Read Sukuma Bible 2015 – Bibilia Ilagano Lya Kale 2015 Isaya 3 Bible Online

Isaya 3 - Sukuma Bible 2015 – Bibilia Ilagano Lya Kale 2015 bible

Isaya 3

¹Alilūūlū, managa gīkī, ū Seeba, ū SEEBA wa mabità, alī hihī kūbīngīja a bana Yelusalemu na a bana Yuda pyī ū būpandīkīlo wa shiigunanhīlo nī sha kūbaguzuhya; pyī ū būpandīkīlo bo shilīwa nū būpandkīīlo bo minzī.

²Ū ngosha wa mbagashūūla akwīnjiwa, nū nshilikale, nū namuji nū ng'hangi, nū nchūja nū namhala;

³nū ntaale wa bashilikale makūmi atanò akwīnjiwa, nū munhū ūyo akūjiwe, nū ndeeba mu kūganikīla, nū koolī wa kūbeeja shikolo, pyī nū mani wa būfumu akwīnjiwa.

⁴Nakūbatūūla ha sīlīlī ya būsugi wa bayanda, bakūsugwa na baana beleele.

⁵Hūna a banhū bakūbiza na nhūngwa ja kwiyiboonela sagala boi kū boi, munhū na munhū ng'wiye; nzenganwa nang'hwe na nzenganwa ng'wiye. A baalūki bakūyūbatalūkīla a bataale; ū ng'wibonya nang'hwe akūbiza wabūbi no ū kūlī munhū nkūjiwa.

⁶Munhū akūng'haja ūmò wa baana ba ng'wawe wa kūfuma mu numba ya ng'wa ise; hūna akūng'wīla, “Ū bebe ūlī na shizwalo, bizaga nsugi wise; na a mapagale genaya gaabizaga ha sīlīlī ya būsugi wako!”

⁷Alīyo nag'hwe ū mu lūshikū lwenūlo akūhaya hape gīkī, “Ū nene natī na sha kūmugunanha, ndūhū ī shizwalo ū mu ng'wane, nī shilīwa shitīho; yaya ū kūnitūūla būsugi wa banhū!”

⁸Ī Yelusalemu yipamile, Ī Yuda yagwile; nguno īyo bakūlūngalūngaga nī yīyo bakwītaga īlī na wanishi ū kūlī SEEBA, balīdalahile ī likūjo lyakwe.

⁹Ī lihanga lya būshū wabo līkūbakaanīlaga, ī shibi shabo bashitendile ha ng'wape gītī Sodoma; batashibisaga nūūlū hado, balī mu kwihīga! Biyenhelile makoye boi benekīlī.

¹⁰A batūngīlīja bawīlage gīkī, a boi batī na makoye gose gose, nguno bakūlya a matwajo ga shitīle shabo.

¹¹Ū wabūbi alī mu kwihīga! Makoye gakūng'wikalīla, nguno īyo akwīyītaga na makono gakwe h'īyo akwītīlwa nang'hwe.

¹²A banhū bane bakwiboneelagwa na baana, a basugi babo bakīma. Bing'we banhū bane, a batongeeji bing'we bakūmuhūbyaga, bakūmutajaga ū mu nzīla.

¹³Ū SEEBA amalīīlile kūlamula, Īmīīlile kūbalamula a banhū.

¹⁴Ū SEEBA alī mu būlamuji, akūbalamulaga a banamhala ba banhū bakwe na a basugi babo, “A bing'we hū mukūgūmalaga ū ngūnda gwa mizabibu, Īsho mukūbataajaga a bahabī shilī mu numba jing'we.

¹⁵Mulī na makūlū kī ū kūbiboneela a banhū bane, na kūyūbakulusūla kū būshū a bahabī?” Alīhaya Seeba, ū SEEBA wa mabità.

¹⁶Ū SEEBA ūhaya hangī gīkī, “A bakīma ba Sayūni badooshi no, bakashimīzaga baalangūlījaga, bakūponyaga miso ūko na ūko kūlwa kwikūmvwa kwabo. Baakūyūshimīza būpandīla hado hado kūnū bakūyombaga mihayo mikondooku na kūzīlīng'hanya nzoozo ja mu būdoodi bo mu shing'ongwa shabo.

¹⁷Alilūūlū, ū SEEBA akūbagwisīja lūguukule mu ntwe a bakīma ba Sayuni; nī shizwalo shabo akūbakunūja, yigengeleke ī minala yabo.”

¹⁸Ū mu lūshikū lwenūlo, ū SEEBA akūbīngīja ū būlenji a bakīma benabo, ī nzoozo ja mu shing'ongwa nī myenda ya kwigumīīla kū ntwe, nū būsalū bo mu nhingo;

¹⁹akūbīngīja nī heleni ja kū matū nī migufu, na a mabuyī buyī;

²⁰pyī nī shitambaala sha kū ntwe, nū būdoodi bo mu shing'ongwa, nī mishipi, na a matendele ga mu magūlū, nī jūbba ja maguta ga ng'waso gwawiza, nū būgota bo sambaa;

²¹akūbīngīja nī pete, nī sīīlī ja kū nindo,

²²na a malinda ga shikū ja shigukulu, na a magoodi, nī myenda ya kwigumīīla, nū tūbogooshi twa kūyeelana;

²³pye na a malole ga kwilolela akūbīngīja, nī myenda ya kitaani, nī ngoofiila, nī shitambaala shibbūpu sha kūshīkīja kū būshū.

²⁴A ha ng'wanya gwa maguta ga ng'waso gwawiza līkūbiza ho inyema ibi, na a ha ng'wanya gwa nshipi līkūbiza ho iguuta; a ha ng'wanya gwa nzwīlī jishibile chiza līkūpalūka ipala; na a ha ng'wanya gwa shizwalo sh'ikūjo shikūbiza ho shizwalo sha magūnīla, a ha ng'wanya gw'ikoba lya mīlī līgaliilile būkūbiza ho būmeng'he wa līmeelo.

²⁵A banhū bako a bagosha bakūmalwa bo līlūshū, a banhū bako ba makaya bakūshilīla mu būlūgu.

²⁶Ī mibita yakwe ū Sayuni īkūtūla ng'hūngū īkūlīlaga, nīyo akwifudīka hasī wagayiagwa ū gwa kwīta.