Read Sukuma Bible 2015 – Bibilia Ilagano Lya Kale 2015 Isaya 42 Bible Online

Isaya 42 - Sukuma Bible 2015 – Bibilia Ilagano Lya Kale 2015 bible

Isaya 42

¹Nolagi ū Ntūmami wane ūyo nang'handīkīīgije nene, hū ng'wene ū Nsolwa wane, ūyo ng'holò yane yīnyegelile; nakūntūūlīla Moyo wane, hū ng'wene akwenha būtūngīlīja kū mahanga.

²Atalahamuka nūūlū atalayoganya; nūūlū kūyombela higūlya n'ilaka lyakwe mu mapanda.

³Nūūlū kadete kalabūkile atīko kūkamalīja. Hangī nūūlū kalūtambī kakūzukīīlaga lyochi atīko kūkajimya. Akūtūūla būtūngīlīja kūlwa kūsanyiwa kwakwe.

⁴Ataliganīlīja, nūūlū kūgwa ng'holò, kūshisha atūūle būtūngīlīja ū mu sī. Hama ū kwisagīlwa kwa majinga gose kūkūbiza mu shilagīlo shakwe.

⁵Ū Mululungu ū SEEBA, hū ng'wene wagaseema a mapandī g'igūlū, h'ūyo wagamba gītī ngeka, nī sī wīgoloola wei wītūūlīla nī shose īsho shilī muyo; na a banhū abo bakikalaga higūlya yayo bakūyeela yeelaga, wei akabinhaga ī myūyī nū būpanga:

⁶“Nene SEEBA, naakwitanile mu būtūngīlīja; nakūkūdima ū nkono gwako, nakūkūlang'hana, na nakūkūtūūla kūbiza ilagane kūlwa nguno ya banhū,

⁷kūbaloleecha miso a babboku; kūbinha wiyaabī abo balī mu būtungwa, na kūbalugūlīla bafume hanze abo bigashije mu jeela sha giiti.

⁸Ū nene nalī SEEBA, h'ī lina lyane ī lyenīlo! Ī likūjo lyane natūng'winha ūngī; nūūlū ū kūkumīlījiwa kwane natūgalekela mashiikolile.

⁹Managi gīkī ī ya kale īlīho, hama ī haha nalīyīhaya yīngī mipya; nalīmumanīkīja kūko ītaalī kwilonga.”

¹⁰Ng'wīmbīlagi ū SEEBA lyīmbo ipya, nkumīlījagi hose pye kūshisha kū ngelelo ya sī; bing'we abo mukikaga kūja kū manyanza, nī shose īsho shilīmo; bing'we majinga na a bikaji baamo.

¹¹Ī litogolo nalyo līhīlīīle, nī mizengo īyo īlī ng'wenūmo, na a bikaji ba Kedaali bayege ū mu magūngūli gabo. A banhū ba Sela nabo bahelelekeje kwīmba na būyegi, bahamuke n'ilaka balī kwigūlya ya ngūlū.

¹²Ni bang'winhage ikūjo ū SEEBA, bangongoole kūlwa kūkumūcha ū mu majinga.

¹³Ū SEEBA akūfuma akwiyoolechaga gītī munhū wa būdūla, ū wilu bokwe būkūsala gītī nshilikale mu būlūgū; akūlīja ng'wano n'ilaka lya higūlya, kūnū akwitongaga mihayo ya mu būlūgū. A banishi bakwe akūbapyena kībi kībi.

¹⁴Naahumulile ikanza ilīhu no, nakwikalaga sele nalembeelile mu kwilang'hana. Alīyo ī haha nakūlīla, nakūpīmīla; nakūhezela gītī nkīma akūlumagwa būsūngū ng'wikanza lya kūbyala.

¹⁵Nakūjikenaagūla ī ngūlū Ī nhaale nī ndo; nakūshūmīcha pyī īsho shizwile mo. Nī myongo nakwīgalūcha ībize majinga, a malambo nago gakūūma kūlū kūlū.

¹⁶A babboku nakūbatonga mu nzīla Īyo bataalī kwīmana; nakūbabītya mu makūūwa ayo batagamanīīlile. Ī giiti nakūja nakūshigalūchaga kūbiza isana ū kū būtongi wabo, na a mapandī ga magagala nakūja nakūgasheeshaga. Ī mihayo yenīyī h'īyo nakwīyīta, natūbagumanīja.

¹⁷Alīyo bakūshoshiwa kū numa hangī bakūgooka no, abo kwisagīlwa kwabo kūlī ha shiikolile sha kūlamiwa; abo bakashiwīlaga gīkī, “A bing'we mulī bamulungu bise!”

¹⁸Bing'we baagulu, degelekagi ng'wigwe; bing'we babboku, lolagi mubone!

¹⁹Ī gīsī nani ū mboku ūlū at'ū ntumami wane, nū gulu nani ūyo abange gītī ntūmījiwa wane ūyo nantūma nene? Nani ū mboku wa kūlenganīla nū yūyo wifunya kūbiza wane, ū mboku gītī ntūmami o ng'wa SEEBA?

²⁰Ūkūbonagà mihayo mingī, alīyo ū kwīdīlīla biya. A matū gako gatachibile, alīyo ū kwigwa ndūhū.

²¹Gūkanyeja ū SEEBA gwa kūshigūngūhya ī shilagīlo, ūshinha n'ikūjo kūlwa nguno ya būtūngīlīja wakwe.

²²Alīyo a banhū benaba bading'wa būsese, biboneelwa būtaajiwa shose pye. Bose pye balī mu gatī ya machongo bagwashiwe mitego, babisilwe mu jeela mhine. Balī mu būding'wa, alīyo batī na wa kūbaguna, biboneelwa būtwalwa nding'wa, alīyo ndūhū nūūlū ūmò wakūhaya, “Bing'we bashoshagi!”

²³Ī gīsī ū mu bing'we nani ūyo akwīyigwa ī yenīyī? Nani akūdīlīla kūdegeleka ū ng'wikanza īlo līliza?

²⁴Nani ūyo akantūūla ū Yakobo mu makono ga biboneeji bantaaje shose? Al'ūyo akantūūla ū Isilaeli mu makono ga badīīmi bakwe nani? Angū, atī ng'wene ū SEEBA, ūyo twang'wītīla shibi? Nguno baalī batatogilwe ū kūshimīzīla ū mu nzīla jakwe; nī shilagīlo shakwe baalī batatogilwe ū kūshilondeela.

²⁵Hūna lūūlū akabahooleela moto gwa būpelanu bokwe, būlūgū būdito. Ū moto gūkabapīndya hose hose, alīyo batatiyūkile; gūkababbiisha, alīyo batideedeeng'hanije ū mu ng'holò jabo.