī ya līīmi, ū gwabūbi gete gūlī gīkī, ī mihayo īlī mu būlenganīja kū banhū bose. Nīyo nī ng'holò ja banhū jokalile ya malofu no, hama aho bataalī mu shikū ja būpanga wabo lūlīmo lūtūgà ū mu ng'holò jabo; alīyo a ha numa ya henaho bakajaga kū bafu baakisanja kwenūko.

⁴Kwike būlī ng'wene ūyo ataalī hamò na bapanga, alī na kwisagīlwa, nguno hambū hambū nūūlū ī mvwa ī mhanga, kūtinda shimba īchile.

⁵Nguno a bapanga bamanile gīkī bakūcha, alīyo a bafu batamanile shose shose; batī na mheela yīngī yose yose, nīyo baamala kwīwa.

⁶Ū būtogwa wabo nū kūkolwa kwabo, nū wilu wabo, pye shajimīīla kale; batī na gwa kwīta hangī ū mu yose Īyo īkīītagwa ha sīlīlī yī līīmi.

⁷Jaaga nayo īyo ūkīyītaga nakale, lyaga ī shilīwa shako ūshilūmbe, nī divai ng'waga na ng'holò nyegu; nguno ū Mulungu ayīyegelile īyo ūkwītaga.

⁸Būlī lūshikū zwalaga shizwalo shifulile sheela pe, nū ntwe gwako ūgūchaaje tūguta twawiza.

⁹Būyegelage ū būpanga wako pyī ī shikū ja būlamu ūbo būtī na solobo wenūbū, ūbo Mulungu akūgabīlile ha sīlīlī ya līīmi; yegaga hamò nū nke wako ūyo ūntogilwe; nguno ū gwenūyo h'ū ngabo gwako ū mu būpanga wako, nū mu milīmo midito īyo ūkītūmamaga ha sīlīlī ya līīmi.

¹⁰Ū nkono gwako ūlū gūpandīka shose shose sha kwīta, ītaga na būdūla wako bose, nguno ū kūlimu ūko ūjile ītīko milīmo; ndūhū nūūlū maganiko ga mbika yose yose, nūūlū būmani, nūūlū masala.

¹¹Hama naabonile na gūngī hangī a ha sīlīlī ya līīmi, gashi ī liishiga bo nhambo lītī lya bapeeji dūhū, nū mu būlūgū batapyenaga ba nguzu, nūūlū ī shilīwa batapandīkaga ba masala dūhū, nū būsabi būtabisongaga ba masala, nūūlū ū kūyegelwa na banhū kūtalondeelaga balangilwe; alīyo pye a banhū batikīlile, bose pye balī nalyo ī likanza, nū ng'wanya gwa kūpandīka gūkabizīīlaga a bose.

¹²Nguno nīyo a higūlya ya yenīyo, atīho ūyo alīmanile ī likanza lyakwe: Īlī gīt'ūmo ndīlo jikagwasījiagwa mu mitego mibi jitamanile, nūūlū noni ūmo jikapugījiagwa mu lūtu; na a banhū nabo gakabizīīlaga a makanza a mabi, yabitaligīnja mihayo mu būtūmana.

¹³Naabonile mhayo gūngī gwa koolecha masala a ha sīlīlī ya līīmi, gūniyeja no ū nene.

¹⁴Gwalīho nzengo ndoololo, gwa banhū bagehu dūhū; kwimanīla ntemi wa nguzu wiza kūgūdumīla, ūkoma ng'hambī ja kūgūpīndīlīja.

¹⁵Alīyo ū mu mzengo gwenūyo walīmo munhū wa masala, kwike walī ng'habī; ū munhū ng'wenūyo akagūpīja ū nzengo gwenūyo kūlwa masala gakwe. Alīyo atilongile ose ose wa kūng'wizūkwa ū ng'habī ng'wenūyo.

¹⁶Ū nene nūhaya, “A masala gajitindile ī nguzu.” Kwike a masala ga munhū ng'habī gadalahilwe, nī mihayo yakwe ītadūūkīlagwa.

¹⁷Ī mihayo ya munhū wa masala īkadegelekagwa mu būlembeezu, kūtinda hūhūyū ya nsugi wa babbūūlī.

¹⁸A masala masoga no kūtinda shilanga sha būlūgū, kwike ng'hūbi ūmò akakenaagūlaga mingī ī yawiza.