Read Sukuma Bible 2015 – Bibilia Ilagano Lya Kale 2015 Isaya 56 Bible Online

Isaya 56 - Sukuma Bible 2015 – Bibilia Ilagano Lya Kale 2015 bible

Isaya 56

¹Ū SEEBA alīhaya gīkī, “Īlang'hanagi īyo īgololokile, Ītagi ya būtūngīlīja; nguno ū būpīji wane būlī bbihī, ū būtūngīlīja wane būtūdīīla ū kwigengelekaga.

²Ū wa kwīyīta ī yenīyī alī na mbago, ūyo wīlang'hanile mu welwa ng'holò, ūyo īdīlīlile ī sabato atizīsosohaja, na a makono gakwe agalang'hanile gatizīta ī yabūbi.”

³Ū munhū misa ūyo isangīgije kūlī SEEBA n'alekage ū kūhaya gīkī, “Ū SEEBA akūnikomanya dūhū ū nene anīnje ū mu banhū bakwe.” Nūūlū ūyo atadūgije kūbyala[24] Atizagūhaya gīkī, “Ū nene ng'wene natikīlile na līntī lyūmu!”

⁴Nguno ū SEEBA alīhaya gīkī, “Abo batadūgije kūbyala alīyo ī sabato jane bajidīlīlile, abo basolile kwīta īyo īniyegije, nī lilagane lyane balīdimile mu būtūlelengeta,

⁵a benabo nakūbatūūlīla shiizūkījo ū mu hekalu nū mu ndugu ja numba yane, nakūbinha na lina isoga kūtinda kūbiza na baana bagosha na bakīma. Nakūbinha lina lya būja na būja, īlo lītalīnjiwa ho.

⁶Hama a babisa abo bakwisangīja kūlī SEEBA kūlwa kūntūmamīla, nī lina lya ng'wa SEEBA būlītogwa, pyī nū kūnamya wei; bose pye abo bakwīdīlīla ī sabato mu būtīsosohaja, nī lilagane lyane būlīdima mu būkomeezu,

⁷a benabo nakūbenha kūshisha kū lūgūlū lwane lwela, nakūbinha būyegi ū mu numba yane, Ī ya kūnilombela nene. Ī shakwinha shabo sha kūpemvwa nī shitambò shikwanukūlwa a ha ng'walīlo gwane. Nguno ī numba yane īkwitanwa numba y'ilomba kūlwa mahanga gose.”

⁸Ū Seeba MULUNGU, ū milingi wa wa Baisilaeli abo balī mu būsaamiwa alīhaya gīkī, “Balīho na bangī nakūbabilinga nabenhe ū kū bo, kūleka abo baamala kwibilinga.”

⁹Nzūgi bing'we shiinū jose ja mu matogolo, shiinū jose ja mu mapoolu, nzūgi mulye.

¹⁰A balang'hani bakwe babboku, nīyo hangī pye a bose batamanile mhayo gose gose; pye ūmo bagelelile batikīlile na mvwa ja kwikala jihuumūlile sele, jilemeelilwe ū kūmoka; bakikalaga balaalile bakūlootaga shilooti dūhū, bītogilwe no ī tūlo.

¹¹Babange gītī mvwa ndaku, Ījo jitigūtaga nūūlū hado. A benabo badīīmi batī na witegeleja nūūlū būdo; bose pye balī mu nzīla jabo dūhū, būlī ng'wene akwikoobelaga solobo yakwe we ng'wenekīlī.

¹²Ū gwabo gūlī gwa kūmanikomiga bakwiwīlaga, “Bebe ali nzū aha! Nilinda lindage nize, nenhe walwa tūng'we twīnje notà; nīyo nī ntondo īkūbiza gītī h'ī gīkī dūhū, nūūlū na kūkīla ho a henaha.”