Read Sukuma Bible 2015 – Bibilia Ilagano Lya Kale 2015 Isaya 30 Bible Online

Isaya 30 - Sukuma Bible 2015 – Bibilia Ilagano Lya Kale 2015 bible

Isaya 30

¹Baana balemile kūhang'wa balī mu kwihīga, alīhaya SEEBA; babeeja ba long'we alīyo jitī jane, bakabeejaga gwīnda alīyo ītafumile mulī Moyo wane, biyongeleleja shibi higūlya ya shibi;

²abo bakatulumenhaga kūja Misili nū kūnibūūja ū nene yaya; bakajaga kūkooba būpīlīlo ha sīlīlī ya būlang'hani bo ng'wa Falao, bapandīkīle Misili mbeho ya kwishīkīlīgīja mu makoye.

³Kwike ū būlang'hani bo ng'wa Falao būkūbiza magooke ū kū bing'we, hama ī mbeho ya Misili īkūmuponda soni dūhū.

⁴Ni babizage balī na banhū bataale ū mu Zoani, na a batūmījiwa babo babize baamalaga kūkandya Hanesi;

⁵alīyo pye a bose bakūgooka, kūlwa nguno ya banhū abo batī na gwa kūpya ū kūbo; abo batadūgije kūbagunanha nūūlū ni kūbenhela solobo, ūlū ītī magooke n'iponda soni dūhū.

⁶Mhayo kūlwa shiinū ja Negevu: Batūmījiwa bakūbūūchaga sabo jabo ha migongo ya nzobe, na shikolo shabo sha mpango ha nguku ja ngamīla, bajile kwihanga lītī na sha kūbagunanha nūūlū hado, bakūbītīlaga mu sī ya makoye na nduha nhaale, ya shimba ng'osha na ng'hīma, sī ya ng'hoboko na nzoka ja kūlala.

⁷Alīyo ī Misili ndūhū ko gete shose shose sha kūgunanha. Nose ī sī yenīyo nīyinha lina lya, “Lahabu Ngaya Nīmo!”

⁸Ī haha jaga ūkagwandīke ū mhayo gwenūyū ha lūbbawa mu būtongi wabo; ūgūtūūle mu shitabo, ū kū shikū ja kū būtongi gūlabize būkaanīji wa būja na būja ū kūbo.

⁹A banhū benaba bashitiigwa no, baana balomolomo; baana abo batī na shiigwa matū kū katongeelele ka ng'wa SEEBA.

¹⁰A baboni bakabawīlaga gīkī, “Ning'we oyagi ū kwikala ng'ūbona shakoolechiwa!” A bahangi nabo bakabawīlaga gīkī, “Mutatūhangīlage īyo ītūngīlīgije, ng'ūlūngalūnga mihayo minonu, ng'ūhanga nī ya kūbboodeleja!

¹¹Lekanagi nayo ī nzīla yenīyī, tajagi ng'wīnge moi; oyagi ū kwikala ng'watūgaagaanīlaga kūtūwīla mamihayo ga Ng'wela wa Isilaeli!”

¹²Alilūūlū, ū Ng'wela wa Isilaeli alīhaya gīkī, Īkī mulīgūdalaha ū mhayo gwenūyū, ng'wayūsanya wiboneeji na kūsendamīla būhūganu,

¹³managi gīkī, ī shibi shenīshi ū kū bing'we shikūbiza gītī ndugu ītandūkile, nīyo īlī hihī kūgwa; Īyo kagwīle kaayo kakwiza haho na haho mu kwisanganīja.

¹⁴Īkūtandagūka īsambaale gītī shiseme sha mabūmba, ūmo shikabelagūkīlaga kībi kībi, kaagaya nūūlū kapeenu ka kwahūlīla moto mu liiko, nūūlū kalūjo ka kūdahīla minzī mu lwinzī.

¹⁵Ū Seeba MULUNGU, ū Ng'wela wa Isilaeli alīhaya gīkī, “Ū būpīji wing'we būlī mu kūshoka na kwifuula; ī nguzu jing'we jilī mu būlembeezu na kūsanya. Alīyo mutī na nīmo nayo ī yenīyo.

¹⁶Mukwiwīlag gīkī, ‘Biya a bise tūkūdamhīla falasa tūpeele.’ Alilūūlū, mukūpeela ng'hana! Mukūhayaga gīkī, ‘Tūkūdamhīla ndamhī mheeji tūpeele.’ Kwike a bapeeja bing'we bakūbiza bapeeji kūmuheeba a bing'we.

¹⁷Ng'wanishi ūmò akogohya banhū shihūmbī shimò bilalīle na kūsambaala, lelo a batanò bakūng'ogohya pye a bose musambaale; kūshisha abo mulasagīīle mukūbiza gītī nongoodi gwa lūbembeela gūlī higūlya ya lūgūlū, nūūlū gītī lūbembeela ha shigūlū.”

¹⁸Kwike ū SEEBA alī na ng'hūmbū ja kūng'olekeja wiza bokwe; akayegaga no ū kūmuchīla shigongo. Nguno ū SEEBA alī Mulungu wa būlamuji wa wīmà; balī na abo bansanije we.

