Read Sukuma Bible 2015 – Bibilia Ilagano Lya Kale 2015 Isaya 17 Bible Online

Isaya 17 - Sukuma Bible 2015 – Bibilia Ilagano Lya Kale 2015 bible

Isaya 17

¹Mhayo kūlwa nsango kū nzengo gwa Damasiko: “Managi gīkī ī Damasiko ītikala ho, Īkooya ū kūbiza nzengo; gūkūbiza itūūgo lya makambagūkīle.

²Nī mizengo ya Aloeli īkūlekwa, Ībize mapandī ga kūtūūgīja madaale ga ng'holo; jikūyūlembeela moi, atigela wa kūjogohya.

³Ī ng'hambī ya kūpīlīla ya Efulaimu Īkūsambaagūlwa īshile ho; nū būtemi bo Damasiko būkūshila; Ī likūjo lya Baalamu abo balashiige līkūbiza gītī lya Baisilaeli,” alīhaya SEEBA wa mabità.

⁴“Ū mu lūshikū lwenulo ī likūjo lya ng'wa Yakobo līkūgeha no, nū būgīnu wa mīlī gwakwe būkūshila,

⁵nīyo īkūbiza gītī ngesi akūjaga ūbūbilingīja mu nkono gwakwe ū būsīga hūna wabūgesa, gītī ngesi akūpūmbīīlaga magesa mu mbūga ya Lefaimu.

⁶Kwike na hene tūkūsaagīīla mo ū twa kūpūmbīīla, gīt'ūmo nzeituni gūkatinginyiagwa ha kūyowa, alīyo nahene tūkūsaaga nūūlū tūbīlī tūdatū gīko ū kū matambī ga kū neno,” alīhaya SEEBA Mulungu wa Isilaeli.

⁷Ū mu lūshikū lwenūlo a banhū bakūngalūkīla ū Meeja wabo, a miso gabo bakūgaloja kūlī Ng'wela wa Isilaeli.

⁸Batūdīlīla myalīlo hangī, Ī milīmo ya makono gabo, nūūlū batikala baashiisagīlagwa Īsho bashibeeja na makono gabo, gītī Ashela nūūlū ī myalīlo ya kūzuukīja ho būbbani.

⁹Ū mu lūshikū lwenūlo ī mizengo yabo ya nguzu īkūbiza gītī misaka īyo īlekilwe kūlwa nguno ya Baisilaeli, īkūbiza gītī mapandī galekilwe mu masaka na mapoolu. Nīyo būlī kwene hakūbiza būkenaagūku dūhū.

¹⁰Nguno wang'wībile ū Mulungu wa būpīji wako, oyile ū kūng'wizūkwa ūyo alī Shiganga shako sha kūpīlīla. Hūna lūūlū ū bebe nūūlū ūsolanhye mitī misoga na kinehe, nūūlū ūhambe mizabibu migeni,

¹¹hama ū mu lūshikū lwa kwīsolanhya wīyinha būdūla wa kūsonga, hūna ī dilū ya lūshikū lwa kwīhamba wīgunanha yūdūla kūlaba būlabo, alīyo nahene a matwajo ayo ūlapandīke gakūbiza gatī na solobo ū mu lūshikū lwa būpīna na kūsaatwa kwa būja na būja.

¹²Ee, kwiyuugūūla kwa mahanga, gakwiyugūūlaga gītī nyanza īyugūkile! Ee, yoge ya banhū, bakūyoganyaga gītī nundumo gwa minzī mingī gakūhūūmaga na nguzu!

¹³Nūūlū īkī a mahanga ga banhū galī na nundumo gītī gwa minzī gakūhūūmaga na nguzu, alīyo akūbahama bapeele kūle, baje bakūhūhūūjiagwa nyaga mu ngūlū, gītī meela; gītī lūbuubu mu lūyaga lwa kashūlūūdū.

¹⁴Ū mu mhīndī ya kamunhū ūyo, bakwisanganījiwa lyogohya! Būkwangalūka bashilaga. Ū gwenūyo hū ngabo gwa banhū abo bakūtūtaajaga sabo jise bo nguzu; hū mhayo ūyo bahelelilwe abo bakwīnjaga shikolo shise.