Read Sukuma Bible 2015 – Bibilia Ilagano Lya Kale 2015 Isaya 18 Bible Online

Isaya 18 - Sukuma Bible 2015 – Bibilia Ilagano Lya Kale 2015 bible

Isaya 18

¹Īlī mu kwihīga ī sī ya kū nkīlo gwa myongo ya Esiopia, Īyo yokalile yoge ya kūbbabbana kwa manana;

²Īyo īmanīīlile kūtūma batūmījiwa bayo mu nzīla ya nyanza bo mato ga madete, maato ga kweleela hīgūlya ya minzī; Īkahayaga: Bing'we batūmījiwa a babbūūpu, jagi ū kwihanga lya banhū balīhu, a b'ikoba ikondooku, ihanga lya banhū ba nguzu na batapyenagwa, abo bogohilwe mu sī jose, ja bbihī na ja kūle; banhū abo sī yabo ītīnagūlilwe myongo.

³Bing'we banhū bose ba mu sī, abo mukikalaga mu sī jose na jose, ū lūbembeela ūlū lūnunjiwa mu ngūlū, mukūlūbona; nī nhaaninga ūlū yūng'ang'aajiwa mukwīyigwa.

⁴Ū SEEBA waniwīlile alīhaya gīkī, “Nakūlola kūfuma mu wikalo wane nalembeelile sele sele, gītī būsebu widegelekaga ng'wikanza lya līīmi lyabakaga, gītī ilunde lya lūme mu būsebu wa shikū ja magesa.”

⁵Nguno a magesa aho gataalī kūshika, ū būlabo ūlū būshila kūyūgūka, ū bonji būbiza matwajo ga mizabibu gakomeelile, ī saapa akūjikongoola na mhoolo gwa kūkongoolela; na a matambī ayo galandaalile akūgatīnagūla agīnje ho.

⁶Pye a gose gakūlekwa galiiwe noni ja mu ngūlū, na shiinū ja mu matogolo, Ī noni jikūlya no ū ng'wikanza lya myeji ya līīmi isebu, Ī shiinū najo ū mu myeji ya mbeho.

⁷Ū mu makanza genayo manong'ho gakūtwalwa kūlī SEEBA wa mabità, kūfuma ū kū banhū a balīhu, a b'ikoba ikondooku; ī lihanga lya banhū ba nguzu, na batapyenagwa; abo bogohilwe mu sī jose, Ī ja bbihī nī ja kūle; banhū abo sī yabo ītīnagūlilwe myongo. A manong'ho gakwenhwa kū lūgūlū lwa Sayuni, ipandī lya ng'wa SEEBA wa mabità.