Read Sukuma Bible 2015 – Bibilia Ilagano Lya Kale 2015 Isaya 41 Bible Online

Isaya 41 - Sukuma Bible 2015 – Bibilia Ilagano Lya Kale 2015 bible

Isaya 41

¹Bing'we majinga huumūlagi sele munidegeleke! A banhū ba mahanga ni biguzuhyage būpya, bafumile hape bahabūle! Tūmanhījagi ha lūgiko tūlamulwe.

²Nani ūyo wangūngūhije ū wa kūfuma kīya ūng'wegeleja mu būtūngīlīja, gīkī aje akūpyenaga hose hose? Akūng'winhaga mahanga būlī kwene, na kūnyalabīja batemi kūlwa nguno yakwe. Akūjaga ūbaseesagūla na līlūshū lyakwe babiza lūbuubu lwike, ū būtà bokwe būkūbagalūchaga meela ga kūheheejiwa nyaga.

³A banishi bakwe akūbadolomyaga bo nhambo, shitīho sha kūng'ogohya nūūlū mu nzīla ījo ataalī kūjibītīla na kamò.

⁴Nani ūyo wagūtūmama ūgūshikīlīja ū mhayo gwenūyū? Ū ng'witani wa shibyalīlwe kwīngīīla wandījo wa yose nani? Nene SEEBA, ūyo nalīho hamò nabo kūfuma kū wandījo, nene ng'wenekīlī hū nalī hamò nabo kūshisha kū būkalīkījo.

⁵A majinga gilolekegije gogoha, na a mapandī a gose gakūdetemaga, kūshika kū būkalīkījo wa sī. Bakwizaga, bakwegeelaga;

⁶būlī ng'wene akūngunanhaga nzenganwa ng'wiye, nū ndūgūye akūng'wīlaga gīkī, “Timbyaga ng'holò!”

⁷Ū koolī akūntimbyaga ng'holò ū nsuji wa shikolo sha zahabu, nū wa nīmo gwa kūshitūla na nundo akūnkomigaga ū nūnganya washo. Ūlū shaabiwa shadimana wayūkumīlīja akūhayaga, “Yū shabeela būlī,” hūna washikoma na mizumali shidame, shoye ū kūnegena.

⁸Alīyo ū bebe Isilaeli ntūmami wane, bebe Yakobo ūyo naakūkoma, ūyo ūlī būbyīle o ng'wa Abulahamu ū nwani ng'wichane,

⁹naakwīnja kūle no, kū būkalīkījo wa sī; naakwitana kūfuma kū ngelelo ya sī, nūkūwīla gīkī, “Ū bebe ūlī ntūmami wane;” nene ng'wenekīlī naakūsola, nataalī ū kūkūponya.

¹⁰Yaya ū kogoha, ū nene nalī hamò nang'ho, lekaga ū kwiganīlīja, nguno ū nene nalī Mulungu wako. Nakūkūguzuhya, hama nakūkūguna; nakūkūdima na nkono gwane gwa būlyo, nkono gwa būtūngīlīja.

¹¹Managa gīkī pye abo bakūkwilumīlaga ng'haya bakūpondwa soni, bakūgooka; abo bakwilwisha nang'ho bakūbiza batikīlile na dalalī, nīyo bakūyagaala.

¹²Nūūlū ūbakoobe a banishi bako, ūtūbapandīka. Abo bakūkūbūūkījaga būlūgū batikīlile na dalali gete.

¹³Nguno ū nene SEEBA hū nalī Mulungu wako, nakūdimile ū nkono gwako gwa būlyo; hama ū nene nalīkūwīla gīkī, “Lekaga ū kogoha, nakūkūguna.”

¹⁴Na ng'hana ū bebe Yakobo ūlī ndo no, ūtikīlile na kagino dūhū. Alīyo lekaga ū kogoha, nguno nene ng'wenekīlī nakūkūguna, alīhaya SEEBA, ū Nkomoji wako; ūyo alī Ng'wela wa Isilaeli.

¹⁵Managa gīkī nakūkwīta ūbize itūlīlo ipya, nīyo lyūūgī hama līlī na mino. Ūkūjitūlagūla ī ngūlū ūjisambaaje, lelo ī shigūlū ūkūshiseesagūla shibize gītī meela.

