Read Sukuma Bible 2015 – Bibilia Ilagano Lya Kale 2015 Isaya 47 Bible Online

Isaya 47 - Sukuma Bible 2015 – Bibilia Ilagano Lya Kale 2015 bible

Isaya 47

¹Bebe ng'wanikī wa Babuloni, ifudīkage mu lūbuubu; nshīke wa Bakalidayo, tyūkaga a h'isumbī lya būtemi wigashe hasī! Ūtikala ūkwitanagwa nkondooku nūūlū nagana.

²Solaga iwe lya kūsheela ūshe būsu; līzuulage ī libuyībuyī lyako, gūkunīlage nū ng'wenda gwako gabize hape a magūlū, ūgabubuge a minzī ūkīle myongo.

³Ūkūzuujiwa ī shizwalo ūlekwe ūlī dūūhū manyegu, nī minala yako īkoolechiwa hape. Nakūmala shiilī, natūnekeja munhū nūūlū ūmò yaya.

⁴Ū Ng'wela wa Isilaeli hū ng'wene ū Nkomoji wise; ī lina lyakwe SEEBA wa mabità.

⁵Igashaga ūhuumūle zugwi, bebe Babuloni ingīlaga mu giiti; ūtikala ūkwitanagwa hangī gīkī ūlī ngole wa mabūtemi.

⁶Naalī naabapelanīla a banhū bane, nūbūsosohaja ū wingīji bone; aho nabatūūla mu nkono gwako ūtaboolekegije shigongo. Ūkabadidoheja no ū nigo gwako, pye na a banamhala na a bagikūlū.

⁷Ūkayiwīla gīkī, “Ū nene ng'wene angū nalī ngole wa būja na būja!” Alīyo walī ūtayiganikaga ī yenīyī ū mu ng'holò yako, nūūlū ūtīyideedeng'hanije Ī ya kū būtongi.

⁸Alilūūlū ī haha degelekaga bebe ndoosela būpannga, bebe ūyo wideebile gīkī ūlī mhola; ūyo ūkiwīlaga bebe ng'wenekīlī gīkī, “Ū nene hū nalī nene, atīho ūngī ūlū natī nene. Natalachīlwa ngosha, nūūlū baana bane.”

⁹Alīyo ī mihayo yenīyī būbīlī wayo Īkūkūgwīla ng'wikanza līmò, mu lūshikū lūmò, ūkūchīlwa baana, nū ngoshi wako akūkūchīla. Īkūkwikīīla mu būshikanu bose, nūūlū īkī ūlī na būlogi wa būlī mbika na ūlī ng'hūngūji ntaale.

¹⁰Ū bebe ūkasanyaga nhūngwa jako jabūbi, kūnū ūkūhayaga gīkī, “Ndūhū wa kūnibona.” A masala gako nū būmani wako shikūkūtūnjaga kūngī, ūlū walinhyaga kwiwīla bebe ng'wenekīlī gīkī, “Ū nene hū nalī nene, atīho ūngī ūlū natī nene.”

¹¹Alīyo būbi būkūkūsanga, ūbo ūtūdūla kwitegeleja nzīla ya kūbūpyena. Iyanga idito līkūkūgwīla, Īlo ūtūdūla kūlyīnja mu nzīla ya shitambò; būkenaagūji būtaale būkūkwizīīla mu kūkwisanganīja ūtamanile.

¹²Alilūūlū, īmaga hīgīyī ū mu būhūngūji wako, nū mu būlogi wako wa būlī mbika, ūbo ūkabūtūmamīlaga na kale kūfuma ha būnīgīnī wako. Hamo nose shi ūkūdūla, hamo ūkūyūbogohya.

¹³Ū būganikīlwa wako wingī no, nose bokūzwangije, ni bafumīlage shi a balagūji bako, na a bamani ba mihayo ya sonda, a bamanīja abo bakenhaga mihayo mipya būlī ng'weji; ni bakūgunage ū mu makoye ayo galīkwizīīla.

¹⁴Managa gīkī a benabo batikīlile na mbelele, ū moto gūkūbababagūla. Nūūlū a boi benekīlī batūdūla ū kwipīja ū mu nguzu ja ndali ja moto. Ū gwenūyū gūtī moto gwa makala ga koota munhū, gūtī moto gwa kūgwigaasīlīja bo mumo hihī.

¹⁵H'ūmo balī ū kūlī bebe a benabo, abo ūkakoyaga nabo kūfuma kale ha būnīgīnī wako. Būlī ng'wene akashimīzīlaga mu nhūngwa jakwe ja malofu dūhū, atīho ū wa kūkūguna.