Read Sukuma Bible 2015 – Bibilia Ilagano Lya Kale 2015 Isaya 25 Bible Online

Isaya 25 - Sukuma Bible 2015 – Bibilia Ilagano Lya Kale 2015 bible

Isaya 25

¹Ee SEEBA, ū bebe ūlī Mulungu wane, ū nene nakūkūkumīlīja, nī lina lyako nakūlīgongoola; nguno wītile mihayo ya kūkumya mu kūsanyiwa kūtaale na ng'hana, mihayo īyo wīhela bebe kūfuma kale na kale.

²Wagalūkije nzengo gūūbiza makambagūkīle gike, nzengo gwa nguzu gwabizile itūūgo lya makambagūkīle; a manumba ga bibonya gūtī nzengo ī haha; hama gūtalazengwa hangī ilalī.

³Kūlwa mhayo gwenīyo banhū ba nguzu bakūkūkūja, mizengo ya mahanga ga banhū biboneeji īkūkogoha ū bebe.

⁴Nguno ū kūlī ng'habī wiyeegile bebe kūbiza ibūngīlò lyakwe, ū kūlī ngayiwa ūlī būpīlīlo ng'wikanza lya makoye; ūl'ipandī lya kūūbīla mu makanza ga mbulà ya nyaga ntaale, na mbeho ng'wikanza lya līīmi isebu. Nguno a kaheezelele ka biboneeji kalī gītī mbulà ya nyaga ntaale Īkūtūlaga ha ndugu,

⁵katikīlile na būsebu wa līīmi ng'witogolo ikalamuku. Hūna bebe ūkahuumūjaga na nsambo gwa bibonya; ūmo būsebu wa līīmi būkachuulejiagwa mbeho y'ilunde, h'ūmo kakahuumūgījiagwa na a kīmbīle ka biboneeji.

⁶Ū mu lūgūlū lwenūlū ū SEEBA wa mabità akūbeeja shigukulu sha shizeeze, kūlwa banhū bose pye; shigukulu sha divai ya ndigo digo gwawiza, na nyama nonu ja būlī mbika, jokalile maguta ga mhongo; ī divai yene ītindīkile yūkomeela, hūna yūswīzwa chiza.

⁷Ū mu lūgūlū lwenūlū, h'ūmo akūgūkenaagūlīla ū nguto ūyo gūbagubbile gubbi gubbi pye a banhū, ū būlengeeti ūbo būkundīkīgije mahanga gose.

⁸Ū kūcha akūkūmila mu būpyeni welelo bose; ū Seeba MULUNGU akūshipyagūla Ī shisoji ū kū būshū wa banhū bose, na a magooke ga banhū bakwe akūgīnja hose pye ū mu sī. Nguno hū SEEBA ng'wenekīlī alīhaya.

⁹Ū mu lūshikū lwenūlo bakūhaya gīkī, “Ū ng'wenūyū h'ū Mulungu wise gete, h'ūyo twalī tūng'wisagīlilwe, na ng'hana watūpīgije. Ū ng'wenūyū h'ū SEEBA ūyo tūnsanije; tūyegagi na kūzalabana mu būpīji wakwe.”

¹⁰Nguno ū nkono go ng'wa SEEBA gūkūlembeela mu lūgūlū lwenūlū, alīyo a Bamoabu bakūtobangwa ha sīlīlī yakwe, gīt'ūmo maswa gakapandagīlagwa mu tembe.

¹¹Bakūyaala mo a makono gabo, gītī munhū akwaalaga makono gakwe kūjiha. Alīyo ū Mulungu akūwicha hasī ū wikumīlīja wabo, nūūlū īkī balī na būmani wa kūgatūmamīla a makono gabo.

¹²Ī ndugu jako ja kūkūlang'hana akūjiholomola nūūlū jibize ndīhu na kinehe, akūjigwisha jiikīle hasī, akūjikambagūlīla hasī mu lūbuubu.