Read Sukuma Bible 2015 – Bibilia Ilagano Lya Kale 2015 Isaya 14 Bible Online

Isaya 14 - Sukuma Bible 2015 – Bibilia Ilagano Lya Kale 2015 bible

Isaya 14

¹Ū SEEBA akūnchīla shigongo ū Yakobo, akūbasola hangī a Baisilaeli abatūūle ū mu sī yabo. Na bageni bakwiza bikale mo, babize isangī līmò n'ī numba ya ng'wa Yakobo.

²Mahanga ga banhū gakūbagunanha ū kūshoka ū mu sī yabo. Hūna a ba numba ya Isilaeli bakwikala nabo a banhū ba mahanga benabo; bakūbiza basese babo bagosha na bakīma ū mu sī ya ng'wa SEEBA. Bakūbīīta kūbiza nding'wa abo baalī babadimile ī kwandya, bakūbasuga abo baalī baluhya babo.

³Ū mu lūshikū lwa ng'wa SEEBA kūng'wifuuja a bing'we ū mu būluhi wing'we, na a makoye ga wiboneelwa kūlwa būsese,

⁴mukūtūmamīla lūsumo ūlū, mumboodeleje ū ntemi wa Babuloni: Washila ng'haani ū ng'wiboneeji! Ū būkalī wakwe wa nyadooshi wagelela henaho!

⁵Ū SEEBA wagūbīnzagūlaga ū nang'ha gwa banhū ba malofu, ū nang'ha gwa nyatemi, ū lūmeng'ho lwa basugi.

⁶Ūyo gwalī gūtoyaga kūtūla banhū mu būpelanu; na a mahanga gwalī gūgasugile mu wiboneeji būtī bo kūlekeja.

⁷Pyī ī sī jifuulaga na kūlembeela, Ī haha jikūhīlīīlaga kwīmba mīmbo dūhū.

⁸Nī mitī ī mibanga nī mikoola ya Lebanoni yayegile no; īkūhayaga dūhū gīkī, “Nīyo īkī wagwishiagwa ū bebe, atīho ntemi wa mitī wa kwiza kūtūsenga.”

⁹Ū mu gatī ya kūlimu īlīho tagambī nhaale, kūlwa kūkwanukūla bebe ūlū ūlīshikīīla koi; ī myoyo ya bafu īlīgulumūlwa gīkī balakūgīshe, pye abo baalī batongeeji ū mu sī; bose bose abo baalī batemi ba mahanga, balīmishiwa kūfuma ha masumbī gabo ga būtemi.

¹⁰Pye a benabo nabo bakūshosha balīkūwīla gīkī, “Kinehe ngosha, nang'ho wagogoloha gīt'ūmo tūlī a bise shi, watwikola gashi!”

¹¹Pyī ū wikumīlīja wako wahombokejiwa kūlimu, nī yoge ya ndono jako; shagembe jiyitaga a ha ndaalo yako, ngino h'ī kache mbeho yako.

¹²Bebe sonda ya dilū, ng'wana w'ikīngo, wahungumūka kūfuma ū ng'wigūlū! Bebe ūyo walī ūhemeegije mahanga, ī haha waponyiwa kūshisha hasī!

¹³Wikalaga ūkwiwīlaga ū mu ng'holò yako gīkī, “Nakūlinha kūshisha ng'wigūlū, Ī līsumbī lyane lya būtemi nakūlīgūngūhya lībize higūlya ya sonda ja ng'wa Mulungu. Nakwigasha nyatemi higūlya ya lūgūlū lwa sukuma ya kūle, ū kū nhūng'wanhīlo ya mabità.

¹⁴Nakūlinha nakīle nū kwigūlya ya malunde, nakwitūūla būtaale nene ngwenekīlī, nilenganīje nang'hwe Ūyo Alī Higulya no.

¹⁵Alīyo angū ūūyū wichiagwa hasī kūle kū shimu kūshisha kūlimu.

¹⁶Abo balīyūkūbona ūlībakaamaja no, bakwīyideedeng'hanyaga īyo yakūgwīlile baayiwīla gīkī, ‘Bing'we ūyu hū ng'wene ūyo walī wamanīīla kūtinginya sī, na kūdetemya mabūtemi?

