Read Sukuma Bible 2015 – Bibilia Ilagano Lya Kale 2015 Isaya 20 Bible Online

Isaya 20 - Sukuma Bible 2015 – Bibilia Ilagano Lya Kale 2015 bible

Isaya 20

¹Ū mu ng'waka gwene ntaale wa mabità ga bashilikale akatūng'wa na Saligoni, ntemi wa Ashulu, akaja Ashidodi ūūkagūdumīla ū nzengo gwenūyo ūgūpyena, ūgūdima.

²Ū mu shikū jenījo ū SEEBA walī wamala kūlūngalūnga mu nzīla ya ng'wa Isaya, ng'witūnja o ng'wa Amozi; ūhaya, “Jaga ūkazuule ī shizwalo sha magūnīla, īsho ūzwalile mu nkīmbīlī gwako, nī shilatū ūkūngūle ū kū mhambala jako.” Na ng'hana akīīta ūmo akawīlīlwa, ūyūshimīza alī dūūhū, nū kū mhambala atī na shilatū.

³Hūna ū SEEBA ūhaya, “Ūmo ntūmami wane Isaya, wamalīlile myaka idatū akūshimīzaga dūūhū, na shilatū yaya ū kū mhambala jakwe, gīkī abize shimanīkījo na shigīmbo kū sī ya Misili na ya Esiopia,

⁴h'ūmo nū ntemi wa Ashulu akūbatwalīla mu būsaamiwa, bado na bataale, abo alabadime kūfuma Misili na Esiopia. Bakūja balī dūūhū, na batī na shilatū ū kū mhambala jabo, hama balī madako ng'waje, kūlwa kwīdimya minala ī Misili.

⁵Hūna lūūlū abo baalī bīsanije ī sī ya Esiopia, na kwikumīlīgīja sī ya Misili, bakogoha na kūding'wa minala.

⁶Ū mu lūshikū lwenūlo, abo bazengile kū ng'walo gwa lwandī lwa kūūnū, bakūyiwīla; ‘Mulībona īyo yabagwīlile abo twalī twabisagīlwa, hūna tūpeelela kūbo gīkī batūgune na kūtūpīja ū kūlī ntemi wa Ashulu! Al'abise lūūlū, tūkūpīla kinehe?’”