Read Sukuma Bible 2015 – Bibilia Ilagano Lya Kale 2015 Isaya 23 Bible Online

Isaya 23 - Sukuma Bible 2015 – Bibilia Ilagano Lya Kale 2015 bible

Isaya 23

¹Mhayo kūlwa nzengo gwa Tulo: Līlagi bing'we meli ja Talishishi, nguno ī Tulo yakenaagūlilwe, īlī buyīkī; jitīmo ī numba, nū ng'walo gūtīho. Mhayo gwabapandīkile kūfuma sī ya Kupulo.

²Bing'we banhū ba ng'wijinga, huumūlagi sele sele, na a bing'we basūlūja ba Sidoni, abo ng'wasabiwa milīmo ya mu nyanza.

³Nzīla ya minzī mingī hū yene yalūtūmamaga kūg'wenhela shilīwa kūfuma Shiholi. Ī sabo ng'walūpandīkīlaga mu mhona ya kūfuma kū mongo gwa Nile; ng'walī sī ya būsūlūgījo kūlwa mahanga.

⁴Leka ūgooke, Ee Sidoni, bebe ūyo ūlī būpīlīlo kū ng'hilimvwa na nyanza. Nguno ī nyanza yahabūlile hape īlīhaya gīkī, “Ū nene nataalī kūlung'wa būsūngū, nataalī nūūlū kūbyala; nataalī kūlela baana bagosha, nūūlū kūkūja baana bakīma.”

⁵Ū mhayo gwenūyū ūlū gūshika Misili, bakūzwangana no ū kwīyigwa īyo yilongile mu Tulo.

⁶Bing'we, kīlagi nī ma Talishishi, līlagi ng'hūngū banhū ba kū majinga.

⁷Ū gwenūyū hū nzengo gwing'we ū gwa kale na kale, ū gwa būyegi ūyo bazengi baamo bapanda na kū ma sī ga kūle, būūkalobela na kūko?

⁸Nani ū meeja wa long'we yenīyī, Ī ya kūkenaagūla nzengo gwa Tulo ūyo gwagabaga ngikili j'ikūjo, ūyo basūlūja baalī basugi baago, na a bakwabi baamo baalī bakumūku hose hose ū mu ma sī?

⁹SEEBA wa mabità, hū ng'wene ū meeja wayo ī long'we yenīyī, gīkī awiche ha sīlīlī ū wigūngūhya kūlw'ikūjo, na a bikumīlīja ba mu sī abadoheleje pye a bose.

¹⁰Jaga kū malaale gako ūkalīme, ūmo bakalīmīlaga kū mbalama ya Nile, ī Talishishi ndūhū ū būpīlīlo.

¹¹Ū SEEBA wīgoloolelile nkono gwake Ī nyanza, akūgatinginyaga a mabūtemi; walagīlile ī Kanaani gakambagūlwe a mapandī ga kūpīlīla.

¹²Wahayile gīkī, “Ee bebe munhya Sidoni, tobagūkaga; ī likanza lyako lya kwikala mu būyegi lyashilile! Būūkaga shi ūkīle kūja Kupulo, alīyo nahene ūtifuula nū kwene.”

¹³Al'īlolage ī sī ya Bakalidayo, a banhū benabo batī ba kwiganikīlwa ī haha! A Baashulu bīgalūcha ī sī yenīyo, yabiza wikalo bo shiinū ja mu matogolo; bakīzengeela ng'hambī jabo ja bashilikale bīpīndīlīja, hūna būgakambagūla pye a mapandī gaamo a ga kūpīlīla; ī haha mapagale gike.

¹⁴Hūūlūūlagi bing'we meli ja Talishishi, nguno ū būpīlīlo wing'we wakenaagūkile.

¹⁵Ū ng'wikanza lyenīlo, ī Tulo īkwīwa ikanza lya myaka makūmi mpungatī, gīt'ūmo īlī myaka ya būlamu wa ntemi. Hanuma ya myaka makūmi mpungatī yenīyo, ī mihayo ya mu lyīmbo lya kūng'haya malahya īkūshikīīla.

¹⁶Ee, bebe nkima malahya ūyo baakwība, solaga ndono ūgūyeelele ū nzengo hose hose, jaga ūkwītūlaga chiza na kwīmba mīmbo mingī, bakūkwizūkwa hangī.

¹⁷Ī myaka makumi mpungatī ūlū yūshikana, ū SEEBA akwīgeniha ī sī ya Tulo, hūna īkūshoka ū kū nīmo gwayo gwa būmalahya, yandye hangī kwīta būmalahya nago a mabūtemi gose ayo galī mu sī.

¹⁸Kwike ī solobo nī mheela ījo īlayūpandīka jikūtūūlwa kūlwa nguno ya ng'wa SEEBA; jitūbīkwa nūūlū kūbiswa hanhū; alīyo īsho akūyūshipandīka shikūbiza sha kūbagunanha abo bakikalaga mulī SEEBA, bayūpandīka shilīwa na shizwalo shawiza.