Read Sukuma Bible 2015 – Bibilia Ilagano Lya Kale 2015 Isaya 5 Bible Online

Isaya 5 - Sukuma Bible 2015 – Bibilia Ilagano Lya Kale 2015 bible

Isaya 5

¹Nang'wīmbīle lyīmbo ūyo nantogilwe, lyīmbo lyakwe ū ntogwa wane, lya mihayo ya ngūnda gwakwe gwa mizabibu: Ū ntogwa wane walī na ngūnda gwa mizabibu hasī mhoni ya ngūlya.

²Akagahogagūla mo pye a mawe, hūna ūlīlīma, ūsolanhya mizabibu ya mbīyū soga ūhamba moi. Ūzenga mo na lūtala lwa balang'hani, n'ikamilo lya mizabibu ūsīmba mo. Hūna ūlindīīla mu kwisagīlwa, aliganika gīkī akūpandīka matwajo masoga ga mizabibu; alīyo ū ngūnda gūtwaja matwajo mabi, ga mizabibu ya mu mapoolu.

³Alilūūlū, bing'we bana Yelūsalemu, na a bing'we banhū ba Yuda, lamulagi a hagatī yane nū ngūnda gwane gwa mizabibu.

⁴Ī gīsī nīmo kī gūngī hangī ūyo gwalī gwigeleelilwe kwītwa ū mu ngūnda gwane gwa mizabibu, ūyo natagwītile ū nene? Hama īkī naalī na kwisagīlwa gīkī nakūpandīka matwajo masoga ga mizabibu, nibūlī gūkatwaja matwajo ga mizabibu ya mu mapoolu?

⁵Leki namuwīle lūūlū ī haha ūmo nakūgwītīla ū ngūnda gwane gwa mizabibu. Nakūlyīnja ī lisanzagūtū lyago gūkenaagūlwe; nakwīkambagūla ī ndugu ya kūgūlang'hana gūtobangwe.

⁶Nakūgwīta gūbize itogolo sagala, Ī mizabibu yamo ītalakongoolelwa, nūūlū gūtalalīng'wa na hado yaya, gūkūlamatīla magwaata na ming'hwa; na a malunde nakūgatūūlīla shilagīlo Ītizūtūla mo mbulà.

⁷Nguno ū ngūnda gwa mizabibu gwa ng'wa SEEBA wa mabità h'ī numba ya Isilaeli, a banhū ba Yuda h'ū ngūnda gwakwe ūyo agūyegelile. Ī ng'hūmbū jakwe jalī kūbona kalamulīle ka wīmà, alīyo ūbona būbūlagi, walī isagīlilwe kūbona būtūngīlīja, alīyo a banhū bakūlīlaga dūhū.

⁸Balī mu kwihīga abo bakūkumingījaga manumba na kūsangīja malaale, kūshisha gūtīho ng'wanya kūlwa banhū bangī, nose pyī sī muyikalīlile bing'we dūhū.

⁹Ū SEEBA wa mabità wayombile nadegelekile, alīhaya, “Ū gwa ng'hana gūlī gīkī, Ī numba ī nhaale nhaale jikūlekwa buyīkī gabize mapagale gike, Ī numba h'ūmo jibeelele jikūbiza misaka ītī na banhū ba kwikala mo.

¹⁰Hama ū mu ngūnda gwa mizabibu gwa eka ikūmi jikwilonga mo liita ja divai makūmi abīlī n'ibīlī dūhū; nū mu kilo igana ja mbīyū īkūfuma mo kilo īmo dūhū.”

¹¹Balī mu kwihīga abo bakipuunaga dilū makīngo baaseeseja bajile kūjūkooba walwa, hūna badīīla bakūng'waga kūshisha būjikū ha gatī; nose wabakola ū walwa.

¹²Ū mu shigukulu shabo bakayegaga balītūla ndono, malimba, shitumba,[3] hamò na mbiilūlū; kūnū bakūng'waga walwa. Alīyo yaya ū kwīlonja īyo akīyītaga ū SEEBA, nūūlū ī milīmo ya makono gakwe ndūhū ū kwīyideedeng'hanya.

¹³Kūlwa mihayo yenīy'a banhū bane bakūdimagwa bayūtwalwa mu būsaamiwa, nguno būtīho ū witegeleja; na a banhū babo a bakūjiwa balīshila kūcha bo kūnanūka, hama ū nyang'wingī ū mu bo alīmalwa notà.

¹⁴Hūna lūūlū ī kūlimu yongegije ū kūtuuba, nīyo īlongeja kūgwasamya ū nomo gwayo na kūtinda ho; mabità ga banhū galīholomokela mo, na a bakūjiwa babo, pyī būyaga nū wikumīlīja wabo, nī yombo yabo.

