Read Sukuma Bible 2015 – Bibilia Ilagano Lya Kale 2015 Lyimbo lya ng'wa Solomoni 6 Bible Online

Lyimbo lya ng'wa Solomoni 6 - Sukuma Bible 2015 – Bibilia Ilagano Lya Kale 2015 bible

Lyimbo lya ng'wa Solomoni 6

¹Bebe nkīma nsoga kūtinda bakīma bose, ū Ntogwa wako ng'wenūyo wajaga halī? Watūngīīlaga halī ū ntogwa wako tūdimane nang'ho tūje tūkūnkoobaga?

²Ū Ntogwa wane watulumenhaga kū ngūnda gwakwe, galīko mandī wafuulīīla mbīyū ja shisanjo sha ng'waso gwawiza; alīdīīma na mitugo jakwe, kūnū ūyoba na bonji mu ngūnda.

³Ū nene nalī wakwe ū ntogwa wane, nū wei ū Ntogwa wane alī wane nene; a madaale gakwe akagadīīmīlaga mu bonji.

⁴Ntogwa wane ūlī nsoga no, ūbange gītī nzengo gwa Tiliza, ūlī ng'wiza gītī Yelusalemu; ūlī wa makanji gītī mabità ga bashilikale babūkīje mbembeela ja būlūgū.

⁵Hūngījaga kūngī a miso gako, ūlū wanilola galīnihūūganya, Ī nzwīlī jako jishibile chiza no, jūhelwa gītī madaale ga mbūli jikwikaga kūfuma Gileadi.

⁶A mino gako gabange gīt'idaale lya ng'holo jilīfuma koojiwa, ījo būlī yene ībyalile mabasa, ndūhū mo īyo īchīlilwe ng'wana.

⁷A matama gako masheeku gabūmbile chiza, ū mu sheela gakabonekanaga gītī nusu ja makomamanga.

⁸Na ng'hana ī chene balīho bagole makumi atandatū, na bakīma bangī bangī dūhū makumi anaane, a banhya nabo batī na būbalile;

⁹alīyo ū ng'hūūlū yane al'iyene, ū ng'wenūyo atī na shisembo; myalwa ūmò wike ū kūlī nina, nīyo nganja no ū kūlī myaji wakwe. A banhya aho bamona būng'haya afuuhilwe; a bagole na a bakīma ba ntemi a bangī būyūnkumīlīja.

¹⁰“Ū nkīma w'ihanga gīt'ikīngo lya dilū, na ng'wiseku gītī ng'weji, hangī ng'weku gītī līīmi ng'wenūyū ni nani? Nguno alī na makanji gītī mabità ga bashilikale babūūkije mbembeela ja būlūgū!”

¹¹Naalī naajile ū kū ngūnda gwa mitī ya shisuumo, kūjūlola īsho shikūzwaga mu malago; kūlola ūlū yandije kūsonga ī mizabibu, na a makomamanga ūlū gandije ū kūlaba.

¹²Alīyo nahayilimanīla ī ng'holò yane yayūtininhīla, nikūmvwa kūbiza mu magogoteni ga hikūlū lya banhū bane.

¹³Bebe shokaga, shokaga; bebe Nshulami, ka shokaga; ni washoka twize tūkwiloleele! Nibūlī mulītogwa kūng'wiloleela ū Nshulami ng'wenūyū, gītī kwiloleela mbina ya Mahanaimu?