Read Sukuma Bible 2015 – Bibilia Ilagano Lya Kale 2015 Isaya 12 Bible Online

Isaya 12 - Sukuma Bible 2015 – Bibilia Ilagano Lya Kale 2015 bible

Isaya 12

¹Ū mu lūshikū lwenūlo ūkūhaya gīkī, “Ee SEEBA, nakūkūkumīlīja, nguno nūūlū īkī walī ūnipelanīlile, alīyo ū būpelanu wako wagalūkile būnīngīla; wanilūngūgije.

²Managi gīkī, ū Mulungu hū ng'wene ūyo alī būpīji wane, hū ng'wene nakūng'wisagilwa, nose natīko kogoha; nguno ū SEEBA MULUNGU alī nguzu jane na lyīmbo lyane; hama nīyo wabizile būpīji wane.”

³Hūna kūlwa būyegi mukūyūdaha minzī kūfuma mu nzwinzī ja būpīji.

⁴Ū mu lūshikū lwenūlo mukūhaya, “Nkumīlījagi ū SEEBA, liitanagi ī lina lyakwe, Ī shītīle shakwe shisomboolagi kū mahanga, kumūchagi gīkī ī lina lyakwe līlī higūlya no.

⁵Ng'wīmbīlagi ū SEEBA nguno wītile mihayo misoga no; ū gwenūyū gūmanīke mu sī jose.

⁶Bing'we banhū ba Sayuni, hamukagi ng'wīmbe mu būyegi, nguno ū Ng'wela wa Isilaeli alī ntaale ū mu bing'we.”