¹⁶Ūkūjiheheeja jije na nyaga, nshūūlūlū gūkūjisambaaja jigaye ho. Alīyo ū bebe ūkūyegela mulī SEEBA, ūkwikumīlīja kūlwakwe ū Ng'wela wa Isilaeli.

¹⁷A bahabī na a bagayiwa bakūkoobaga minzī, kwike gatīho; Ī ndīmi jabo jilīminyiwa būkalamuku kūlwa notà. Alīyo ū nene SEEBA nakūbashokeja, ū nene Mulungu wa Isilaeli natūbīība.

¹⁸Nakūtandūla myongo ya kūhūūma minzī mu magūlya makalamuku, nū mu mbūga ja sī ya ntubīlo nakūdūla mo nzwīlo ja minzī; ī litogolo ī likalamuku nakūlyokaja mataba ga minzī, nī sī ya notà nakwīyīta ībize na nzwīlo ja minzī.

¹⁹Ū ng'witogolo ikalamuku nakūzwisha mo nkoola na ng'wininga, gūkwilonga na nkoonòla, pyī nū nzeituni. Nū ng'wibbaala īlo līlī buyīkī nakūtūūla mo mizule, mibanga nayo īkūsanganīkīla na mibanga.

²⁰A banhū bakūbona bamane, bakwideedeng'hanya bitegeleje, gīkī ū nkono go ng'wa SEEBA hū gwene gwībeegije ī yenīyī; Ng'wela wa Isilaeli h'ūyo wīseemile.

²¹Al'īyombagi ī mihayo ying'we, alīhaya SEEBA. Boolechagi ū būkaanīji wing'we, alīhaya ū Ntemi o ng'wa Yakobo.

²²Benhagi a bamulungu bing'we batūsomboolele īyo īlabize ho. Tūwīlagi nī yīyo yabīta kale twīyideedeng'hanye, tūmane ī ng'halīlo yayo. Nūūlū tūwīlagi ī ya kū shikū ījo jiliza.

²³Tūmanīkījagi ī mihayo ya makanza ga kū būtongi, tūmumane gīkī mulī bamulungu. Ītagi mhayo nūūlū gūmò; ni gūbizage nsoga nūūlū mi, gūtūkamaaje tūng'ogohe.

²⁴Alīyo ū gwa ng'hana gūlī gīkī, a bing'we mutikīlile na kūdūhū; nī milīmo ying'we īlī dalali gete. Ū wa kūmusola kūmulamya, ū ng'wenūyo wa malofu.

²⁵Nangūngūhije wa kūfuma sukuma, na ng'hana akwiza; īngīīlile kū būfuma līīmi. Hū ng'wene akūlitana ī lina lyane; akūpandagīlaga basugi gītī tembe, gītī mūmbi akūlubaga ibūmba.

²⁶Nani ūyo wīkumūcha ī yenīyī kūfuma ha wandījo gīkī twīyitegeleje; nūūlū nani wīhaya kūko ītaalī kwilonga, tūnkumīlīje tūkūhayaga, “Yū watūngīlīgije ū ng'wing'wana?” Atīho ūyo wīhaya ī yenīyī, atīho ūyo wīkumūcha; ndūhū nūūlū ūmò ūyo wīyigwa Ī mihayo ying'we.

²⁷Ū nene hū nalī wa kwandya ū kwīkumūcha ū mu Sayuni nakūhayaga, “Ī mihayo īlī gīkī na gīkī!” Hū nene nakītūmīla ī Yelūsalemu ng'wenhi wa ng'hūlū jawiza.

²⁸Alīyo ūlū nalola natūbonaga ose ose; ū mu bose benaba atīho wa kūfunya būganikīji nūūlū ūmò; nūūlū nakababūūja mhayo atīho wa kūnishokeja.

²⁹Managi gīkī pye a benaba batī na gwa kūpya; nī milīmo yabo ya sagala dūhū; ū mu shiikolile shabo gūtīmo gwa ng'hana, ūlū ītī lūyaga na mayanga kwike.