Read Sukuma Bible 2015 – Bibilia Ilagano Lya Kale 2015 Isaya 33 Bible Online

Isaya 33 - Sukuma Bible 2015 – Bibilia Ilagano Lya Kale 2015 bible

Isaya 33

¹Ūlī mu kwihīga ū bebe nkenaagūji, bebe ūyo ūtaalī kūkenaagūlwa! Ūlī mu kwihīga ū bebe ng'wijomboki, bebe ūyo ūtaalī kwijombokwa! Ūlū ūmala ū kūbakenaagūla a bangī, hūna nū bebe ūkūkenaagūlwa, ūlū lyūshila ī likanza lyako lya kūbijomboka a bangī, nū bebe ūkwijombokwa.

²Ee SEEBA, tūchīlage shigongo, tūkūlindīīlile bebe mu kwisagīlwa; būlī lūshikū ī dilū bizaga nguzu jise, ūbize būpīji wise ng'wikanza lya makoye

³Ūkapalalukaga n'ilaka lyako banhū bapeela, ūlū wabūūka gakabbalasanaga a mahanga.

⁴Bing'we banhū ba mahanga Ī shikolo shing'we īsho ng'wasola bo nguzu shilīkong'onhwa gītī shikūkong'onhagwa na būtondo wa njige; a banhū bakūshiikīndīkīīlaga gītī ibità lya njige.

⁵Ū SEEBA ng'wene ngūngūhiwa, wikalo bokwe būlī kwigūlya; ī Sayuni akwīyokaja kalamulīle ka wīmà na būtūngīlīja.

⁶Akūbiza nguzuhya wa makanza gako, akūbiza būpīji būtaale, na masala na witegeleja; ū logohano lwa ng'wa SEEBA h'ī sabo ya mpango ntaale ū mu yose yenīyī.

⁷A bagosha babo ba mbagashūūla bakūhūūlūūlaga kū mapanda, a batūmījiwa ba kūkooba mhola nabo balīīlīla mu kūsaatwa kūtaale.

⁸Ī nzīla jape ī haha, jilī dalali; atīho nūūlū wa kūshimīza mu mapanda. Ī lilagane lyakenaagūlilwe, a batūūji balyo bakūsondagūlagwa, atīho ūyo akwinhagwa ikūjo.

⁹Ī sī īlī buyīkī īkūlīlaga ng'hūngū, Ī Lebanoni yūmile yagookile; ī Shaloni nayo ī haha ītikīlile n'itogolo ikalamuku, ī mitī ya Bashani nī Kalimeli yayūgūkile pye a madūūtū gayo.

¹⁰“Alilūūlū ī haha nakūbūūka,” SEEBA alīhaya. “Ī haha nakwigūngūhya, nakūlyolecha ī likūjo lyane.

¹¹Mukūbūūchaga nda ja meela ng'wayūbyala pūngu; ī myūyī ying'we gūlī moto gwa kūmujija bing'we benekīlī.

¹²A banhū bakūpya banogele babize gītī swakala, bakūbaka gītī masaka ga ming'hwa, gapuugilwe.”

¹³Bing'we abo mulī kūle yigwagi īyo nīyītile; na a bing'we abo mulī hihī witegelejagi ū būdūla wane!

¹⁴Ū mu Sayūni balī na boba no Ī haha a bīīti ba shibi, a ba malofu bakūdetemaga dūhū. Bakwibūjaga, “Nani ū mu bise ūyo adūgije kwikala hamò nago ū moto ūyo gūkūnogotejaga gwenūyū? Nani ūyo adūgije kwikala nabo ū būsebu wa moto gwa būja na būja gwenūyū?”

¹⁵Munhū wa shimīzīle ītūngīlīgije, ūyo kalūngalūngīle kakwe kalī wīmà, hangī alemile kūpandīka shose shose mu nzīla ja wiboneeji, na a makono gakwe agalemegije kwanukūla sha kūhongwa, ūyo matū gakwe akagachibījaga kū būsīīgani wa nyabūlagi, na a miso agalilimije ū kū yabūbi;

¹⁶ū ng'wenūyo h'ūyo akwikala ho a higūlya, ū būpīlīlo wakwe būkūbiza ng'wipilinga lya mawe. Ī shilīwa akwinhwa na a minzī atūgayiwa.

¹⁷A miso gako gakūmona ū Ntemi ū mu wiza bokwe; gakwībona ī sī īyo īkagije kūle ū būgalī galī wayo.

¹⁸Īyo yakūdetemyaga īkūbiza ya kwīyideedeng'hanya mu maganiko gako kūnū ūkwibūjaga, “Alī halī ū ng'wandīki? Nū nsoleleja wa goodi alī halī? Nū ntaale wa ng'hambī ja bashilikale nang'hwe alī halī?”

¹⁹A bikumīlīja ba mbika yenīyo ūtalababona hangī, a banhū ba kalūngalūngīle kageni, a ba ndīmi ja kūyomba gītī bakūhahaatījaga, yayūfuma mihayo milambu kwīyitegeleja.

²⁰Lolaga ī Sayuni, kū nzego gwise gwa kūyegela mu shikū ja shigukulu; ūkwībona ī Yelusalemu na miso gako, ū gwenūyo nzengo gwa mhola; iheema lītī lya kūsaamiwa, Ī mambo jalyo jitaladubbūlwa, hama nūūlū lūmò lwa ngoye jalyo lūtīko kūtīnwa.

²¹Nīyo ū kwenūko ū SEEBA akūbiza Wabūdūla ū kū bise, līkūbiza gītī ipandī lya myongo migalī na njonga ja kūsela minzī. Ī lyenīlo lītī ipandī lya kūbītīla mo mato ga kūbugwa bo ngahi, nūūlū meli ja būlūgū.

²²Nguno ū SEEBA alī Namuji wise, ū SEEBA hū ng'wene ū ng'winhi wa shilagīlo shise, hū ng'wenūyo ū ntemi wise; hū ng'wene akūtūpīja.

²³Ī ngoye jako jitelile, jitūdūla ū kūgūhandatīla ū nongoodi, nūūlū ū kūlīgoloola ī litanga. Nose shikolo shingī shikūgabanhwa; kūshisha na balemehazu hose bakūpandīka sha kūjana.

²⁴Ū mu bajiga jiga atilonga mo nūūlū ūmò wa kūhaya gīkī, “Ū nene nalīsaata!” Nī shibi sha bazengi ba ng'wenūmo shikūlekejiwa.