Read Sukuma Bible 2015 – Bibilia Ilagano Lya Kale 2015 Isaya 32 Bible Online

Isaya 32 - Sukuma Bible 2015 – Bibilia Ilagano Lya Kale 2015 bible

Isaya 32

¹Managi gīkī, Ntemi akūtema mu būtūngīlīja, na basugi bakūsuga mu wīmà.

²Būlī munhū akūbiza gītī īpandī lya kwishīkīja nyaga, gītī ipandī lya kūūbīla mbula nhaale ya ng'heheela; gītī myongo ya minzī ng'witogolo ikalamuku; nūūlū gītī mbeho ya shiganga shitaale mu sī ya notà.

³Hūna abo bakabonaga a miso gabo gatūbbopoma hangī na hado yaya; na a matū ga bigwi gakongeja ū kwigwa.

⁴A biyangūhīlīja mu maganiko bakwanukūla būmani na witegeleja; nū lūlīmi ū lūhaahaatīja lūkūhabūla mihayo mu kwitegelejiwa hape.

⁵Ū mbūūlī atikala akwitanagwa gīkī ntengeke; nūūlū ū wa masala mabi atūhayiwa gīkī nkūjiwa.

⁶Nguno ū mbūūlī akalūngalūngaga ya nyachilū, a maganiko gakwe gakiyūngūūlaga gakūhelaga yabūbi; gīkī abeeje īyo ītī mu nzīla ya ng'wa Mulungu, ikale akūng'hayaga kībi ū SEEBA, abo balī nzala akabalekaga na lūtuubo lwabo gīko, hama abo balī na makoye ga notà akabīngījaga a minzī ga kūng'wa.

⁷Ī nzīla ja ng'wa munhū wa masala mabi jiisalīkile no, akahelaga mihayo mibi, ya būhwahwa wa kūbakenaagūla a bahabī na bagayiwa, nūūlū babize bakūlīlaga mu wīmà.

⁸Alīyo ū munhū ū ntengeke akahela mihayo ya nyatengeke; hangī akīmīīlaga ha shītīle sha nyatengeke.

⁹Bing'we bakīma abo mufulile, būkagi munidegeleke; bing'we a bashīke abo mutī na dīīlīīlī, igwagi īyo nalīyīhaya!

¹⁰Bing'we bakīma abo mukwibonaga mulī mu mhola, gūkūbīta ng'waka na būshiigo būgehu, hūna mugwīlwe makoye madito muyūdetema; nguno a magesa gatilonga, ī lihūlūla mizabibu lītūbiza ho.

¹¹Detemagi bing'we bakīma abo mufulile, zwanganagi a bing'we bashīke, abo mukwibonaga gīkī mulī mu mhola! Zuulagi ī shizwalo shing'we, ng'witunge shizwalo sha magūnīla ū mu mikīmbīlī ying'we.

¹²Itimbagi būlī ng'wene ha shikuba shakwe, kūlwa kwīpīnīhalīla ī migūnda ya shilīwa shingī, nī mizabibu īyo īkatwajaga matwajo mingī,

¹³nī sī ya banhū bane, Ī sī īyo yazwile ming'hwa na magwaata; alichene, nīyo jipīnīhalīlagi pyī ī numba, ūmo banhū bakajaga kūyegela; nū nzengo gwenūyū, ū gwa būsangabazu būtī na būkalīkīle.

¹⁴Nguno bakūlīpeela ī likūlū, ū nzengo gwa banhū bingī gūkūsaaga dalali, a mapandī ga kūpīlīla nī ng'hambī ja bashilikale gakūbiza matogolo madūhū ilalī; gakūbiza mapandī ga kwihebela nzobe na madīīmīlo ga madaale ga ng'holo;

¹⁵kūshisha twitīīlwe Moyo wa kūfuma kwigūlya, nī litogolo līgalūke kūbiza gītī migūnda miponi ya shilīwa; hama ī migūnda ya shilīwa Īyūbonekana gītī mapoolu.

¹⁶Būlamuji bo wīmà būkūtūūla ng'hambī ū kū matogolo, hama ū mu migūnda miponeki ya shilīwa būkwikala moi būtūngīlīja.

¹⁷Hūna ī litwajo lya būtūngīlīja līkūbiza mhola, ū butūngīlīja būkwenha būlembeezu na kūsanya shikū jose ja welelo na welelo.

¹⁸Ū wikalo wa banhū bane būkūbiza mu mhola, mu kaya jilang'hanilwe chiza, na mu mapandī malembeezu ga kwifuulīla.

¹⁹Nīyo nūūlū īkatūla mbula ya mawe ya kūkenaagūla na mapoolu, nū nzengo yūgwikīja shiki shiki pyī ū gose,

²⁰alīyo a bing'we mukūbiza na ningī no, a bing'we abo mukūyūbiba mbīyū mu ng'hilimvwa ya myongo yose, nī ng'ombe jing'we pyī nī nzobe mukūjitaligūlīla jiyūyeela yeela mu kwisandaala.