Read Sukuma Bible 2015 – Bibilia Ilagano Lya Kale 2015 Isaya 45 Bible Online

Isaya 45 - Sukuma Bible 2015 – Bibilia Ilagano Lya Kale 2015 bible

Isaya 45

¹Ū SEEBA alīng'wīla ū Koleshi; ūyo alī ng'witīīlwa maguta wakwe, ūyo wei andimile nkono gwakwe gwa būlyo, aje akūheebaga mahanga na kūtaaja batemi shilanga shabo, na kūja akūnugūlīlaga milyango, na mibità ītizikala īlugalilwe, alīhaya gīkī,

²Ū nene nakūbiza kū būtongi wako, naje nakūjitubījaga ī ngūlū, na kūbinzagūla mibità ya shaba, na a malugalīlo ga chūma nakūgabbutagūla.

³Nakūkwinha sabo jibisilwe ha shitu, būsabi kūfuma mu mapandī ga mbisīla, ūmane gīkī ū nene nalī SEEBA, ūyo alī Mulungu wa Isilaeli, ūyo alīkwitana na lina lyako.

⁴Ū bebe nalīkwitana na lina lyako kūlwa nguno ya ntūmami wane Yakobo, ū nsolwa wane ū Isilaeli, hama nalīkwinha lina ly'ikūjo, nūūlū īkī ūtanitegelegije ū nene.

⁵Ū nene nalī SEEBA, atīho ūngī; atīho Mulungu ūlū natī nene, nakūkūguzuhya, nūūlū īkī ūtaalī kūnitegeleja,

⁶banhu bose, kwīngīīla kū būfuma līīmi kūshisha kū būgwa līīmi, bamane gīkī atīho ūngī ūlū natī nene kwike. Ū nene nalī SEEBA, atīho ūngī.

⁷Nalī mūmbi walyo ī lisana, nī giiti naashiseema nene; ū wiza nakawenhaga nene, na a mayanga nalī nseemi wago nene; ū nene SEEBA nakīītaga pyī ī yenīyī.

⁸Bing'we mapandī ga kwigūlya ng'wigūlū itagi mbulà ya būtūngīlīja; a malunde ni gasūlūlūchage būtūngīlīja gītī mbula; ī sī nayo ītandūke būpumūke būpīji; ū būtūngīlīja nū būpīji shijīlanīje. Nene SEEBA nalī meeja wayo ī yenīyī.

⁹Alī mu kwihīga ūyo akūndugumīlaga Meeja wakwe, alīyo atikīlile n'ipeenu lya lūjo mu mapeenu gasalang'hanile hasī. Ni kinehe ī libūmba līng'wīle ū mūmbi walyo gīkī, “Bebe ūlībeeja kī? Nūūlū ū nīmo gwako gūhaye gīkī, ‘Ū ng'wenūyū atī na makono’?

¹⁰Alī mu kwihīga ū wa kūng'wīla ise gīkī, ‘Wabyala kī lūūlū?’ Nūūlū kūng'wīla nina gīkī, ‘Nang'ho witūūla kī ī shenīsho?’

¹¹Alilūūlū, ū SEEBA, ū Ng'wela wa Isilaeli na Mūmbi wakwe, alīhaya, ‘Ū mu mihayo ya kū būtongi, ni ginehe mulikala ng'wanigīsīlījaga ī mhola ja baana bane, na kūmanūnilagīja ū mu milīmo ya makono gane?

¹²Nene ng'wenekīlī nayībeeja ī sī, nūnseema nū munhū gīkī ikale moi. Na a mapandī g'igūlū naagamba nene na makono gane, na a mabità ga sonda jaamo nūgalagīla nene ū kūbiza ho.

¹³Nene h'ūyo nangūngūhije mu būtūngīlīja, nī nzīla jakwe nakūjigoloola nene pyī ī jose. Ū nzengo gwane akūgūzenga hangī, na a banhū bane abo balī mu būsaamiwa akūbinha wiyaabī. Alīyo ītī kūlwa kūgonga sabo nūūlū shihongeelo; alīhaya SEEBA wa mabità.’

¹⁴Ū SEEBA alīhaya gīkī, ‘Ī sabo ya Misili nī shikolo sha būsūlūja sha kūfuma Esiopia shikwiza kūlī bebe shibize shako, na a banhū a balīhu a bana Seba, bakūkūlondeela kūnū bisūsūmaga batungilwe nhendele.’ Bakūkwinamīla bakūkwikūmbīlījaga balīhaya gīkī, ‘Na ng'hana ū Mulungu alī hamò nang'ho; atīho ūngī, atīho Mulungu ūlū atī ng'wenūyo we wike.’”

¹⁵Ee Mulungu wa Isilaeli, bebe ūyo ūlī Mpīja, ng'hana ūlī Mulungu ūyo ibisile.

¹⁶Pye a babeeja ba shiikolile bakūding'wa minala, na bakūgooka; a bose bakwīnga baje bagookaga no.

¹⁷Alīyo ū Isilaeli akūpījiwa na SEEBA būpīji wa welelo na walelo; mutūgishiwa sonī nūūlū mutūgooka.

¹⁸Nguno ū SEEBA ū nseemi w'igūlū, hū ng'wene ū Mulungu; h'ūyo wīgolanya ī sī, hū ng'wene wībeeja na kwītūūla ho; atīseemile yikale dalali, alīyo akībūmba yikalīlwe na banhū. Hūna lūūlū ū ng'wenūyo alīhaya gīkī, “Ū nene nalī SEEBA, atīho ūngī.

¹⁹Ū nene natayombaga nibisaga hanhū, hīmba mu sī ya giiti; a ba būbyīle o ng'wa Yakobo natabawīlile, ‘Nikoobagi dalali dūhū.’ Ū nene SEEBA nakayombaga ya ng'hana; Īyo nakīhayaga ītūngīlīgije.

²⁰Ikobyagi ng'wize, isūmbyagi bing'we ba kūfuma mu mahanga abo ng'wapūlūgūkile. Abo bakaseselaga bamulungu babo ba mantī batamanile shose shose, abo bakalombaga kū bamulungu abo batadūgije kūpīja.

²¹Hayagi hape ī mihayo ying'we; ni bahoyage mu gwīnda īmò. Nani ūyo wīhaya ī yenīyī kwīngīīla kale? Nani wīkumūcha mu shikū ja kale Ījo jabīta? Naalī natī nene SEEBA? Na atīho Mulungu ūngī ūlū natī nene, Mulungu ntūngīlīja na Mpīja; ūlū natī nene atīho ūngī.

²²Bing'we mhandī jose ja sī, galūkīlagi kūlī nene mupīle; nguno ū nene nalī Mulungu, na atīho ūngī.

²³Nilahīlile mu lina lyane nene ng'wenekīlī, ū nomo gwane gwahayile mu būtūngīlīja bose, mhayo ūyo gūtī gwa kūshoka numa: Būlī munhū akūnitugīja mazwi; na būlī lūlīmi lūkūnilahīlīla nene.

²⁴Bakūyiwīla gīkī, ‘Ū būtūngīlīja nī nguzu shilī mulī SEEBA dūhū.’” Pye abo baalī bampelanīlilwe bakwiza ū kū būtongi wake; bakūcha minala no.

²⁵Alīyo ū mulī SEEBA, a ba būbyīle bo ng'wa Isilaeli a bose bakūbalīlwa batūngīlīja na bakūbiza bapyeni.