Read Sukuma Bible 2015 – Bibilia Ilagano Lya Kale 2015 Isaya 22 Bible Online

Isaya 22 - Sukuma Bible 2015 – Bibilia Ilagano Lya Kale 2015 bible

Isaya 22

¹Mhayo kūlwa Longa lwa Shakoolekejiwa. Alilūūlū, mulīkoyiwa kī ī haha a bing'we, nose pye a bose mushilīle kwigūlya ya numba gīko?

²Ee bebe ūyo okalile yoge, Ee bebe nzengo gwa yombo na wiyugagūji wingī; a banhū bako abo bakūchaaga batūchaaga mu nzīla ya līlūshū, nūūlū batūchīlaga mu būlūgū.

³A bataale bako baalī baapeelile pye, baadimilwe nūūlū būta būtatūmamile. Bose pye abo mukapandīkwa mukading'wa ng'ūtungwa, nūūlū īkī ng'walī ng'wapeela ū ng'wanishi ataalī kūle.

⁴Nose nakahaya gīkī, “Galūkīlaga kūngī ūnileke ū nene, nilīle masumanda. Lekaga ū kūgema kūnilūngūja ū mu mihayo ya kūkenaagūlwa kwa banhū bane.”

⁵Nguno ū Seeba MULUNGU wa mabità alī na lūshikū lwa kūyugūūlwa na kūtobangwa, na kūzwanganyiwa ū mu Longa lwa Shakoolechiwa. Lūkūbiza lūshikū lwa ndugu kūkambagūlwa na kūjilīlīīla ngūlū.

⁶Ī Elamu ī kamanula ntana gwa masonga, na magogoteni ga būlūgū, na bashilikale badamhīji ba falasa. Ī Kili yene yūgolanya mūda.

⁷Ī mbūga jako ja manyalala masoga pye jokalile magogoteni ga būlūgū, na bashilikale badamhīji ba falasa bīmīīlile a ha mibita ya nzengo.

⁸Ū nzengo gwa Yuda gwīngījiwe ū būlang'hani wago. Ū mu lūshikū lwenūlo mukihamba kūlola shilanga ū mu numba y'ipoolu,

⁹ng'ūbona mapandī mingī gakambagūkile ū mu ndugu ya Nzengo gwa ng'wa Daūdi; ng'ūbeja nzīla ya kūsūmbya minzī ū ng'wilambo lya kū ntulūmenho.

¹⁰Hūna ng'ūjibala ī numba ja mu Yelusalemu, jimò ng'ūjikambagūla gīkī mupandīke shitūmamīlo sha kwīguzuhīja hangī ī ndugu.

¹¹Hanuma mukasīmba ilambo a ha gatī ya ndugu būbīlī wajo, lya kūsūmbīja minzī kwīngīīla ū ng'wilambo ī lya kale. Kwike ng'walī mutanolaga ū Meeja wayo ī yenīyī; mutang'wideedeng'hanije Ūyo walī ayīhelile kūfuma kale.

¹²Ū mulūshikū lwenūlo, ū Seeba MULUNGU wa mabità, akang'witana ng'wize kūlīla na kūtūla ng'hūngū; kwihalūla mapala ī mitwe ying'we na kūzwala shizwalo sha magūnīla.

¹³Alīyo angū lolagi, banhū bakūyegaga na kūtambīīla dūhū, īt'isīnza ng'ombe na ng'ondi ja ng'holo nīyo ī lyene; hama ilya nyama na kūng'wa walwa lya nang'ha gūmò! Mukwiwīlaga, “Tūlyagi na tūng'wagi, nguno ī ntondo tūkūcha!”

¹⁴Alilūūlū, ū SEEBA wa mabità wakundūlile hape nadegelekile; ūhaya gīkī, “A bing'we mutī ba kūlekejiwa ū būbi wenūbū kūshisha lūshikū lwa kūcha kwing'we,” alīhaya Seeba MULUNGU wa mabità.

¹⁵Ū Seeba MULUNGU wa mabità alīhaya, Jaga ū kūlī neji, ū Shebuna, ū ntaale wa yose Ī ya ng'wikūlū, kang'wīlage gīkī,

¹⁶Ūlīīta kinehe a henaha, nani wakūzunīlīgije kwisīmbīla shigila shako bebe ng'wenekīlī a henaha? Ūlīsīmba shigila shako ng'wigūlya ūkūbelagūlaga mawe gīkī wibeegeje wikalo wako?

¹⁷Alilūūlū, managa gīkī ū SEEBA alī hihī kūkūdima na nguzu, hūna akūponye kūle, Ee bebe ngosha wa makaya.

¹⁸Akūkūlinga linga widamīīle ūbize gītī goolu, hūna akūlute ūkagwe kū sī nhaale. Ū kwenūko h'ūko ūkūchīla; h'ūko gakwikala a magogoteni gako g'ikūjo, bebe ūyo ūl'igisha minala kū numba ya ng'waso būgonzo!

¹⁹Nakūkwīnja a ha nīmo gwako, ūkūtyūlwa wīnge a h'isumbī lyako.

²⁰Ū mu lūshikū lwenūlo nakūng'witana ntūmami wane Eliakimu, ng'wintūnja o ng'wa Hilikia.

²¹Nakūnzwika wei ī ng'hanjo yako, nū nshipi gwako nakūntunga, nū bū sugi wako nang'winhe we. Akūbiza ise wa bazengi ba mu Yelusalemu na wa numba ya ng'wa Yuda.

²²Ū lūfungūlo lwa numba ya ng'wa Daūdi nakūntūūlīla ha mabega gakwe; ū wei ūlū ūlugūla atīho wa kūlugala, hama ūlū ūlugala atilonga wa kūlugūla.

²³Nakūng'handīkīja adame jigi, gītī lūmambo lūkomilwe h'ipandī idiimu. Hūna ū kū numba ya ng'wa ise akūbiza isumbī ly'ikījo.

²⁴Ī likūjo lya numba ya ng'wawe līkūtūūlwa halī we pyī ī lyose; a banhū ba būbyīle wakwe na baana babo, nī shiseme ī shido do do, gītī mabakuli na shikombe.

²⁵Ū SEEBA wa mabità alīhaya, “Ū mu lūshikū lwenūlo ū lūmambo ūlo lwalī lūkomiwe h'ipandī idiimu, lūkwīnga; lūkūbbutwa lūgwe, nū nigo ūyo gwalī gūsungilwe higūlya yalo, gūkūtīnwa gwīnge.” Alīhaya SEEBA.