Read Sukuma Bible 2015 – Bibilia Ilagano Lya Kale 2015 Isaya 36 Bible Online

Isaya 36 - Sukuma Bible 2015 – Bibilia Ilagano Lya Kale 2015 bible

Isaya 36

¹Ū mu ng'waka gw'ikūmi n'īnè gwa būsugi wa ntemi Hezekia, ntemi Senakelibu wa Ashulu akīdumīla pyī ī mizengo ya mu sī ya Yuda, īyo yalī īpīndīlījiwe ndugu kūshisha wīdima.

²Hūna ū ntemi wa Ashulu ūntūma ntaale wa bashilikale bakwe, kūfuma Lakishi, ūja ī Yelusalemi alī n'ibità itaale lya bashilikale, kūnsanga ū ntemi Hezekiya. Ū ntaale wa bashilikale ūūkīmīīla ha nzīla ya kūja kwilaale lya mfuji wa myenda, haho na ngoka gwa kūfuma kwilambo lya kū ngūngūli.

³Ntaale wa batūmami ba ng'wikūlū, Eliakimu ng'witūnja o ng'wa Hilikia, ūja ko kūmona; walī na ba Shebuna, ng'wandīki, na Yoa, ng'wana Asafu, ūyo walī kalaani.

⁴Ū ntaale wa bashilikale ūbawīla, Ū Hezekiya ng'wīlagi gīkī, “Ū ntemi ntaale, ū ntemi wa Ashulu, alīhaya: Ūlī na kūsanya kī nose wīte lūgiili giili gīko?

⁵Īkī ūkwikumīlījaga ūhaya gīkī ī mihayo yako īhelilwe chiza, na gīkī ūlī n'ibità lya nguzu; tūhaya ī yenīyo mihayo dūhū ndūhū mo nū gwa ng'hana! Ī gīsī ūyo ūkūng'wisagīlagwa nani nose ūlīnigomela ū nene?

⁶Managa gīkī, ī Misili īyo ūkwīsanyaga īlī gītī nang'ha gwibīngobīngo lībīnzīkile, īlo ūlū munhū ūlīdima hūna ūlīsendamīla līshikile kūnchima mu shiganza lyūlibīla! Ū Falao, ū ntemi wa Misili h'ūmo alī ū kū bose abo bakansendamīlaga.”

⁷Hama nūūlū ūnishokeje, “A bise tūnsanije SEEBA Mulungu wise;” ī gīsī atī ng'wene ūyo Hezekiya wīngije mapandī gakwe ga higūlya, na myalīlo yakwe, hūna ūgwa kūbawīla banhu ba Yuda nī Yelusalemu, “A bing'we shing'wigeleelilwe kūyūlamya kū būtongi bo ng'walīlo ūyū dūhū?”

⁸Alilūūlū, ī haha egaga shose shose ū kūlī baba būgonzo, ū ntemi wa Ashulu; ū nene neega falasa shihūmbī shibīlī, ūlū ūdūla ū bebe kūpandīka bashilikale ba kūjidamhīla.

⁹Ū bebe ūkwisagīlagwa kūpandīka magogoteni ga būlūgū na badamhīji ba falasa kūfuma Misili, ūdūgije gete kūng'wīmīla nūūlū ūmò wa batūmami ba ng'wa baba būgonzo a bado bado?

¹⁰Hama hangī a higūlya ya yenīyo, ū bebe ūliganika naabūūkile dūhū ū nene ū kwiza kwīdumīla na kwīkenaagūla ī sī yenīyī, nū SEEBA yaya ū kūmana? Angū ū SEEBA ng'wenekīlī h'ūyo waniwīlile, “Īsangage ī sī yenīyo, ūkīkenaagūle.”

