Read Sukuma Bible 2015 – Bibilia Ilagano Lya Kale 2015 Isaya 38 Bible Online

Isaya 38 - Sukuma Bible 2015 – Bibilia Ilagano Lya Kale 2015 bible

Isaya 38

¹Ū mu shikū jenījo ū Hezekia akasaata, ūsaaja ikanza iguhī ache. Ū ng'hangi Isaya, ng'witūnja o ng'wa Amozi, ūja koi; aho washika ūng'wīla, “Ū SEEBA alīhaya gīkī, ‘Īgolanyage chiza ī mihayo ya ha ng'wako, nguno ūkūcha; ūtūpīlaga.’”

²Ū Hezekia ūgalūkīla kū ndugu ūnomba ū SEEBA alīhaya,

³“Ee SEEBA, izūkagwa ūmo nalūshimīzīlaga kū būtongi wako, mu būshikanu na ng'holò ya kwifunya kwa ng'hana; nū mu miso gako nalīītaga yawiza.” Ū Hezekia ūlīla mu kūsaatwa kūtaale no.

⁴Hūna ū mhayo go ng'wa SEEBA gūng'wizīīla ū Isaya gūlīhaya gīkī,

⁵“Jaga ūkang'wīle ū Hezekia, ‘Ū SEEBA ū Mulungu o ng'wa Daūdi nkūlūgenji wako alīyomba gīkī, Naakwigwaga ū kūlomba kwako, nī shisoji shako nashibonaga, nakūkongeja myaka ikūmi n'ītano a ha būlamu wako.

⁶Nīyo nakūkūpīja ū bebe nū nzengo gwenūyū kūfuma ū mu nkono gwa ntemi wa Ashulu, nakūgūlwīlīīla ū nzengo gwenūyū.

⁷Ī shimanīkījo sha kūfuma kūlī SEEBA kūlwa koolekeja gīkī ū SEEBA akūgwīta ū mhayo ūyo wakwisagījaga shiishi:

⁸Ī mbeho īyo yikaga malinhīlo ikūmi a ha ngaji ja ng'wa Ahazi kūlwa kūdeema kwa līīmi, nakwīyīta īshoke numa a ha malinhīlo ikūmi genayo.’” Na ng'hana ī līīmi lyūshoka kū numa, nī mbeho yūlinhūka a ha malinhīlo ikūmi genayo.

⁹Lyīmbo lya ng'wa Hezekia, ntemi wa Yuda, īlo akandīka aho wapīla kūfuma mu būsaatu ūbo walī wasaata.

¹⁰Nakalīla nalīhaya, “Ūmo nataalī ndinha gīkī, ningīle mu shigila gete, nibūlī nalechiwe ū kwīshikanya ī myaka ya būlamu wane?”

¹¹Nūhaya, “Natūmona hangī lūūlū ū SEEBA, biya gete ū SEEBA ū mu sī ya bapanga; na a banhū natalababona hangī ū mu sī ya bapanga.

¹²Ū būlamu wane nalīsapujiwa gītī ng'hambī ya ndīīmi, būlīnīngīla gete; naabūlingile ū būpanga bone gītī nduutya wa būlūba; wei ng'wenekīlī wanitīnile gītī būlūba ha nduutyo. Līīmi tole na būjikū pe ūkūnimalījaga bebe.

¹³Nakwejaga būjikū nalindanile mu kwisagīlwa, alīyo wabizile gītī shimba, wagapaanagūlile pye a maguha gane. Līīmi tole na būjikū pe ūkūnimalījaga bebe.

¹⁴Naalīlile no gītī soomhe nūūlū nuunu; gītī ng'hūūlū īkūdaayaga. Nose a miso gane gaamalile ī nguzu kūlwa kūlangamīla kwigūlū. Ee Seeba nalī mu makoye nigunage.

¹⁵Ī gīsī lūūlū nalī na gūlī ū gwa kūhaya ī haha? Nguno waniwīlile gīkī wei ng'wenekīlī wagwītile ū gwenūyū! Kūlwa nguno ya kūsaatwa kūtaale ū mu būpanga wane, ū nene nakūbiza munhū wa kūshimīza mu kwilang'hana pyī ī shikū ja būlamu wane.

¹⁶Ee Seeba, a banhū bakapandīkīlaga būpanga ū mu yenīyī; nū nene ū būpanga wa moyo gwane būlī mu mihayo yenīyī. Nihīmbūūchage, napīle.

¹⁷Gashi ī gete ū nene nalūkoyaga mu kūsaatwa kūtaale kūlwa solobo yane nene ng'wenekīlī. Alīyo kūlwa kūnitogwa wanilang'hanile natizūgwīla ng'wichongo lya būkenaagūku; pyī ī shibi shane washiponije kūle, kū numa yako.

¹⁸Nguno ī kūlimu ītūdūla kūkūkumīlīja, a bafu batadūgije kūkūgongoola; na a babo bakūtulumenhelaga kwika ng'wichongo batīko kūwisagīlwa ū būsanyiwa wako.

¹⁹A bapanga, a bapanga hū bene abo bakakūkumīlījaga, gīt'ūmo nalīītīla lelo ū nene; a babyaji bakabamanīkījaga baana babo ī ya būsanyiwa wako.

²⁰Ū SEEBA akūnipīja, hūna lūūlū tukūng'wīmbīla shikū jose ja būlamu wise, kūnū na ndono jikūtūlagwa ū mu hekalu ya ng'wa SEEBA.”

²¹Hūna ū Isaya ūhaya gīkī, “Shiginagi tiini mubandīkīje a h'ibaale lyakwe akūpīla.”

²²Ū Hezekiya walī wabūūja gīkī, “Shikūbiza ho shimanīkījo kī ī sha koolekeja gīkī nakūlinha naje nakingīle ū mu hekalu ya ng'wa SEEBA?”