Read Sukuma Bible 2015 – Bibilia Ilagano Lya Kale 2015 Isaya 24 Bible Online

Isaya 24 - Sukuma Bible 2015 – Bibilia Ilagano Lya Kale 2015 bible

Isaya 24

¹Managa gīkī ū SEEBA akwīkenaagūla ī sī ayīleke īlī buyīkī; akwībipya gete ī yose, ababbalasanye a bikaji baamo.

²Ūmo īkūbizīla kū banhū, h'ūmo īkūbizīla nū kūlī ngabīji; ūmo īkūbiza kūlī nsese, h'ūmo īkūbizīla nū kūlī ise būgonzo; ūmo īkūbiza kūlī nsese nkīma, h'ūmo īkūbizīla nū kūlī nina būgonzo; ūmo īkūbizīla kūlī ngūji, h'ūmo īkūbizīla nū kūlī njinja; ūmo īkūbizīla kūlī nandi, h'ūmo īkūbizīla nū kūlī nandwa; ūmo īkūbizīla kūlī nsoji w'igasa, h'ūmo īkūbizīla nū kūlī ntondi w'igasa.

³Ī sī īkūkenaagūlwa gete Ībize dalali, hama pyī ī shikolo shikwīnjiwa. Nguno ū SEEBA hū ng'wene wagūhayile ū mhayo gwenūyū.

⁴Ī sī īkūlīlaga ng'hūngū, hama īlīshila ho; ī wangalūke īlīzwangana, hama īlīshila ho; a bakumīlījiwa ba mu sī balīzwangana.

⁵Ī sī īkūsosohajiagwa banhū bayo, nguno bagalemile a malange, nguno ya kūlema kūshidīlīla Ī shilagīlo, na kūlwa kūlīkenaagūla ī lilagane lya welelo bose.

⁶Hūna lūūlū, ī sī īlīmalwa izumo, a bikaji baamo bakūgwaga mu kwihīga; h'ī nguno yene a bikaji ba mu sī balīshilīla mu moto, bakūsaaga bagehu no.

⁷Ī divai sūhya yashilile, nī mizabibu yanyaalile; pye a banhū abo bamanīīlile kwikala bakūyegaga balī mu makoye mataale.

⁸Ī ng'oma ja būyegi jahuumūlile, nī mhūndū ja būyegi joyile ū kūzilīng'hanya, Ī malimba ja kūzalabanya banhū najo jilī sele sele ī haha.

⁹Ūlū bakūng'waga divai boyile na kūchaaja kalyīmbo, ū walwa nabo bobizilūbalūlīla abo bakabūng'waga.

¹⁰Ū nzengo gwa nsambo ī haha mi no, būlī nyango gwa kwingīla mu numba gūlugalile, munhū ose ose atizingīla mo.

¹¹Ū mu mayīla ng'hūngū dūhū kūlwa kūkooba walwa, ū būzalabanu pyī ū bose būshīkījiwe giiti; ū būyegi būtīmo gete ū mu sī.

¹²Ū nzengo gwabipiwe no gūlekwa gūkambagūkile, nū mita gwaho gwapūūlīīlilwe gūūpaanagūka paza paza.

¹³H'ūmo īkūbizīla hose pyī ū mu mahanga ga mu sī, īkūbiza gīt'ūmo gūkalekelagwa nzeituni ūlū gūshingishiwa, nūūlū ūmo mizabibu īkalekelagwa ūlū būmala kūhūlūla a bahūlūji.

¹⁴Balīhīlīīla, balītūla mhūndū kūlwa būyegi, balīfuma mu ng'weli bakūlīgongoolaga ikūjo lya ng'wa SEEBA.

¹⁵Alilūūlū bing'we ū mu kīya, nkumīlījagi ū SEEBA; bing'we bikaji ba mu majinga ga nyanza, līkūjagi ī lina lya ng'wa SEEBA, ū Mulungu wa Isilaeli.

¹⁶Hose pyī ū mu sī bakwīmbaga; tūligwa bakūhelelekejaga, “Ikūjo kūlī We ū Ntūngīlīja.” Alīyo ū nene nakahaya gīkī, “Naaluha būlī! Naaluha būlī! Nashila! A bijomboki balī mu wijomboki wabo! A bijomboki balītūmamīla wijomboki wabūbi no!

¹⁷Ee, bing'we bikaji ba mu sī, mulindīīlilwe mhayo gwa kogohya, n'ichongo, na lūtu.

¹⁸Ose ose ūyo ūbuluguta nhambo kūlwa nguno y'ilaka lya kogohya, akūjūgwila ng'wichongo, ūyo ūpūlūka ū ng'wichongo, akūgwashiwa lūtu. Nguno gaalugūkile a madilisha ū kwigūlya, nī misingi ya sī īlītingina.

¹⁹Ī sī yakenaagūkile kībi no, Ī sī yatandagūkile yūbipa no, ī sī yatinginyiwe hataale no.

²⁰Ī sī īkūdeedeebukaga gītī nkolwa walwa, īlīyengeela gītī mbuulya līkūyengejiagwa nyaga. Ū būdito wa būkenaagūji wayo būyīsheedekegije kūshisha īkūgwa; hama ītūdūla ū kūbūūka hangī.

²¹Ū mu lūshikū lwenūlo, ū SEEBA akūgagwisīja nsango a mabūdūla ayo galī kū mapandī ga kwigūlya ng'wigūlū; na a batemi abo balī hasī mu sī.

²²Bakūkobiwa batūūlwe hamò gītī batungwa balī ng'wichongo; bakūlugalīlwa mu jeela, hūna hanuma ya shikū ningī bakwinhwa nsango.

²³Ū ng'weji gūkūbbopoma, Ī līīmi nalyo līkūcha soni; nguno ū SEEBA wa mabità akūsuga ū mu Lūgūlū lwa Sayuni nū mu Yelusalemu, a banamhala baamo aboolekeje ikūjo itaale.”