¹⁷Hū ng'wene ūyo wagalūchaga sī yabiza gīt'itogolo dūhū, ūyo wakenaagūlaga mizengo ya mu sī, na walī atabazunīlījaga bading'wa bakwe kūshoka kū kaya jabo?’”

¹⁸A batemi ba mahanga pye a bose balaalile ng'wikūjo, būlī ng'wene mu shigila shakwe;

¹⁹alīyo ū bebe waponyiwe ha nze ya shigila shako gītī itambī isoso; ī haha ūpīndiwe banhū baabūlagwa, abo baabūlagwa bo līlūshū, abo baponyiwe kū shimu kū mawe ga mu shigila; ūtikīlile na mibimba īyo Īkapandagīlagwa na magūlū.

²⁰Ū bebe ūtūsangīla nabo ū mu kajīkīlwe, nguno wīkenaagūla no ī sī yako, na a banhū bako wababūlaga. Ū būbyīle wa banhū ba malofu būtīko kūhayiwa hangī.

²¹Beejagi ipandī lya kūbasīnzīla a baana bakwe, kūlwa būbi wa bakūlūgenji babo; a benabo batī ba kūbūūka na hado yaya, gīkī badime wingīji na kokaja mizengo yabo mu sī.

²²“Nakūbūūka nilwishe nabo,” alīhaya SEEBA wa mabità. “Nakūlyīnja ī lina ū mu Babuloni, pyī nū būshiigo wa banhū; a babyalwa nū būbyīle bokwe,” alīhaya SEEBA.

²³“Ī Babuloni nakwīgalūcha ībize sī ya malūtende ga minzī, na wikalo bo maging'hi; nakwīpyagūla n'ikūmbo lya būkenaagūji,” alīhaya SEEBA wa mabità.

²⁴Ū SEEBA wa mabità wilahīlile, wahayile gīkī, “Ūmo nahelelile h'ūmo īkūīla; nū mumo nītūūlīlile ī mihayo h'ūmo īkwikalīla.

²⁵Ū Ashulu nakūntobagūla ū mu sī yane; nū kū ngūlū jane nakūmpandagīla hasī na magūlū gane. Hūna ī lijoki lyakwe līkūbīngīla a banhū bane, nū nigo gwakwe gūkwīnga ū kū mabega gabo.”

²⁶Īyī h'ī mihayo īyo īhelilwe kūlwa nguno ya sī yose, nīyo ū gwenūyu hū nkono ūyo gūgoloolilwe kū mahanga gose.

²⁷Nguno ū SEEBA wa mabità ahelile chene, nani ūyo adūgije kūpilūcha? Ū nkono gwakwe gūgoloolilwe, nani ū wa kūgūgalūcha?

²⁸Ū mhayo gwenūyū gūkiza mu ng'waka ūyo Ntemi Ahazi akachīla.

²⁹Bing'we Bafilisti a bose, yaya ū kūyega īkī gīkī ū nang'ha ūyo gwalūmutūlaga gwabīnzīkile. Nguno ū ng'wijinji lya nzoka yenīyo, īkūfuma mo ng'hoboko, ū ng'wana wayo akūbiza nzoka ya būsūngū ya kūlala.

³⁰A bahabī ba bahabī bakūpandīka shilīwa, na a bagayiwa bakūyūlaala mu mhola. Alīyo ū nji gwako nakūgūkenaagūla na nzala; Īkūbūmalīja ū būshiigo wako.

³¹Ee, bebe mita, līlaga! Ee, bebe līnzengo, tūlaga ng'hūngū! Bebe sī ya Bafilisti yose pye, detemaga[14] kūlwa boobà, Nguno lyochi līliza kūfuma sukuma, ibità itaale lya bashilikale, īlo atīmo nelengetu nūūlū ūmò.

³²Tūkūbinha ishosho kī a batūmījiwa ba kūfuma kwihanga lyenīlo? “Ū SEEBA wīhandīkīīgije ī Sayuni, nīyo a banhū bakwe a baluhi bakūpīlīla ng'wenūmo.”