¹⁹Ee bing'we banhū ba Sayūni, abo mulī bazengi ba mu Yelusalemu, mutikala mukūlīlaga ng'hūngū. Ūlū ng'ūlīla mulīkooba kūgunwa akūmuchīla shigongo! Ūlū wigwa ī ng'hūngū ying'we akūng'winha ishosho haho na haho.

²⁰Nīyo ū SEEBA nūūlū akamulisha ngatī gwa makoye, na a minzī ūng'winha ga būluhi, nahene a balangi bing'we batalibisa hangī na hado. Mukūbabona na miso ging'we.

²¹Nūūlū mukatala ū mu nzīla ng'ūlola kū būlyo nūūlū kū lūmoso, nahene a matū ging'we gakwigwa ilaka ū kū numa līkūhayaga, “Ī nzīla yīyī, shimīzīlagi mo.”

²²Hūna ī shiikolile shing'we ī sha kūlamiwa īsho shinaagīlilwe feza, nī shisho shikundīkījiwe zahabu ya kwaabiwa, mukūshisola mushisosohaje, hama mushiponye kūle gītī shikolo sha malofu. Mukūshiwīla, “Īngagi a henaha!”

²³Nī mbulà akūng'wenhela kūlwa kūshizwisha īsho mukūhambaga hasī, nī shilīwa īsho shikūzwaga ū mu malaale ging'we shikūbiza na nguzu, hangī shingī. Ū mu lūshikū lwenūlo ī mitugo jing'we jikūdīīmīla mu matogolo magalī ga maswa mingī.

²⁴Ī nzīkū nī nzobe jing'we ī ja kūlīma, jikūyūdīīma maswa masoga gagaliililwe chiza gūsanja sanjiwa gūsandūka.

²⁵Nīyo ū lwenūlo lūkūbiza lūshikū lwa kūyagaala kūtaale, ng'hambī ja kūpīlīla jikūholomolwa, na minzī gakūyūtoloma kūfuma hose hose ū mu ngūlū ī ndīhu nī ndo.

²⁶Ū būpe bo ng'weji būkūbiza gītī būng'weku bo līīmi, ū būng'weku bo līīmi ū wene būkwiyongeja ng'hangala mpungatī, būbiza gītī būng'weku bo malīīmi ga shikū mpungatī ūlū gūsangījiwa hamò; ū lwenūlo lūkūbiza lūshikū lwa ng'wa SEEBA kūgatunga a magulaagīje ga banhū bakwe, na kūbapīja ū mu būminyiwa ūbo akabaminya ng'wikanza īlo wabatūlaga.

²⁷Managi gīkī ī Lina lya ng'wa SEEBA līliza kūfuma kūle, līkūbakaga na kūdundumūka lyochi kūlwa būpelanu bokwe; ū nomo gwakwe gookalile būpelanu, ū lūlīmi lwakwe lūlī gītī moto gūkūligimaga.

²⁸Ī myūyī yakwe īkūfumaga bo nguzu gītī minzī g'ihululu gakūtolomaga gapelanile; gaa kūshisha munhū mu nhingo. A mahanga akūgayūnja yūnjaga ng'wiyūngīlo lya kūyagaagīja; a banhū akūbagwashaga chūma mu saya, wabadutanja abatwalile kūjūjimīīla.

²⁹Alīyo a bing'we mukwīmba lyīmbo gītī ng'wikanza lya būjikū bo shigukulu sheela; mukūyega no ū mu ng'holò jing'we, gīt'ūmo banhū bakayegelaga bayūfuula na mbiilūlū, bajile kū lūgūlū lwa ng'wa SEEBA, ūyo alī Shiganga sha Isilaeli.

³⁰Hūna ū SEEBA akūbīīta a banhū baliigwe ī līlaka lyakwe ly'ikūjo, nū nkono gwakwe bagūbone gūliika mu būpelanu būtaale, na moto gūkūligimaga gūpelanile, na malunde ga nsoke, na mbulà ya mawe na ndabi.

³¹Ī līlaka lya ng'wa SEEBA līkūbakenaagūla a banhū ba Ashulu; akūbatūla na nang'ha gwakwe.

³²Ū SEEBA ūlū alībatūla na nkono gwakwe ū ng'wikanza lya kwilwisha nabo mu būlūgū, būl'ikanza ūlū gwabagwīla ū nang'ha gwa nsango gwakwe gūkūjīlanīja na mihilimo ya ng'oma na malaka ga ndono.

³³Līlīho ipandī lya Tofezi lībeejiwe ng'hana ng'hana; lītūūlilwe ho kūlwa nguno yakwe ū ntemi. Ī lichongo lyaho līsīmbilwe ishimu no, hangī igalī kīngī nasho; nī ng'hwi ja kūpemba moi jilīho jitī ja kūshila; myūyī ya ng'wa SEEBA īkwikaga gītī lūhūhi lwa būgota wa shibiliti kwiza kūgūbacha ū moto.