Read Sukuma Bible 2015 – Bibilia Ilagano Lya Kale 2015 Isaya 1 Bible Online

Isaya 1 - Sukuma Bible 2015 – Bibilia Ilagano Lya Kale 2015 bible

Isaya 1

¹Īshi shilī shakoolechiwa kūlī Isaya ng'wintūnja o ng'wa Amozi, kūlwa nguno ya sī ya Yuda na nzengo gwa Yelusalemu, mu shikū ja batemi ba Yuda, ba, Uzia, Yotamu, Ahazi na Hezekia.

²Bing'we mapandī g'igūlū, igwagi! Bebe sī, degelekaga! Nguno ū Mulungu wahayile, “A baana naabalela nūbakūja, alīyo būnigomela.”

³Ī ng'ombe īndeebile ū ndīīmi wayo, nī nzobe īmanīle aho akīliisījaga ū nang'hani wayo; alīyo ū Isilaeli atamanile, a banhū bane batī na witegeleja.

⁴Ee, ihanga lya shibi lya banhū babunilwe būsoso, shibyalīlwe sha banhū ba shibi; baana abo bamanīīlile kwīta ya malofu. Bing'we abo ng'waneka ū SEEBA; ng'wandalaha ū Ng'wela wa Isilaeli, ng'ūgalūka ng'ūntegela ngongo!

⁵Nibūlī ng'wikale mukūtūlagwa? Nibūlī mutaalī mu būshitiigwa? Ū ntwe gūjimile magulaagīje, nī ng'holò ī yose īlemehalile.

⁶Ū mīlī ū gose gūjimile machūūbagūkīle, hatīho nūūlū hado aho halī mhola; kūfuma kū būpandījo bo lūpambala kūshisha kū londooji lwa ntwe malonda gike. Nīyo mabi no, gakūhūūmaga būfula; gatīnoojiwa nūūlū kūtungwa būgota, nūūlū kūchaajiwa maguta dūhū yaya.

⁷Ī haha ī sī ying'we īlī buyīkī, Ī mizengo ying'we īnogotejiwe moto. Ī migūnda ying'we īkūkenaagūlagwa na basembo ning'we mulīho mulolile, yatobangilwe yūlekwa pe gīt'ūmo bakīītīlaga biboneeji.

⁸Ū nshīke ū Sayūni walekilwe gītī ibuulya mu ngūnda gwa mizabibu, gīt'ipagale ha gatī ya shisasīla sha makūbī ga limbe, gītī nzengo gūgobanījiwe ha gatī ya mabità ga banishi.

⁹Ū SEEBA wa mabità ūlū ni atatūlekeelile bagehu tūpūlūgūke, ī haha ni tūlī gītī Sodoma, ni tūtikīlile na Gomola.

¹⁰Bing'we basugi ba Sodoma, gwigwagi ū mhayo go ng'wa SEEBA; banhū ba Gomola, degelekagi ī shilagīlo sha ng'wa Mulungu wise.

¹¹“A mashitambò ging'we na wingī genaya galī na solobo kī ū kūlī nene?” Alīhaya SEEBA. “Ī shitambò sha kūpemvwa īsho nakūfunījiagwa shiniigelilwe, Ī shitambò sha ng'ondi na a masazu ga mitugo ījo jadīīng'wa chiza jūgīna. A mininga ga nzagamba natī na būyegi nago, nūūlū a ga ng'holo songi, na a ga ngulyati.

¹²Ūlū ng'wiza kwiyoolecha kū būtongi wane, nani akūmukomigaga kūgwīta ū mhayo gwenūyū, ū gwa kūpandagīla mu mabīndo gane?

¹³Oyagi ū kūnenhela manong'ho gatī na ngofyoolo! Ū būbbani wing'we wa malofu no ū kūlī nene. Ī mihayo ya kūyegela Ng'weji mpya na kwikobya mu shikū ja Sabato, natūdūla ū kwiyūmīlīja nayo, nguno a malibilinga masoso no.

