Read Sukuma Bible 2015 – Bibilia Ilagano Lya Kale 2015 Isaya 44 Bible Online

Isaya 44 - Sukuma Bible 2015 – Bibilia Ilagano Lya Kale 2015 bible

Isaya 44

¹Alilūūlū, bebe Yakobo ntūmami wane, Isilaeli nsolwa wane, igwaga gete lūūlū ī haha.

²Ū SEEBA alīkūwīla; ūyo wakūbeeja, ūūkūbūmba aho ūlī mu nda, ūyo hangī alī ngunanhi wako, alīhaya gīkī, “Bebe Yakobo, ntūmami wane, Yeshuluni, nsolwa wane ūtogohage.

³Nguno nakwita minzī ū mu sī ya notà, myongo īkūhūūma ū mu sī ng'halamuku. Ū būbyīle wako nakūwitīīla Moyo wane; nī jane nakūbitīīla a banhū ba shibyalīlwe shako.

⁴Bakūfuluma no gītī maswa ng'wilago, gītī magobeko gazwīlile hihī na mahululu ga minzī.”

⁵Ūmò akūhaya, “Ū nene nalī sabo ya ng'wa SEEBA,” na ūngī akwiyilīka lina lya Yakobo. Ūngī hangī akwiyandīka ha nkono gwakwe, “Nalī o ng'wa SEEBA;” hūna akwiyitana ī lina lya fumo yakwe gīkī ng'hilya Isilaeli.

⁶Ū SEEBA alīloma, ū Ntemi na Nkomoji wa Isilaeli; ū SEEBA wa mabità. Alīhaya gīkī, “Ū Nene nalī wa kwandya na wa kūmalīja; atīho Mulungu ūlū natī nene.

⁷Nani ī gīsī ūyo abange gītī nene? N'ahabūlage hape; n'abūūlage ayīsomboole hape kū būtongi wane, ī ya kwīngīīla aho nabatūūlīla a banhū bane a ba kale, nī yīyo īkwilonga. Ee, n'ayīhangage īyo īkūbiza ho.

⁸Lekagī ū kogoha, yaya ū kūdetema. Ī yenīyī natīhayile kūfuma kale nalīmuwīla hape? A bing'we mulī bakaanīji bane. Alīho Mulungu ose ose ūlū natī nene? Ng'o gete, atīho ūngī ūyo alī Shiganga; ū nene natandeebile nūūlū ūmò!”

⁹Pye abo bakabeejaga shiikolile sha kūlamiwa batikīlile na kūdūhū; nī shikolo īsho bakashiyegelaga shitī na gwa kūpya nūūlū hado. Abo bakashihayaga chiza babboku, hangī babbūūlī ba babbūūlī; alīyo bakūgooka no.

¹⁰Nani ū wa kwikala akūkoyaga kūpūnza, nūūlū kūsula lī mulungu lītī lya kūng'wenhela solobo yose yose?

¹¹Ū ng'wenūyo akūgooka dūhū, pye na a biye; a bamani ba kūbeeja shikolo banhū dūhū nabo; ali kanibikobyage shi lūūlū bīmīīle nyagosha; bakogoha no bapondwe soni.

¹²Ū nsuji akasolanhyaga ibbaadi, walīpuguta mu makala ga moto lyaseya lyalalūka za; hūna walīsula kūbiza shiikolile sha kūlamiwa; ū kūlīgonda gonda akatūmamīlaga nguzu ja makono gakwe, wayūlītūla nundo. Ūlū ūtuuba jikangayaga ī nguzu, nūūlū ūleka kūng'wa minzī akūgwa mhūngīli.

¹³Ū selemala akasolaga igogo lya ntī, hūna walīpima na lūgoye, walyoola nyalama na kalamu ya makala; hanuma walīpalala na mbīzo jakwe, walyoola na lyolelo; hūna walīsheesha chiza chiza shabiza shiikolile sha munhū, ūmo būlī ū būdūla bo munhū bo kūbeeja shikolo shawiza; hūna ī shiikolile shenīsho wa kashitūūla ng'widuku, shiikale ng'wenūmo.

¹⁴Ashikile kūkamīla ntī ng'wipoolu, hamo nkoola, nūūlū manga, nūūlū ntūndū. Nūūlū adūgije kūhamba nzule, gūtūlwa mbulà kūshisha gūkūla; hanuma ūgūbbuta.

