Read Sukuma Bible 2015 – Bibilia Ilagano Lya Kale 2015 Isaya 21 Bible Online

Isaya 21 - Sukuma Bible 2015 – Bibilia Ilagano Lya Kale 2015 bible

Isaya 21

¹Mhayo kūlwa nsango kū sī y'itogolo, itogolo ikalamuku lya kū ng'hilimvwa na nyanza: Ūmo miyaga ya nshūūlūlū īkahembelaga na nguzu mu sī ya dakama, h'ūmo akwizīla nū ng'ūūbūki, akūfumīīla kū sī y'itogolo ikalamuku, sī ya lyogohya itaale.

²Naabonile shakoolechiwa shabūbi: Ū ng'wijomboki alongeja kwijomboka, ū nkenaagūji alongeja kūkenaagūla. Bebe Elamu, badumīlage, nū bebe Media bagobanījage! Nene nakūmala pyī ū būpīna ūbo wawenheleja ū ng'wenūyo.

³Ī yose yenīyī īlīnibīnzagūla ū mu mīlī gwane, nalīkoya no gītī nkīma alīkoyiwa būsūngu wa kūbyala; īyo nayigwile yaniminije, Īyo nībonile yanikamaagije.

⁴Ī ng'holò yane yalabūkile, nalīyikala nalibakīla kūlwa boobà, ī likanza lya mhīndī ūlū nalīlindīīla mu kwisagīlwa kūtaale līkūgalūkaga kūbiza lya kogohya ū kūlī nene.

⁵Balīgolanya ha meza, babo balamba na migeka, balīlya na kūng'wa! Bing'we bagosha ba mbagashūūla, būkagi mujibile maguta ī mūda!

⁶Nguno ū Seeba waniwīlile gīkī, “Jaga ūkatūūle ho nang'hani, wa kwīhaya īyo alayūyībona.

⁷Ūlū ūbona magogoteni n'ibità lya badamhīji balī babīlī babīlī, badamhīji ba falasa, ba nzobe, na ba ngamīla; ni azalabanage, nīyo azalabane gete”

⁸Kwimanīla ū nang'hani wahamuka akūhayaga, “Baba ka būlī gwa nakikalaga nīmīīlaga higūlya ya lūtala lwa kūlolela kūle; na a ha ng'hīngī yane nakakeyulaga būjikū pe nalīho hoi.

⁹Yū, alilūūlū, ūūyū munhū washika alī ng'wigogoteni, n'ibità lya badamhīji ba falasa balī babīlī babīlī. Nīyo alīhaya gīkī, ‘Ī Babuloni yagwaaga, yagwaaga! Pye a mashiikolile ga bamulungu ba ng'wenūmo gamenyagūkaga, galī hasī ī haha!’”

¹⁰Ee, bing'we banhū bane, abo mubange būsīga būkūtūlagwa ha lūbūūga, nalīmumanīkīja īyo naayigwile kūfuma kūlī SEEBA wa mabità, kūfuma kūlī Mulungu wa Isaleli.

¹¹Mhayo kūlwa nsango kū sī ya Duma:[17] Munhū alīnihamukīla kūfuma Seili, “Bebe nang'hani, ūlīwiganikīla kinehe ū būjikū? Nang'hani, ūlīwiganikīla kinehe shi ū būjikū?”

¹²Ū nang'hani nang'hwe alīshosha, “Ū būjikū ū wene welaga, alīyo būkwila hangī dūhū. Ūlū ūtogilwe kūbūūja, būjaga, hama ūlashoke hangī.”

¹³Mhayo kūlwa sī ya Alabia. Bing'we bashimīzi Badedani, abo ng'hambī jing'we jilī mu mapoolu ga Alabia, enhagi minzī bang'we a banhū

¹⁴abo balīminyiwa notà; bing'we bazengi ba sī ya Tema, binhagi shilīwa balye a babūngi.

¹⁵Nguno bapūlūgūkaga kū līlūshū, baalī mu nhabaala ya kūbūlagwa bo līlūshū; bapūlūgūkaga kūbūlagwa wa būta, bapīlaga kūfuma kū būlūgū būdakile.

¹⁶Nguno ū Seeba waniwīlile, “Ng'wikanza lya ng'waka gūmò, gīt'ūmo ng'witūmamīja wa mheela akabalīlaga ikanza lyakwe, pyī ū wikumīlīja wa Kedaali būkūshila.

¹⁷Ū būshiigo wa balasi, a bashilikale ba Kedaali, būkūbiza būgehu no.” Alīhaya SEEBA Mulungu wa Isilaeli.