¹⁵Nose būlī munhū akwinamiwa, pye a banhū bakwichiwa ha sīlīlī; a ba miso ga nyadoshi bakūdohelejiwa.

¹⁶Alīyo ū SEEBA wa mabità akūgūngūhiwa kūlwa būdeeba mu kalamulīle kakwe; ū Mulungu ng'wela akwiyolecha mu nzīla ya būtūngīlīja, gīkī alī ng'wela.

¹⁷Hūna ī ng'holo jikūyūchilūlīlwa kū madimilo gajo, a baana ba ng'holo bakūyūdīīmīla mu makambagūkīle ga mizengo ya basabi.

¹⁸Balī mu kwihīga abo bakadutaga būbi bo kūtūmamīla ngoye ja būmaama, nī shibi bakashidutaga gītī kūduta na nguuta j'igogoteni;

¹⁹abo bakayombaga gīkī, “Ka ni akangīlījage, ni agwītage wangū ū nīmo gwakwe tūgūbone; īyo ayīhelile ū Ng'wela wa Isilaeli ni ayīshikīlījage, ni yizage wangū twīmane!”

²⁰Balī mu kwihīga abo bakawisaabaga ū būbi kūbiza wiza, nū wiza gīkī būbi; abo bakatūūlaga giiti aho līl'isana, n'isana nūūlū shilīho giiti; na a ha ng'wanya gwa būlūlū bakatūūlaga būnonu, hama a ha būnonu bakatūūlaga būlūlū.

²¹Balī mu kwihīga abo bakibonaga boi benekīlī gīkī balī na masala; nū mu kalolele kabo bakibonaga gīkī bamani.

²²Balī mu kwihīga abo bamanīkile gīkī bang'wi bataale ba walwa, na gīkī bakoolī ū mu kūsangīlīja shing'wiwa shikoji;

²³abo bakalekelaga munhū nkenaaguji ūlū būhongwa, alīyo ū munhū ūyo atī na shisembo balema ū kūnamula mu būtūngīlīja.

²⁴Hūna lūūlū, ūmo ndali ja moto jikababagūlīlaga mbelele nyūmu, nū mūmo maswa mūmu gakashikīlaga haho na haho ūlū gūkuumiwa moto; nī miji yabo īkūbola gīko, nū būlabo wabo būkūheheejiwa nyaga gītī lūbuubu; nguno bashilemile ī shilagīlīlo sha ng'wa SEEBA wa mabità, nū mhayo gwakwe ū Ng'wela wa Isilaeli bagūdalahile.

²⁵H'ī nguno yene ū būpelanu bo ng'wa SEEBA būbapembekelile a banhū bakwe, nū nkono gwakwe agūgoloolile, hangī akūbatūlaga. Nī ngūlū jikūdetemaga, ī mibimba ya banhū īlamatīlile hose pyī ū mu mayīla gītī mapalala. Alīyo nūūlū īkī īlī gīko ī mihayo, ū būpelanu bokwe būtaalī ū kwīnga, nū nkono gwakwe ataalī agūgoloolile.

²⁶A mahanga ayo galī kūle akagabūūkījaga lūbembeela, na a yayo galī kū būkalīkījo wa sī akagatūlīlaga nuli. Na ng'hana galiza, gakangīlīgije galī wangū wangū.

²⁷Lītīho nūūlū līmò lyago īlo līnogile nūūlū lya kwipama, hama lītīho līlaala laalile nūūlū lya kwikala lītindīlile, nūūlū nshipi gwa mu nkīmbīlī gūtīho ūyo gūtelile, pyī nūūlū itungījo lya shilatū lītīho Īlo lītīnīkile.

²⁸A masonga gabo mūūgī no, Ū būta wabo pyī ū bose būbangilwe būdadīlwa chiza, Ī falasa jabo ja būlūgū jilī na chūūga shidamu gītī mawe; a madandali ga magogoteni gabo ga būlūgū mapeeji no gītī nyaga gwa nshūlūlū.

²⁹Ū numī gwabo gūbange gītī shimba īkūzuumīīlaga; alichene, bakazuumīlaga gītī shimba songi; Ī nding'wa bakabūūchaga kūnū bakūlundumaga, hūna batwala na atīho wa kūpīja.

³⁰Ū mu lūshīku lwenūlo bakūbalundumīla a banishi babo gītī nyanza īkūlundumaga. Nīyo ūlū munhū ūlola a hasī, akūbona giiti hangī akūzwangana; nī lisana līkwītīlwa giiti kūlwa malunde.