Read Sukuma Bible 2015 – Bibilia Ilagano Lya Kale 2015 Isaya 58 Bible Online

Isaya 58 - Sukuma Bible 2015 – Bibilia Ilagano Lya Kale 2015 bible

Isaya 58

¹Hamukaga, lekaga gete ū kūsusanya, palalūkaga n'ilaka lya higūlya gītī lya nhaaninga īkūng'ang'aajiagwa. A banhū bane bamanīkijage ū būhūbi wabo, ī numba ya ng'wa Yakobo wīmanīkīje ī shibi shayo.

²Nguno bakanikoobaga būlī lūshikū, bakabonekanaga balī na ng'hūmbū ja kūjimana ī nzīla jane, gītī gīkī balī ihanga īlo līkīītaga ītūngīlīgije, Īlo lītīnalekana na shilagilo sha ng'wa Mulungu walyo. Bakanilombaga nabinhe mbika ja kalamulīle katūngīlīgije; hangī bakabonekanaga gītī batogilwe kūbiza bbihī nang'hwe ū Mulungu.

³Bakabūūjaga, “Nibūlī ūtūbonaga Ī gīkī tūkūfungaga? Nibūlī ūtūdīlīlaga nūūlū twibemba? A bing'we managi gīkī, ū mu lūshikū lwing'we lwa kūfunga mukīītaga gīt'ūmo mutogelilwe, na kūbaheezeja a batūmami bing'we.

⁴Ū kūfunga kwing'we kūkagelelaga mu yombo na likenya, na kwitūla ngumī dūhū. Ī mbika ya kafungīle king'we yenīyī ītadūgije kūlyīta ī lilaka ling'we ligwiwe ū kwigūlya.

⁵Ū gwenūyū hū kūfunga ūyo nakūhayile ū nene, gīkī lūbize lūshikū lwa munhū kūdīīla wibembaga? Muliganika lūlī lūshikū lwa munhū kūdīīla winamyaga ntwe gwakwe gīt'ibīngobīngo, nūūlū munhū kūlaala ha magūnīla na kwifudīka mu mabu? Ū gwenūyo h'ūyo mukagwitanaga gīkī kūfunga, lūshikū ūlo lūzunyiwe na SEEBA?

⁶Ū kūfunga ūko nakūhayile nene kūtī kwa mbika īyī: Kūbingīja a banhū ū wiboneeji ūbo būbatungalīkile, na kūbataligūlīla ī ngoye j'ijoki Īlo lībasheedekegije, kūbaleka mu wiyaabī a batungwa, na kūgabīnzagūla pye a majoki?

⁷Ītī gīkī ī shilīwa shako ūlye nabo abo balī nzala, nū yūyo atī na ha kwikala ūmpandīkīle ha kwishīkīlīgīja, ūlū ūmona munhū alī dūūhū ūnzwīke shizwalo; na kūleka kūngw'ibisa ū munhū, ūyo alī mīlī na mininga gako?

⁸Nguno ū mu gīko ī lisana lyako līkwaaka gīt'ūmo līkīītīlaga līīmi mu dilū; nī mhola yako īkūkwangūhīla, nū būtūngīlīja wako būkūkūtongeela ū mu shimīzīle; hama ī likūjo lya ng'wa SEEBA līkūkūlang'hana ū kū numa yako.

⁹Hūna ūkūng'witana ū SEEBA nang'hwe akūkwidīka. Ūkūnīlīīla akūgune, nang'hwe akūkūshokeja, Nalīho aha! Nguno ūlū ūbīngīja a banhū Ī lijoki īlo lībasheedekegije, ooya ū kūboolota na lwala nū kūbaponangīja mihayo ya malofu,

¹⁰hūna ūzunya kwifunya kūlwa kūbagunanha abo balī nzala, na kūbapandīkīla shiigunaanīlo abo baluhile, a henaho ī lisana lyako līkwaaka ū mu giiti, nū būjikū wako wa giiti būkūgalūka būbize būpe gītī līīmi ntwe gatī.

¹¹Ū SEEBA akūyūkūtongeela gwa; akūkwinha sha kūkwigela nūūlū ng'wikanza lya būūmà, na a maguha gako akūginha nguzu; hūna ūkūbiza gītī ngūnda gūkisīīlagwa minzī gwafula, gītī lūzwīlo lwa minzī gatakamaga.

¹²A banhū bako bakūgazenga būpya a makambūkīle ga kale, nī misingi ya myaka ya kale bakwīgūngūmūla hangī; hūna lūūlū ū bebe ūkwinhwa lina lya, Mūūcha wa Ndugu jikambagūkile, na Nshosha wa būpya wa magūngūli ga kwikala mo banhū.

¹³Ūlū ūlūlang'hana lūpambala lwako lūtizūkwenheleja kūkenaagūla sabato, na kwīta ūmo ūtogelilwe bebe ng'wenekīlī ū mu lūshikū lwane lwela; ūlū ūlwitana ū lūshikū lwa sabato gīkī lūlī lwa kūyeja, na gīkī lūlī lūshikū lwela na lw'ikūjo kūlī SEEBA; hama ūlūkūja, ooya kūlūtūmamīla kūja mu nzīla jako, nūūlū kwīta ūmo ūtogelilwe bebe ng'wenekīlī, nūūlū kūyombagīla mihayo ītī mu nzīla ooya,

¹⁴ūkūbiza na būyegi no ū mulī SEEBA; nane nakūkūtūūla ha gūngūhu, ūyūshimīza ūlī higūlya ya sī; hama ūkūbūlūmba ū wingīji wa nkūlūgenji wako Yakobo.” Nguno gwahayaga nomo go ng'wa SEEBA.