Read Sukuma Bible 2015 – Bibilia Ilagano Lya Kale 2015 Isaya 13 Bible Online

Isaya 13 - Sukuma Bible 2015 – Bibilia Ilagano Lya Kale 2015 bible

Isaya 13

¹Mhayo ūyo Isaya, ng'witūnja wa ng'wa Amozi akagūbona, kūlwa nsango gwa sī ya Babuloni:

²Nunjagi lūbembeela higūlya ya lūgūlū lūkalamuku, mubakomeleje bingīle mu mibita ya bakūjiwa.

³Nene ng'wenekīlī naabalagīlile beela bane, nitanile bashilikale bane bashikīlīje kūlenganīla na būpelanu bone; hū bene abo babūyegelile ū būtindi wane.

⁴Alidegelekagi ū kū ngūlū, Īlīko yombo nhaale gītī yombo y'ibità itaale! Būdegelekagi ū wiyugūūji ūbo būlī mu mabūtemi, gītī mahanga gibilingīlaga ha lūmò! Ū SEEBA wa mabità alībilinga ibità kūlwa nguno ya būlūgū.

⁵Baliza kūfuma sī ja kule, bafumile kū būgelelo w'igūlū; ū SEEBA na shilanga sha būpelanu wakwe, alīyīkenaagūla pyī ī sī.

⁶Tūlagi ng'hūngū, nguno ū lūshikū lwa ng'wa SEEBA lwegelaga; lūkwizaga gītī būkenaagūji būfumile kūlī Ndūji wa shose![13]

⁷Hūna lūūlū kūlwa yenīyī, pye a makono gakūnogoleka, būlī munhū īkūbbaha ī ng'holò yakwe.

⁸Bakūgwīlwa lyogohya itaale, kūsaatwa kūtaale kūkūbadima, na kūminyiwa kwabūbi gītī kūlung'wa būsūngū; bakūyūlīla gītī nkīma akūlījiagwa būsūngū wa kūbyala, kūnū bakwilolaga boi na boi būshingisha mitwe bogohaga, hama ū būshū wabo wajilūkaga kīngī nasho.

⁹Managi gīkī, ū lūshikū lwa ng'wa SEEBA lūkwizaga, lūtī lwa shigongo, lwa būkalī, na būpelamu būtaale, lūliza kwīkenaagūla ī sī, na kūbayagaja a ba shibi abo balīmo.

¹⁰Nguno ī sonda ja ng'wigūlū, nī sha kwaka shamo ī shose, shitūfunya ī lisana lyasho; Ī līīmi līkūfuma līfīkījiwe giiti, nī lisana lya g'weji lītaaka.

¹¹Ī sī nakwīlamula kūlwa būbi wayo, na a ba malofu kūlwa būkenaagūji wabo; ū wikumīlīja wa badooshi nakūbūpyagūla būshile, nū wigīmba gīmbi wa bigūngūhya nakūwicha hasī.

¹²A banhū nakūbagehya no, Ībize shilambu ū kūbabona, shilambu kūtinda zahabu niiza, bakūgeha jigi kūtinda zahabu ja Ofili.

¹³Hūna lūūlū, ū mu lūshikū lwa kūbaka kwa būpelamu bo ng'wa SEEBA wa mabità, nakūlītinginya ī ligūlū; nī sī īkūsegejiwa a ha wikalo wayo kūlwa būpelanu bokwe.

¹⁴Bakūbiza gītī mhala īkūhwīmagwa, nūūlū gītī ng'holo jitī na wa kūjidīlīla; būlī ng'wene akūshoka kū banhū bakwe, būlī ng'wene akūpeelela kū sī ya ng'wawe.

¹⁵Būlī ng'wene ūyo ūpandīkwa akūching'wa lya mhulung'hanya, na pye abo bakūding'wa bakūbūlagwa bo līlūshū.

¹⁶A baana babo bakūyūtaalīkwa batandagūka balolile, ī shikolo sha mu numba jabo shikūsolwa, a bake babo bakwītīlwa ya minala.

¹⁷Managi gīkī nakūbasaja Bamedi babadumīle; banhū abo batakalalagwa feza, nūūlū zahabu batī na nīmo najo.

¹⁸Ū būta wabo būkūyagaja basūmba, nūūlū a beleele batūbachīla shigongo; nīyo ī liso lyabo lītūbalola mu kūbasaatwa a banīgīnī.

¹⁹Nzengo gwa Babuloni, ikūjo lya mabūtemi, wiza bo kwikumīlīgīja Bakalidayo; gūkūkenaagūlwa na Mulungu, gītī Sodoma na Gomola.

²⁰Gūtalikalīlwa na banhū hangī, nūūlū banhū batalazenga mo hangī kūshisha shibyalīlwe na shibyalīlwe; Ng'walabu ose ose atalakoma mo iheema lyakwe, nūūlū ndīīmi atalatūūgīja mo idaale lya ng'holo jakwe na hado yaya.

²¹Alīyo shiinū ja mu masaka jikūyikala jilambalalile mo, jikokala nyamhawa ū mu mafuluka; būkūbiza wikalo wa ging'hi, būyaga na ngūlūgūlū jikūyikala jikwikīndagūkaga moi.

²²Ū mu ng'hambī ja kūpīlīla banhū jikūyikala jikūhuumaga mo mbiti, na nyamhawa kwimookula ū mu manumba ayo gaalī ga makūlū. Ī ngelo ya nzengo gwenūyo yashikaga, Ī shikū jago jitongejiwa.