¹¹Hūna a ba Eliakimu, Shebuna nū Yoa, būng'wīla ū ntaale wa bashilikale, “Ka nahene shi lūūlū baba nkūjiwa tūlīkwikūmbīlīja ūtūwīle a bise batūmami bako mu lūlīmi lwa Shialamayo, nguno tūlūmanile. Yaya ū kūtūwīla mu lūlīmi lwa Shiyudaya, kūnū baliigwa na a banhū abo balī ha ndugu.”

¹²Alīyo ū ntaale wa bashilikale ūbashokeja, “A bing'we muliganika ū baba būgonzo wanitūmile ū nene kwiza kwīhaya ī mihayo yenīyī kūlī sīng'we būgonzo na bing'we dūhu, yaya ū kū banhū abo balī ha ndugu? Ū nene nalībawīla na a benabo, nguno nabo shibigeleelilwe balye maashi gabo na kūng'wa mine gabo, gīt'ūmo mukwītīla dūhū a bing'we.”

¹³Hūna ū ntaale wa bashilikale ng'wenūyo ūbūūka, ūhamuka n'ilaka lya higūlya mu lūlīmi lwa Bayudaya akūhayaga, “Bing'we yigwaagi ī mihayo ya ntemi ntaale, ū ntemi wa Ashulu!

¹⁴Ū ntemi alīhaya gīkī, ‘Lekagi ū kūnzunīlīja ū Hezekiya ikale akūmulembagūlaga; nguno atī nabo ū būdūla wa kūmupīja!’

¹⁵Nīyo yaya gete ū kūnzunīlīja ū Hezekiya ikale ūmulemba mihayo ya kūnsanya SEEBA; akūmuwīlaga gīkī, ‘Ū SEEBA akūtūpīja dūhū, ū nzengo gwenūyū gūtūtūūlwa mu nkono gwa ntemi wa Ashulu.’

¹⁶Lekagi ū kūndegeleka ū Hezekia; ū ntemi wa Ashulu alīhaya gīkī, ‘Nzūgi kūnū kūlī nene tūlomane mihayo ya kūtūūla mhola. Hūna būlī ūmò wing'we akūlya matwajo ga mizabibu yakwe, na ga mitiini yakwe, na akūng'wa minzī ga mu lwizī lwakwe ng'wenekīlī;

¹⁷kūshisha aho nalizīle kūmusola namutwale kū sī ya kūbiza gītī ī ying'we yenīyo; sī ya shilīwa na divai ningī, sī ya būgalī būtī bo kūshila na migūnda ya mizabibu ya būyaga.’

¹⁸Lekagi ū kūndegeleka ū Hezekia, nguno alīmujimīīja kūlwa kwikala ūmuwīla gīkī, ‘Ū SEEBA akūtūpīja.’ Ī gīsī alīho mulungu kī w'ihanga lyose lyose ūyo wabīta kūpīja sī yakwe kūfuma mu nkono gwa ntemi wa Ashulu?

¹⁹A bamulungu ba Hamasi na Alipadi balī halī? Al'a bamulungu ba Sefavaimu nabo balī halī? Angū, bakadūja ū kwīpīja ī Samalia ū kūfuma ū mu nkono gwane?

²⁰Ū mu bamulungu bose a ba mu sī jenīji, nani ūyo wabīta kūpīja sī yakwe kūfuma mu nkono gwane? Al'ū SEEBA lūūlū, ū ng'wene akūdūgīja he ū kwīpīja ī Yelusalemu ū kūfuma ū mu nkono gwane?”

²¹Alīyo a banhū balī sele sele dūhū, batanshokegije mhayo gose gose; nguno ū ntemi walī wabalagīja ūbawīla, “Mutizūnshokeja mhayo.”

²²Hūna ū ntaale wa batūmami ba ng'wikūlū, ū Eliakimu ng'witūnja o ng'wa Hilikia, nū Shebuna, ū ng'wandīki, nū Yoa, ng'wana Asafu, ūyo walī kalaani, būja ū kūlī Hezekia; būūkampuunīla ī shizwalo shabo shitandagūkile, būng'wīla īyo akīhaya ū ntaale wa bashilikale ng'wenūyo.