¹⁴A mashigukulu ging'we ga ng'weji mpya na a mashigukulu gangī ayo mugahelile, Ī ng'holò yane īgakolilwe; galī nigo ndito no ū kūlī nene, naanogile ū kūgiyūmīlīgīja.

¹⁵A bing'we nūūlū munambīle makono mukūnidayīīlaga, nakūgabisa a miso gane ū kū bing'we; nūūlū mukwīje mihayo ya kūnilomba natūmudegeleka yaya. Nguno a makono ging'we gadabbalanhile mininga;

¹⁶kalabagi ng'wele. Gīnjagi a mashītīle ging'we ga malofu noye kūgabona na miso gane. Oyagi ū kwīta ī yabūbi;

¹⁷ilangagi kwīta yawiza. Londeelagi kalamulīle ka wīmà, abo bakwiboneelagwa ng'ūbagunanha. Na a bapīna ng'ūbalwīlīīla; pyī na a bachīlwa[1] ng'ūbagunīja.

¹⁸“Alilūūlū nzūgi tūlomane,” alīhaya SEEBA. “Ī shibi shing'we nūūlū shikabiza shaza na kinehe, shikwela pe, gītī mawe ga mbulà. Nūūlū shibize shaza gītī mininga, shikūbiza shape gītī booya wa ng'holo yape.

¹⁹Ūlū ng'ūzunya na kwigwa, mukūshilya ī shizeeze sha mu sī;

²⁰alīyo ūlū ng'ūlema na kūgoma, mukūkenaagūlwa līlūshū.” Nguno ū nomo go ng'wa SEEBA hū gwene gwahayaga.

²¹Hīmba ni kinehe ū nzengo ūyo gwalī nsanyiwa gwabizile ng'wīmīlīzu gīko! Ī kwandya gwalī na būdeeba mu kalamulīle, nū būtūngīlīja h'ūmo wikalaga; alīyo ī haha gookalile babūlagi!

²²Ī feza jako jabizile būsoso, Ī divai yako yatūjiwe minzī.

²³Ī haha a basugi bako bagomi, hangī nīyo biye ba biibi, pye batogilwe kūhongwa, hama bakikalaga būmilīla mate sha kūnong'hwa. Batī na būgunanhi bose bose ū kū bapīna, nūūlū ī mihayo ya bachilwa batīdegelekaga.

²⁴Hūna lūūlū ū Seeba, ū SEEBA wa mabità, ū Wa Būdūla bose mu Isilaeli, Alīhaya gīkī, “Ahaa! Ū nene noyaga ū kwikala nūkoyiwa mihayo ya banishi bane, nakūbamalīla shiilī a bilwisha bane.

²⁵Ū nkono gwane nakūgūgalūcha gwilwishe ning'we, nakūbooja ū būsoso wing'we wīnge pyī ū bose, na a mako ging'we nakūgakulusūla geele pe gete.

²⁶Hanuma ya henaho nakūkūshokeja a balamuji bako, ūbize gīt'umo walī kwandya; na a baganikīji bako ūmo walī a ha wandījo. Hūna lūūlū ūkūyitanwa gīkī, Nzengo gwa būtūngīlīja, Nzengo nsanyiwa.”

²⁷Ī Sayuni īkūkomoolwa mu kalamulīle ka wīmà, a banhū baamo abo bakūgalūkaga bīnga mu shibi bakūkomoolwa mu nzīla ya būtūngīlīja.

²⁸Alīyo a bagomi na a bīīti ba shibi bakūkenaagūlīlwa hamò; hama abo bakūnekaga SEEBA bakūyagajiwa.

²⁹Hūna ī mitūndū īyo mukwīyegelaga Īkūmudimya minala, nī migūnda īyo mukwīlīmaga Īkūmuponda soni.

³⁰Nguno mukūbiza gītī ntūndū ūyo madūtū gago galīnyaala, gītī ngūnda gūtisīīlagwa minzī.

³¹Ū munhū wa nguzu akūbiza mbūpu gītī būneela, al'ū nīmo gwakwe gūkūbiza gītī masasi ga moto; hūna ī shose shikūligima moto, na atigela wa kūgūjimya.