Read Sukuma Bible 2015 – Bibilia Ilagano Lya Kale 2015 Isaya 43 Bible Online

Isaya 43 - Sukuma Bible 2015 – Bibilia Ilagano Lya Kale 2015 bible

Isaya 43

¹Alīyo lūūlū ī haha bebe Yakobo, bebe Isilaeli, ū SEEBA ūyo wakūseema na kūkūbūmba alīhaya, “Lekaga ū kogoha, nguno naakūkomoolile, naakwitanile lina lyako; ū bebe ūlī wane.

²Ūlū ūbīta mu minzī mashimu, nakūbiza hamò nang'ho; nūūlū ūbīte mu myongo ya minzī Ītūkūjaana. Nūūlū ūbīte mu moto gūtūkūbbiisha, Ī ndali jago jitīko kūkoocha.

³Nguno ū nene nalī SEEBA Mulungu wako, ū Ng'wela wa Isilaeli, na Mpīja wako. Nalīfunya Misili kūlwa kūkūkomoola bebe; ha ng'wanya gwako nalījifunya Esiopia hamò na Seba.

⁴Nīyo ū bebe īkī ūlī wa mpango ntaale, hama ū kūlī nene ūlī nkūjiwa, nīyo hangī īkī nakūtogilwe no, nalīfunya banhū gīkī ūpīle, ng'anda ja banhū ha ng'wanya gwa būpanga wako.

⁵Ūtogohage, nguno ū nene nalī hamò nang'ho; a baana bako nakūbenha kūfuma ī kīya, nū kūfuma ī ng'weli nakūkūkobya.”

⁶Ī sukuma nakwīwīla gīkī, “Balekelage!” Ī dakama nayo nakwīwīla, “Ūtabadimīīlage.” Benhagi a bitūnja bane abo balī kūle, na a bashīke bane bize kūfuma hose hose ū mu sī,

⁷būlī ng'wene ūyo akwitanīlagwa kū lina lyane, ūyo nanseema kūlwikūjo lyane, ūyo namūmba na kūmeeja.

⁸Benhagi a banhū abo balī na miso alīyo babboku, na a matū balī nago alīyo batigwaga.

⁹A mahanga ni gikobyage pye a gose, bibilinge pye a banhū. Ī gīsī ū mubo, nani ūyo wabīta kwīhaya ī yenīyī, nani watūkumūkīja ī ya kale? Ni babenhage a bakaanīji babo bafunye ū būkaanīji wabo bīyooleche ī ng'hana, na a banhū a bangī bigwe bahaye, “Ya ng'hana ī yenīyo!”

¹⁰Ū SEEBA alīhaya gīkī, “A bing'we mulī bakaanīji bane, na batūmami bane abo naabasola gīkī munimane na kūnisanya, na kūnitegeleja gīkī ū nene hū nalī ng'wene. Atīho mulungu ūyo anitangile ū kūbiza ho, nūūlū wa kwilonga ha numa yane.

¹¹Ū Nene, ū nene ng'wenūyū, hū nalī SEEBA, ūlū natī nene atīho mpīja.

¹²Ū nene nakahaya, nū kūpīja nūpīja, hūna nūkumūcha. Yalī kūfuma aho ataalī kwilonga mulungu ngeni ū mu bing'we. A bing'we mulī bakaanīji bane, Ī gīkī ū nene nalī Mulungu,” alīhaya SEEBA.

¹³“Alichene kūfuma kale ya kale, ū nene hū nalī ng'wene. Atīho wa kwīnja shose shose mu nkono gwane. Ū nene ūlū nīīta mhayo, nani ūyo adūgije kūgūgalūcha?”

¹⁴Ū SEEBA, ū Nkomooji wing'we, ū Ng'wela wa Isilaeli, alīhaya gīkī, “Kūlwa nguno ying'we, nakūtūma nhūng'wa ī Babuloni nabenhe pye a Bakalidayo; bakwīnga koi balī gītī babūngi, bal'ū mu meli jabo ījo jalūbadooshaga.

¹⁵Ū nene nalī SEEBA, ū Ng'wela wing'we; ūyo alī mūmbi wing'we, ū Ntemi wing'we.”

¹⁶SEEBA akūlomaga; ūyo akabeeja nzīla ya kūbīta mu nyanza, ūbeeja būbītīlo mu būjiba wa minzī mashimu;

¹⁷ūyo akagakobya magogoteni ga būlūgu na falasa jago, ibità lya bashilikale na shilanga shabo ūbabilinga h'ipandī līmò, hūna ūbasendeka henaho, batabūūkile hangī; bakajima jimijimi, būsota gītī lūtambī lwahūūhīlwa myūyī.

¹⁸Alīhaya, “Oyagi ū kwikala ng'wiyizūkīja īyo yabīta kale, yaya ū kwikala ng'wideedeeng'hanya ya kale.

¹⁹Managi gīkī ī haha nalīīta mhayo mpya! Nīyo ī haha gūfulumile; a bing'we mutūgwitegelejaga? Nalībeeja nzīla ng'witogolo ikalamuku, na myongo mu sī ng'halamuku.

²⁰Ī shiinū ja ng'wikūngū jinikūgije, nī nyamhawa pyī nī ging'hi, nguno nakajipandīkīlaga minzī ga kūng'wa ng'witogolo ikalamuku, mu sī īyo batikalaga mo banhū; ū ng'wikanza lya kūbinha sha kūng'wa banhū bane, a basolwa bane,

²¹banhū abo nababūmba kūlwa nguno yane nene ng'wenekīlī, gīkī balīkumūche ī līkūjo lyane.

²²Alīyo ū bebe Yakobo ūtaalī ū kūnitana; Isilaeli ūtaalī kwikoya kūlwa nguno yane na hado yaya.

²³Ūtaalī kūnenhela ng'holo jako kūlwa shitambò sha kūpemvwa; hama ū mu kafunīje kako ka shitambò ūtanikūjaga nene. Nataalī kūkūtūmamya milīmo midito ya kūnifunīja shitambò sha būsu; nūūlū nataalī kūkūseedeecha kūlwa kūkūhadīkīja kūnifunīja būbbani.

²⁴Ūtaali kūtūmamīla hela jako kūnigūlīla dalasini ya ng'waso gwawiza, nūūlū kūniyeja na masazu ga shitambò shako. Alīyo ūkwikalaga wanikoyaga na būdito wa shibi shako, 2 na kūniseedeecha na būkenaagūji wako.

²⁵Ū Nene, ū nene ng'wenūyū, hū nalī ng'wene hū nene nakabūpyagūlaga wīnga ū būhūbi wako kūlwa nguno yane ng'wenekīlī; nī shibi shako natūshizūkwa hangī na hado yaya.

²⁶Bebe nizūkījage, twīhoyelage Ī mihayo yenīyī; somboolaga ooleche hape gīkī ūlī wape.

²⁷Ū nkūlūgeji wako ū wa kwandya akīīta shibi, na a batongeeji bako būnigomela.

²⁸Alilūūlū, nakūbasosohaja a bataale ba ng'wipandī lyako lyeela. Ū Yakobo nakūmfunya abize wa kūyagajiwa, ū Isilaeli akūbiza wa kwibengelejiwa.”