¹⁵Banhū bakūpandīka ng'hwi ja kūpemba. Jimò akasolaga waligimya moto gwa kootà alūngūje; jingī akatūūlaga mu liiko wabacha moto gwa kūzugīla shilīwa. Alīyo hangī akammeejaga na mulungu wakwe wayūnamya, akabeejaga shiikolile wayūshiinamīla!

¹⁶Ū mu ntī gwenūyo akīnjaga ibudīka wabacha moto; wazugīla shilīwa shakwe, ookeja nyama walya wigūta; akootaga moto walūngūja, hūna wahaya; “Yū gīko shi, napandīka moto nalūngūja na kūlūngūja būlī!”

¹⁷Ū kūfuma ū ng'wibudīka īlo līkasaagīīlaga akammeejaga mulungu wakwe, shiikolile shakwe; wayūshiinamīla na kūshilamya. Akashilombaga kūnū akūhayaga gīkī, “Nipījage ū bebe h'ūlī mulungu waane.”

¹⁸A benabo batamanile gete, batī na witegeleja bose bose, a miso gabo gabbokulile she she she, batūdūla ū kūbona; na a maganiko gabo galugalīlilwe, batīko ū kwitegeleja.

¹⁹Atīho ng'wideedeng'hanya nūūlū ūmò atīho ūyo alī na masala nūūlū witegeleja adūle kwiwīla gīkī, “Mu ntī gūmò nīnjaga ibudīka nūlīpemba mu moto, nūzugīla na shilīwa a makala gago, nookeja ho na nyama nūlya. Nibūlī hangī nabeeje shikolo sha malofu ū kūfuma ū ng'wibudīka Īlo lyasaagaga? Niname gete kū būtongi w'igogo lya lī ntī ū nene ūyū?”

²⁰Akwisagīlagwa mabu ng'wizungu, Ī ng'holò yakwe yalembagūlwa yūntaja wīnga ū mu ng'hana; atūdūla ū kwipīja nūūlū kwihūgūla, Ī gete natilembagūlaga ahene ū kūdima shikolo shilī gīkī mu nkono gwane gwa būlyo?

²¹“Ee Yakobo, yizūkagwe ī yeniyī, nguno Ee Isilaeli, ūlī ntūmami wane. Ū bebe naakūbūmba nene, ūlī ntūmami wane; Ee Isilaeli, natīko kūkwība.

²²Ū būkenaagūji wako naabūpyagūlile gīt'ilunde būshila, nī shibi shako gītī gabugabu dilū. Nishokelage lūūlū, nguno naakūkomoolile.”

²³Ee mapandī g'igūlū, Īmbagi na būyegi, nguno SEEBA ūyo wagwītile ū gwenūyū; na a bing'we mapandī ga mu gatī ya sī yoganyagi na būyegi; bing'we ngūlū tandūkagi mīmbo, na a bing'we mapoolu n'ī mitī ī yose Īyo īlī mu bing'we; nguno ū SEEBA wankomoolile ū Yakobo, wakumūkije ikūjo lyakwe mu Isilaeli.

²⁴Ū SEEBA alīkūwīla; ū Nkomoji wako ūyo wakūbūmba aho ūlī mu nda, alīhaya gīkī, “Ū nene nalī SEEBA, ūyo naashibeeja pyī ī shose, na a mapandī g'igūlū naagamba nene iyene, nī sī nīgoloola nene ng'wenekīlī.

²⁵Hū nene nakakenaagūlaga mihayo ya balomolomo a bachūja, na a bachembi ba ngoko nene nakabagalūchaga kūbiza babbūūlī; na a masala ga basomi nakagabipyaga, naagagalūcha kūbiza būchilū;

²⁶nene ūyo nakīyoolechaga ī ng'hana ya mihaya ya batūmami bane, na kūbūshikīlīja ū būhangi wa batūng'wa bane; nene ūyo nakīhayaga ī Yelusalemu gīkī, ‘Bakūzenga mo banhū,’ nī mizengo ya Yuda gīkī, ‘Īkūzengwa’ na a makambagūkīle gaamo gīkī, ‘Nene nakūgazenga būpya.’”

²⁷Nīyo hū nene ūyo nakabūhamīlaga na būjiba gīkī, “Kamaga nī myongo īyo īkakwenhelaga minzī nakwīlagīla yūme.

²⁸Nū Koleshi nakūng'hayaga gīkī, ‘Ū ng'wenūyo ndīīmi wane, ūyo akwīshikīlīja pyī īyo nītogilwe.’” Ū nzengo gwa Yelusalemu akūhaya gīkī, “Ni gūzengagwe hangī” nī hekalu gīkī, “Ū nsingi gwayo ni gūtūūlagwe.”