Read Sukuma Bible 2015 – Bibilia Ilagano Lya Kale 2015 Isaya 39 Bible Online

Isaya 39 - Sukuma Bible 2015 – Bibilia Ilagano Lya Kale 2015 bible

Isaya 39

¹Ū mu shikū jenījo ntemi wa Babuloni, Melodaki-baladani, ng'wana Baladani ūtūma banhū ū kūlī Hezekiya, nguno akigwa gīkī wapīlile kūfuma mu būsaatu, būja na nyalūba n'inong'ho lya kūng'winha.

²Ū Hezekia ūbanukūla na būyegi a batūmījiwa benabo; ūboolekeja ī shikolo shakwe sha mpango, īsho walī abīkile mu numba ya kūbīkīla sabo jakwe; jalīmo feza, zahabu, shisanjo sha mu shilīwa, maguta gawiza, nī shilanga shakwe sha būlūgū ī shose; nīyo pyī ī shikolo īsho walī ibīkīgije ū mu numba yakwe ya kūbīkīla. Ū Hezekia atalekeelile shose shose ū mu numba yakwe nūūlū ū mu būsugi wakwe, īsho ataboolekegije a banhū benabo.

³Hanuma ya henaho, ū ng'hangi Isaya ūja ū kūlī Hezekia ūūkamūja, “A banhū benabo balūhayaga kinehe, na baafumaga halī?” Ū Hezekia ūshosha, “Bafumaga sī ya kūle, bafumaga ma Babuloni banigenihaga nene.”

⁴Ū ng'hangi ūbūūja hangī, “Ū ng'wikūlū lyako babonaga mo kī?” Ū Hezekia ūshosha, “Babonaga pyī ī shikolo īsho shilī mu numba y'ikūlū lyane; ū mu shikolo shane shose īsho nabīkile shitīho nūūlū shimò īsho nataboolekegije.”

⁵Hūna ū Isaya ūng'wīla ū Hezekia, “Alī lūūlū, gwigwage ū mhayo go ng'wa SEEBA wa mabità.

⁶Managa gīkī ikanza līkūshika, pyī ī shikolo īsho shilī ng'wikūlū lyako, kwandīja īsho shabilingījiwa na bakūlūgenji bako kwīngīīla kale kūshisha lelo īyī, shikūbūūchiwa shitwalwe Babuloni; shitūsaaga ho shose shose, alīhaya SEEBA.

⁷Hanuma na bamò ba babyalwa bako, abo bafumile mu mininga gako na mīlī gwako bebe ng'wenekīlī, bakūding'wa batwalwe bakasoloolwe babize basese ng'wikūlū lya ntemi wa Babuloni.”

⁸Ū Hezekia ūnshokeja ū Isaya, ūhaya gīkī, “Ū mhayo go ng'wa SEEBA ūyo wagūyombaga gwene gūtūngīlīgije dūhū.” Nguno wiganikaga, “Ū mu shikū ja būlamu bone īkūbiza mhola na kaholele.”