Read Sukuma Bible 2015 – Bibilia Ilagano Lya Kale 2015 Isaya 57 Bible Online

Isaya 57 - Sukuma Bible 2015 – Bibilia Ilagano Lya Kale 2015 bible

Isaya 57

¹A batūngīlīja bakūchaaga, alīyo atīho ū wa kūgwideedeeng'hanya mu ng'holò yakwe ū gwenūyū; a ba logohano kūlī Mulungu bakwīnjiagwa, kwike atīho ūyo akwitegelejaga gīkī a batūngīlīja balīyūsolwa bagīngīle a mayanga.

²A ba nzīla jitungīlīgije bakwingīlaga mu mhola, ūlū baacha bakūlaalaga mu kwifula.

³Alīyo egelagi aha bing'we baana ba nkīma nogi, babyalwa ba bashihani na bamalahya!

⁴Ī gīsī nani ūyo mukūsondagūlaga? Nani ūyo mukūng'wibengelejaga na kūng'wasamīla kūnū mukūfunyaga ndīmi jing'we? A bing'we mutī būbyīle wa bashitiigwa na shibyalīlwe sha balomolomo?

⁵Bing'we abo mukajaga kwilamīlīja mu mbeho ja mitī ya mitūndū, na mitī yīngī īyo īfulumile; mukajaga na kū maalonga, būyaga na mu mahalo ga mawe, ng'wakabafunya shitambò a baana bing'we.

⁶A bing'we ū ngabo gwing'we gūlī kū maalonga, h'ūko mukajagūsoleela mawe masheku, ng'wayūgagīmba kūbiza bamulungu bing'we. Hama mukagafunījaga na shitambò sha kūng'wiwa na sha būsu. Ū mu yose yenīyī nikale napolile dūhū?

⁷Mukalinhaga kwigūlya ya ngūlū ndīhu ng'wakabeeja ndaalo jing'we kwenūko; h'ūko mukajagūfunīja nī shitambò shing'we.

⁸Ī shiitongelegejo shing'we sha kūfuma kū mahanga shilī ū kū mpīndo ya milyango ying'we, na ha ng'hīngī ja ha milyango. Kūlwa nguno ya kūnīība ū nene mukūbūkundūlaga ū būlīīlī wing'we, hūna ng'wakīla hoi ng'wabūgalīhya; abo mubūtogilwe ū būlīīlī wabo mulaganile nabo, abo bakamuzuulīīlaga ng'wayūbiloleela balīdūūhū.

⁹Na kūlī Moleki[25] ng'wabīta ū kūja, ng'waja koi ng'wibilaga maguta ga mizeituni, ng'ūshika mulīlabangīla na kūnung'ha ng'waso gwawiza. A batūng'wa bing'we mukabatūma būkolobela kūle; mukika ng'wūshika kūlimu henekīlī!

¹⁰Alīyo nūūlū īkī jamunojaga ī nzīla jing'we kūlwa būlīhu, nahene mutahayile gīkī, “Bing'we ndūhū mo ū gwa kūsola.” Ng'witimbyaga ng'holò ng'wapandīka nguzu mhya; nose ng'walī mutagwaga kūlwa kūseedeeka.

¹¹Ī gete nani akūmudetemyaga, ūyo ang'ogohije no no no kūshisha nose mulīyūnilemba ū nene, nū kūnizūkwa ng'oyile, pyī nūūlū kwīyideedeeng'hanya mu ng'holò jing'we ī yenīyī? Ītī kūlwa nguno īkī gaakūlaga a makanza namulolile dūhū h'ī chene ng'wagayile ū logohano ū kūlī nene?

¹²Nakūboolecha hape ū būtūngīlīja wing'we, nī yīyo mukwīyītaga; alīyo ī yenīyo ītīko ū kūmuguna.

¹³Ūlū ng'ūlīla mukūkoobaga kūgunwa, ni bamugunage a bamulungu bing'we abo ng'wababilingīja benabo! Kwike pye a bose bakūja na nshūūlūlū; a benabo ba kūheheejiwa myūyī dūhū. Alīyo ū munhū ūyo akūnisanya nene gīkī nal'ibūngīlò lyakwe, Ī sī īkūbiza sabo yakwe, nū mu lūgūlū lwane ū lwela akūpandīka mo wingīji.

¹⁴Hūna gūkūhayiwa gūlī gīkī, “Zengagi zengagi; līgolanyagi ī likūūwa; gīnjagi pye a mashikī ū mu nzīla ya banhū bane.”

¹⁵Nguno ūyo alī higūlya na ngūngūhiwa alīyomba; wei ū mpanga kūshisha welelo bose, ūyo lina lyakwe alī Ng'wela; ū ng'wenūyo alīhaya gīkī, “Ū wikalo wane būlī higūlya kwipandī lyela. Alīyo nakwikala hamò nang'hwe ūyo alī na moyo gūzunije kūlekana na būbi hangī ng'widohya; nalīho kūlwa kūnshokeja būpanga ū ng'widohya mu moyo, na kūnshokeja būpanga ūyo ng'holò yakwe īzunije kūlekana na būbi.

¹⁶Ū nene natakūūbīlījaga būhūbi shikū jose būja na būja, nūūlū natasaayaga ilalī; nguno numho ū moyo gwa munhū gūtikala mpanga ū kū būtongi wane, ū nene hū nalī Nseemi wa būpanga wakwe ū munhū.

¹⁷Naalī nasaaya kūlwa nguno ya kwikūmvwa kwabo kwabūbi, nūbatwenya na manasu, hama nibisa kūlwa būpelanu batizūbūbona ū būshū wane; alīyo nahene batīngile mo ū mu būgang'hanazu wa ng'holò jabo.

¹⁸Ī nzīla jabo najideebile na kale, alīyo nakūbapīja; nakūbatongeela nayūbalūngūja hangī,

¹⁹a Baisilaeli abo bakūlīlaga nabinhe būdūla wa kūkumīlīja na milomo yabo. Ībize mhola, mhola kū banhū abo balī kūle na a babo balī bbihī,” alīhaya SEEBA. “Hūna nakubapīja.”

²⁰Alīyo a ba malofu babange gītī nyanza īsalile, īyo ītadūgije kūlembeela, a minzī gayo gakūlibangūlaga būlilo na būdindiligwa.

²¹“Ītīho mhola ū kū ba malofu,” alīhaya ū Mulungu wane.